Capítulo 21
Akxni nakgantaxtuy tuku lu tlan lakapastaknit natlawa Jehová
1, 2. 1) ¿Tuku xlakapastaknit Jehová akxni katlawalh ángeles chu latamanin? 2) ¿Tiku xmakgtapakgsikgoy kfamilia nema makxtum xkakninanikgoy Jehová?
WANTUKU lu tlan lakapastaknit natlawa Jehová wa pi putum ángeles chu latamanin makxtum kakakninanikgolh kajwatiya xaxlikana Dios chu xlakata xkamanan nalitaxtukgoy, nakgalhikgoy lu xatlan lakgtaxtut. Wa tama tuku na kgalhiputunkgoy xliputum xnakujkan wantiku tlawakgoy tuku xaʼakgstitum.
2 Jehová tsukulh makgantaxtiy uma tuku lu tlan xlakapastaknit akxni tsukulh tlawa putum tuku anan. Wantiku pulana malakatsukilh wa xKgawasa, chu akxni Jesús malakastakwanika, litaxtulh «xlikakni [...] wa lantla Dios, chu na luwa [...] [xtachuna] wa lantlata Dios» (Hebreos 1:1-3). Uma Kgawasa ni anan atanu tiku xtachuna xlakata kaj xʼakstu tlawalh Dios. Chu xla makgtlawalh amakgapitsi tuku anan: pulana ángeles nema wilakgolh kʼakgapun chu alistalh latamanin unu kKatiyatni (Job 38:7; Lucas 3:38). Xputumkan akgtum familia xwankgonit xlikalanka kakilhtamaku. Xputumkan liwana xkatsikgoy pi Jehová wa Dios, tiku tlakg Lanka xliKalanka Kakilhtamaku chu xTlatkan xapaxkina.
3. 1) ¿Tuku kinkamakgxtakgnikgon kinputumkan xapulana kinatlatnikan? 2) Xlakata Jehová tlan likatsi, ¿tuku tlawalh xlakata xkamanan Adán?
3 Akxni xapulana kinatlatnikan makglakgalhinankgolh maski xkatsikgoy pi nitlan tuku xtlawamakgolh, Dios kawanilh pi xʼamakgolh nikgoy, katamakxtulh kʼEdén chu nialh xkamanan kaliʼakxilhli chu wa xlakata nialh makgtapakgsikgolh kxfamilia Dios nema wilakgolh xlikalanka kakilhtamaku (Génesis 3:22-24; Deuteronomio 32:4, 5). Xlakata kinputumkan, kinatlatnikan wa Adán chu Eva, akxni lakachinaw ay kgalhiyaw talakgalhin. Pero Jehová xkatsi pi makgapitsi xkamanan Adán chu Eva xtlawakgolh tuku xaʼakgstitum, chu xlakata xla tlan likatsiy, mastalh tuku tamaklakaskin xlakata «[na]lipaxuwakgoy xlakskgatan Dios wa yuma lilakgatit ntalakgtaxtun ntu namin» (Romanos 8:20, 21).
Israel makgatsankgalh talakgalhamanin nema xkgalhi
4. ¿Tukuya talakgalhamanin kamaxkilh Jehová xamakgan kachikin Israel?
4 Max akgtiy mil akgkitsis ciento kata nema xtitaxtunit akxni timalakatsukika Adán, Jehová kamaxkilh latamanin talakgalhamanin xlakata tlan xtalalinkgolh. Laksakli xamakgan kachikin xwanikan Israel xlakata xkachikin xwa chu kamaxkilh xLimapakgsin (Génesis 12:1, 2). Akxni akgtum kachikin katlawalh, kalimaklakaskilh xlakata xmakgantaxtilh tuku lakapastaknit natlawa (Deuteronomio 14:1, 2; Isaías 43:1). Pero, israelitas chuntiya xtapakgsinikgoy talakgalhin chu linin, wa xlakata ni xkgalhikgoy tuku xlipaxuwakgoy Adán chu Eva akxni kamalakatsukika.
5. ¿Tuku tlawalh pi israelitas nialhla xtalalinkgolh Dios?
