Kgalhkutiy skgalananin

KAʼAXILHTI uma tawakat nema liminkgoy kkiwi uma lakchixkuwin. Kaʼakxilhti lu muslanka uma uvas. Chatiy lakchixkuwin liliminkgoy kiwi. Chu na kaʼakxilhti lhuwa higo chu lhuwa granadas. ¿Niku kakitiyaka putum uma laktlan tawakat? Anta kCanaán. Kalakapastakti, Canaán anta niku xlamakgolh Abrahán, Isaac chu Jacob. Pero xlakata tatsinksni nema analh anta, Jacob lilh xfamilia kʼEgipto. Chu ay titaxtulh 216 kata, Moisés kamaspitmapa kCanaán li Israel. Chu uku wilakgolh kQadés, anta kxakaskakni tiyat.

Anta kCanaán lu lixkajni likatsikgoy kristianos. Wa xlakata Moisés kamalakgachalh kgalhkutiy tiku naʼankgoy skgalakgoy chu kawanilh: Kakiʼukxilhtit pi lhuwa kristianos lamakgolh anta chu kaʼakxilhtit pi lu lakgtliwakga o ni. Kakiʼukxilhtit komo tiyat xala anta lu lhuwa makgalanan wantuku chankan. Chu ni napatsankgayatit nalitanatit tawakat.

Akxni mimparakgolh kQadés wanikgolh Moisés: Lu xlikana lu tlan tama tiyat. Chu xlakata namakanajlakgoy masiyakgoy uma tawakat. Pero kgalhkaw tiku kiskgalakgolh Canaán wankgoy: Kristianos tiku anta lamakgolh lu laklanka chu lakgtliwakga. Komo nakamakglhtiputunaw xtiyatkan nakinkamakgnikgoyan.

Li Israel lu pekuankgolh akxni chuna kgaxmatkgolh. Tlakgtlan komo anta xaktinichaw kʼEgipto o unu kxakaskakni tiyat, wankgoy. Naniyaw kguerra, chu kilakpuskatinkan chu kinkamankan nakachipakan. ¡Nalaksakaw chatum tiku nakinkapulalinan xlakgxokgo Moisés chu nataspitaw kʼEgipto!

Pero kgalhtiy tiku kiskgalakgolh Canaán lipawankgoy Jehová chu kawanilh kachikin pi nialh kasitsikgolh. Kawanikan Josué chu Caleb. Wankgoy: Nikapekuantit. Jehová akxtum kinkatawilan. Nituwa kilakan nawan xtiyatkan. Pero kachikin nikuenta tlawakgoy. Chu asta makgniputunkgoy Josué chu Caleb.

Chu Jehová snun lisitsilh, chu wanilh Moisés: Nitiku kristianos tiku kgalhiya akgpuxum kata chu tiku tlakg kgalhi xkata ni katitanukgolh kCanaán. Akxilhkgolh tuku nilay tamakanajlay nema ktlawalh kʼEgipto chu anta kxakaskakni tiyat pero nina kilipawankgoy. Wa xlakata anu anu naʼangkgoy tipuxum kata anta kxakaskakni tiyat asta akxni putum nanikgoy. Kaj Josué chu Caleb natanukgoy anta kCanaán.