Guerra kʼIsrael chu kpaíses nema lakatsu wilakgo | ¿Tuku kinkawaniyan Biblia?

Latamanin lu lilakgaputsamakgo xlakata taʼakglhuwit nema kgalhikgo Estados Unidos, Israel chu Irán. ¿Asta niku nakitaya uma guerra? ¿Mapakgsinanin tlan namasputukgo uma taʼakglhuwit chu nawilikgo takaksni?

Tiku lakgapaskgo tuku wan Biblia, max katsiputunkgo komo guerra nema lama kʼOriente Próximo natlawa pi natsuku guerra xla Armagedón, nema talichuwinan klibro xla Apocalipsis.

¿Tuku kinkawaniyan Biblia?

¿Tlan namasputukgo mapakgsinanin guerra nema anan kʼOriente Próximo?

Biblia kinkawaniyan: «Ni kakalipawantit lakchixkuwin tiku kgalhikgo limapakgsin, chu nipara atanu chixku, xlakata nila liminkgo lakgtaxtut» (Salmo 146:3).

Ni katsiyaw komo mapakgsinanin natlawakgo pi kaʼanalh takaksni kʼumakgolh kachikinin. Pero Biblia wan pi nipara chatum político, nipara akgtum tamapakgsin nipara latamanin tlan katimasputukgolh guerras chu natlawakgo kaʼanalh takaksni. Kajwatiya Dios tlan namasputu «guerra kxlitilanka katiyatni» (Salmo 46:9).

• Xlakata tlakg nakatsiya, kalikgalhtawakga revista Makatsinina nema wanikan «Nialh katiʼanalh guerras».

¿Xtalichuwinanit uma guerra kBiblia?

Biblia wan: «Wixin nakgaxpatatit pi lama guerras lakatsu chu lakgamakgat. [...] Xlakata nalatalatlawa laklanka kachikinin chu nalatalatlawa tamapakgsin» (Mateo 24:6, 7).

Uma guerra nema lama liwana masiya pi lamaw kkilhtamaku nema Biblia limapakuwi «xlisputni kakilhtamaku» o «kxaʼawatiya kilhtamaku» (Mateo 24:3; 2 Timoteo 3:1). Uma taʼakglhuwit nema anan limasiya pi nilah makgas Dios namasputu guerras nema anan chu putum tuku kinkamakgapatinanan.

• Komo tlakg katsiputuna, kalikgalhtawakga artículo «¿Tuku nalitasiya pi wilaw «kxaʼawatiya kilhtamaku» o «ksputat kakilhtamaku»?».

¿Armagedón natsuku kʼOriente Próximo?

Biblia wan: «Kamamakxtumika putum mapakgsinanin anta niku kxahebreo wanikan Armagedón» (Apocalipsis 16:16).

Armagedón ni akgtum guerra nema katikgalhikgolh mapakgsinanin xalak katiyatni nipara katitsukulh kʼOriente Próximo. Wata akgtum guerra nema Dios nakatakgalhi putum mapakgsinanin xalak katiyatni.

• Komo tlakg katsiputuna, kalikgalhtawaka artículo «¿Tuku Armagedón?».

¿Tuku nakinkamakgtayayan ni lu nalakgaputsayaw?

Biblia wan: «Nitu kalilakgaputsatit, wata putum kilhtamaku kamakatsinitit Dios mintalakgaputsitkan, chu katasaskinitit xliputum minakujkan chu kapaxtikatsinitit akxni tlawaniyatit oración» (Filipenses 4:6).

Jehováa lakaskin katlawaniw oración. Xlakata Dios kinkalilakgaputsayan, kgaxmata kiʼoracioneskan chu kinkamakgtayayan ni lu nalakgaputsayaw (1 Pedro 5:7). Kinkamakgtayayan naʼakgatekgsaw tuku xlakata anan guerras, tuku natlawa xlakata nialh naʼanan guerras chu la namasputu putum tapatin nema anan (Apocalipsis 21:3, 4).

• Kaʼakxilhti artículo «¿Puedo encontrar consuelo en la Biblia?» xlakata nakatsiya la kinkamakgtayayan Dios.