Dios tlawa xapulana chixku chu puskat

Jehová wililh akgtum jardín anta niku wanikan Edén. Kʼuma jardín xʼanan lhuwa xanat, kiwi chu animales. Alistalh, tlawalh xapulana chixku, Adán. Litlawalh tiyat chu kankasunulh. ¿Katsiya tuku lalh alistalh? ¡Chixku tsukulh staknan! Jehová wanilh Adán pi xkuentajtlawalh jardín chu xkawilinilh xtukuwani putum animales.

Jehová maxkilh Adán lu xlakaskinka limapakgsin. Wanilh: “Tlan nawaya xtawakat putum kiwi, kaj kgantum ni nawaya, wantuku lu xlakaskinka. Komo nawaya xtawakat uma kiwi, naniya”.

Alistalh, Jehová wa: “Naktlawani xmakgtayana Adán”. Wa xlakata snun malhtatilh chu maklakaskilh kgantum xtapalukut xlakata xlitlawanilh chatum puskat. Xwanikan Eva. Adán chu Eva xapulana familia wankgolh. ¿La makgkatsilh Adán akxni akxilhli xpuskat? Lu paxuwalh asta wa: “¡Wa uma tuku Jehová litlawalh kintapalukut! ¡Wija tiku la akit!”.

Jehová kawanilh Adán chu Eva pi xkgalhikgolh lhuwa kamanan chu xmalakgatsamakgolh katiyatni. Xlakaskin pi xpaxuwakgolh chu akxtum kskujkgolh xlakata akgtum paraíso xtlawakgolh katiyatni. Lu kastlan xwa, la jardín xla Edén. Pero nichuna lalh. ¿Tuku xlakata? Naʼakxilhaw kʼatanu capítulo.