La makgatsankgakgolh xpulatamatkan

KAʼAKXILHTI tuku kaʼakgspulama. Katamakxtumaka Adán chu Eva kjardín xaEdén. ¿Katsiya wix tuku xlakata?

Xlakata tlawakgolh tuku lu nitlan. Wa xlakata Jehová katamakxtuma. ¿Katsiya wix tuku nitlan tlawakgolh Adán chu Eva?

Tlawakgolh tuku Dios xkawaninit pi nixlitlawatkan. Dios kawanilh pi tlan nawakgoy xtawakat kiwi nema xʼanankgoy kjardín. Pero xtawakat kaj kgantum kiwi Dios kawanilh ni nawakgoy; komo xwakgolh, xnikgolh. Tama kiwi xla Dios xwanit. Chu katsiyaw pi nitlan tiyakan tuku ni kilakan, ¿nixlikana? Pero, ¿tuku xlakata chuna tlawakgolh?

Akgtum kilhtamaku akxni Eva xakstu xwi kjardín, xakgatlilh tantum luwa. ¡Katlawa la akxilhpat! Tama luwa wanilh Eva kawalh xtawakat tama kiwi nema Dios xkawaninit pi ni nawakgoy. Akxni Dios katlawalh luwa ni katlawalh xlakata nachuwinankgoy. Wa likatsiyaw pi atanu tiku xmachuwinama tama luwa. ¿Tiku xmachuwinama?

Ni Adán xmachuwinama. Wa machuwinalh chatum espíritu wantiku Dios xkatlawanit makgasa akxni ninajtu xwi Katiyatni. Umakgolh ángeles espíritus xwankgonit chu nilay kaʼakxilhaw. Uma ángel lanka xmakgkatsikan. Chu tsukulh lakapastaka na mapakgsina xwa la Dios chu wata wa xkgalhakgaxmatnika chu ni xkgalhakgaxmatnika Jehová. Wa machuwinalh tama luwa.

Uma ángel akgskgawilh Eva. Eva makanajlalh akxni wanilh pi komo xwalh tama xtawakat kiwi la Dios xwa. Wa xlakata walh, chu Adán na walh. Adán chu Eva ni kgalhakgaxmatnikgolh Dios, wa xlakata makgatsankgakgolh xalipaxaw xpulatamatkan anta kjardín.

Pero nachin kilhtamaku akxni Dios natlaway pi xlikalanka Katiyatni nawan la xwanit jardín xaEdén. Alistalh naʼakxilhaw la wix na tlan namakgtayanana tama kilhtamaku. Chu kaʼakxilhwi tuku kaʼakgspulakgolh Adán chu Eva.