Kgalhakutiy skgalananin

Israelitas taxtukgolh ksipi Sinaí. Ankgolh kxakaskakni tiyat xla Parán asta akxni chankgolh kCadés. Anta Jehová wanilh Moisés: “Kamalakgacha kgalhakutiy lakchixkuwin, chatunu xla akgatunu tribu, xlakata naskgalanankgo kCanaán, tiyat nema nakkamaxki israelitas”. Wa xlakata Moisés kalaksakli kgalhakutiy lakchixkuwin chu kawanilh: “Kapitit kCanaán chu kaʼakxilhtit komo tiyat tlan nachananankan. Na kaʼakxilhtit komo lakchixkuwin lakgtliwakgan o ni, chu na kaʼakxilhtit komo talamana kchiki xla xuwa o klanka kachikinin”. Kgalhakutiy skgalananin ankgolh kCanaán. Anta xʼankgo Josué chu Caleb.

Tipuxam kilhtamaku alistalh skgalananin taspitparakgolh. Xliminkgo higos, granadas, uvas chu mastakgolh uma tamakatsin: “Canaán akgtum tlan tiyat, pero latamanin lakgtliwakgan chu kachikin lu lanka patsaps kgalhi”. Pero Caleb wa: “¡Tlan nakamakgatlajayaw! Tunkun kaʼaw”. ¿Tuku xlakata chuna wa Caleb? Xlakata xla chu Josué xlipawankgo Jehová. Pero amakgapitsi kgalhakaw wankgolh: “Ni kaʼaw. Latamanin xla uma kachikin lu laklanka, komo katatalakxtumiyaw, akinin xtachuna la xtuki nalitaxtuyaw”.

Israelitas xlajwanankgolh, tsukukgolh lawanikgo: “Kalaksakwi atanu tiku nakinkapulalinan chu kataspitwi kʼEgipto. ¿Tuku xlakata naʼanaw kCanaán? ¿Xlakata nakinkamakgnikanan?”. Josué chu Caleb wankgolh: “Tlakg tlan nakgalhakgaxmataw Jehová. Xla nakinkamakgtakgalhan. Ni kapekuantit”. Pero israelitas ni kuentajtlawakgolh. Wata xkamakgniputunkgo Josué chu Caleb.

¿Chu tuku tlawalh Jehová? Wanilh Moisés: “Lhuwa tuku xatlan kkatlawaninit israelitas..., pero xlakan chuntiyaku ni kinkgaxmatnikgo. Wa xlakata unu nakkamakgxtakga 40 kata asta nanikgo. Kajwatiya xkamanankan, chu Josué, chu Caleb, natalatama ktiyat nema kkamalaknunilh israelitas”.