5 Maski israelitas xkgalhikgoy talakgalhin Dios lu tlan xkaʼakxilha. Pero xlilakgachixkuwilitkan xwanit Jehová xlakata wa xTlatkan chu xtlawakgolh xtalakaskin. Jesús lichuwinalh pi lu xlakaskinka xwanit xtlawakgolh tuku xkawanikanit (Mateo 5:43-48). Pero xlakan nichuna tlawakgolh. Maski judíos xwankgoy pi “chatum xTlatkan xkgalhikgoy, wa Dios” Jesús kawanilh pi tuku xtlawakgoy chu xtayatkan nema xkgalhikgoy xlimasiyay pi ni xlikana tuku xwankgoy (Juan 8:41, 44, 47). Kata 33 akxni ay xminita Cristo, Jehová lakxtlawalh Limapakgsin nema xkamaxkinit Israel, chu chuna sputli xlakata la xkatalalin. ¿Xwamputun uma pi nialhpara chatum lataman tlan liwana xtalalilh Dios?
Kamamakxtumikan «ntu wilakgo kʼakgapun»
6. ¿Tuku namakgantaxti «talakkaxwilin» nema lichuwinan Pablo anta kʼEfesios 1:9, 10?
6 Apóstol Pablo lichuwinalh pi makgapitsi lakchixkuwin chu lakpuskatin lu tlan xtalalinkgolh Dios. Kawiliw akgtum liʼakxilhtit, Pablo lichuwinalh wantuku mastanit Jehová xlakata tiku kanajlakgoy namakgtapakgsikgoy kxfamilia Dios, xla wa: «Lantla nkintikamalakgapasnin wa ntu ni xʼatakatsiy xtalakaskin [Dios], mpi chuna xakstulakapastaknit natlaway, [talakkaxwilin, NM] mpi akxni nakikgantaxtuy nkilhtamaku, natalakkaxtlawakgoy xpalakata nCristo xlipaks nkatuwaj, paks ntu wilakgoy nkakgapun, chu ntu anan nkatuxawat» (Efesios 1:9, 10). Uma «talakkaxwilin» wa pulalin Jesucristo. Xlakata xtamakamastan Jesucristo, latamanin tlan nakaʼakxilha Dios: xataputlakge latamanin wantiku kgalhkgalhimakgolh naʼankgoy kʼakgapun, chu tlakg lhuwa latamanin tiku kgalhkgalhimakgolh nalatamakgoy kKatiyatni xliputum kilhtamaku.
7. ¿Tiku umakgolh «ntu wilakgo kʼakgapun»?
7 Pulana, kPetecostés kata 33 akxni ay xminita Cristo, tsukuka kamamakxtumikan «ntu wilakgo kʼakgapun», uma kilhchaniy, wantiku natamapakgsinankgoy Cristo anta kxTamapakgsin xalak akgapun. Xlakata kanajlanikgoy xtamakamastan Jesús, Dios lu tlan kaʼakxilha tama latamanin (Romanos 5:1, 2). Pulana judíos kalaksakka chu alistalh tiku ni judíos xwankgonit na xʼamakgolh katatapakgsikgoy tiku amakgolh kʼakgapun, asta akxni «ntu wilakgo kʼakgapun» xtakgatsilh 144,000 latamanin (Gálatas 3:26-29; Apocalipsis 14:1). La uku nialh chalhuwa wilakgolh unu kKatiyatni.
Kamamakxtumikan «ntu anan kkatuxawat»
8. ¿Tuku tama «ntu anan kkatuxawat», chu la talalinkgoy Jehová?
8 Uma talakkaxwilin na kamamakxtumima «ntu anan kkatuxawat», uma wamputun, latamanin tiku kgalhkgalhimakgolh nalatamakgoy xliputum kilhtamaku kkatiyatni, umakgolh latamanin la uku lhuwa millón wilakgolh. Tiku kalaksakkanit namakgtapakgsikgoy kxTamapakgsin Dios chu wantiku nalatamakgoy kkatiyatni lakxtum malankikgoy xtukuwani Jehová chu na malankikgoy xtakakninkan (Isaías 2:2, 3; Sofonías 3:9). Umakgolh latamanin na wanikgoy Jehová «Tlat» xlakata katsikgoy pi wa kamaxki latamat. Chu Jehová tlan kaʼakxilha xlakata kanajlanikgoy xkgalhni nema makamastalh Jesús (Apocalipsis 7:9, 14). Pero, xlakata kgalhikgoyku talakgalhin, Dios nina lu xkamanan katlawa.
9. ¿Tukuya takgalhkgalhin kamaxki latamanin Romanos 8:21?
