Malakatsukikan kristianos

¿TUKU wi unu kdibujo nema ni axʼakxilhaw? Xlikana, uma xchatiykan kristianos nema akxilhpat. Wa xapulana chixku chu xapulana puskat. ¿Tiku katlawalh? Wa Dios. ¿Katsiya tuku xtukuwani Dios? Xtukuwani, Jehová. Chu xapulana chixku wilinika xtukuwani Adán chu xapulana puskat Eva.

Jehová chuna tlawalh Adán: Tiyalh pokgxni kkatiyatni, chu litlawalh chatum chixku nema nixkgalhiy talekgalhin. Alistalh kankasunulh chu Adán stakwanalh.

Dios xkgalhiy akgtum taskujut nema xʼama maxkiy Adán. Jehová wanilh pi nakawiliniy xtukuwanikan putum animales. Adán max makgas xkastalani animales chu lu tlan xkakxilha xlakata akxni xkawilinilh xtukuwanikan xkamininilh. Akxni Adán xtlawama uma taskujut, wi tuku tsukulh akxilha. ¿Katsiya tuku akxilhli?

Akxilhli pi animales xwi xatsumat chu xakgawasa. Xʼanankgoy elefante chu elefanta chu xʼanankgoy león chu leona. Pero Adán nixkgalhiy xpuskat. Wa xlakata Jehová skan malhtatilh Adán, chu tapamaxtulh akgtum xtapalukut. Uma xtapalukut Adán Jehová litlawalh chatum puskat, chu xpuskat Adán wa.

¡Lu snun lipaxuwalh Adán! ¡Chu Eva lu xlikana snun xpaxuway xlakata anta xlama kxastlan jardín! Chu, tlan xkgalhikgolh xkamankan chu akxtum xalipaxaw xlatamakgolh.

Jehová xlakaskin pi Adán chu Eva nikxni xnikgolh. Jehová xlakaskin pi Adán chu Eva stlan xtlawakgolh xlikalanka Katiyatni la jardín xaEdén. ¡Max snun xlipaxuwakgoy Adán chu Eva akxni xlakapastakkgoy tuku xʼamakgolh liskujkgoy! ¿Pi xlakgati na anta xtitawila xlakata natlawaya Katiyatni akgtum xastlan jardín? Pero xtapaxuwankan Adán chu Eva ni makgapalalh. Naʼakxilhaw tuku xlakata.