9 Latamanin tiku nalatamakgoy kkatiyatni lu lakaskinkgoy pi kachilh kilhtamaku akxni «nakalakgmaxtukan xlakata nialh nalaklatilhakgoy» (Romanos 8:21, NM). Latamanin natsukukan kalakgmaxtukan xlakata nialh nalaklatilhakgoy akxni Cristo chu xʼángeles ay masputukgonit nawan lanka tapatin chu akxni ay sputnit nawan Armagedón. Uma wamputun pi namasputukan putum xkakilhtamaku Satanás, chu alistalh Cristo nalimin tasikulunalin akxni Namapakgsinan Akgtum Mil Kata (Apocalipsis 19:17-21; 20:6).
10. ¿Tuku lu tlan tachuwin nawankgoy xlakskujni Jehová xlakata nalimalankikgo?
10 Xlikana pi lu natawila tapaxuwan akxni xlakskujnin Jehová xalak katiyatni nachuna namakgkatsikgoy la makgkatsikgoy xlakskujni Jehová xalak akgapun, xlakan wankgoy: «Luwa laktlanka, na luwa lanaj lilakawankan mintatlaw, kimPuchinakan Dios nti mpaks matlaniya xlipaks nkatuwaj; Luwa tlan, na luwa talulokgtat mintalakaskin. Wix xreykan xasantujlanin. ¿Ti wa ni namakpuwaniyan, wix nkimPuchinakan, chu ni namaxkiy nkakni mintukuwini? Xampi xman wix nti luwa xasantujlani; Wa cha xpalakata, naliminkgo xlipaks lantla xlikatlanka xala katuxawat, na nalakatakilhputakgoyan, xampi wa mintaputsan, tasiyunit» (Apocalipsis 15:3, 4). Xlikana, putum xlakskujnin Jehová makxtum nakakninanikgoy kajwatiya xaxlikana Dios. Asta nakamalakastakwanikan tiku nikgonit chu na nakamaxkikan talakaskin namalankikgoy Jehová (Hechos 24:15).
Lu tlan lakgtaxtut nema aku mima
11. ¿Tuku lu tlan lakgtaxtut nakgalhikgoy wantiku nalakgtaxtukgoy klanka tapatin?
11 Akxni lanka tapatin nalisputa Armagedón, namasputukan putum tuku nitlan anan kKatiyatni, Satanás Diablo nialh «xmalana katuxawat» katiwa. Xkakninanin Jehová nialh tiku katikamatlawiputulh tuku nitlan (2 Corintios 4:4; Apocalipsis 20:1, 2). Nixaxlikana takanajla nialh katitlawalh pi nitlan natalichuwinan Jehová chu nialh katikamapitsilh latamanin. Xlaskjunin xaxlikana Dios nialh katikatlawanika tuku nitlan o mapakgsinanin nialh katikalekgamanankgolh. ¡Uma, lu tlan lakgtaxtut nawan!
12. ¿La natlawakan xlakata latamanin nialh nakgalhikgoy talakgalhin chu wantuku nitlan limin talakgalhin?
12 Xlakata Jesús wa «xkalhnilu [o aktsu xborrego] Dios, nti namapanuniy xtalakgalhin ntachixkuwitat», nalimaklakaskin xtapalh xtamakamastan xlakata nakaxapani xtalakgalhinkan latamanin (Juan 1:29). Akxni xminit kKatiyatni, xlakata xlimasiyay pi xkatapati latamanin, xla xkamapaksa latamanin akxni wi tuku nitlan xlanikgonit kxmakni o xtatatlakgoy (Mateo 9:1-7; 15:30, 31). Nachuna, Cristo Jesús, xlakata wa xMapakgsina kxTamapakgsin Dios, nakamapaksay tiku nila lakawanankgoy, kgokgonin, tiku akgatapa, tiku nila tlawan, tiku kgalhi tajatat kxtalakapastakni chu tiku kgalhi atanu tajatat (Apocalipsis 21:3, 4). Putum latamanin tiku nakgalhakgaxmatkgo Dios nakalakgmaxtukan xlakata nialh “xatachin nakalin xlimapakgsin ntalakgalhin”, xtalakapastaknikan chu tuku natlawakgoy tlan nawan chu Dios na tlan naʼakxilha (Romanos 7:21-23). Akxni nasputa Akgtum Mil Kata, nialh katikgalhikgolh talakgalhin, chu nawankgoy “chuna la xla, chu chuna la tasiyay” Dios (Génesis 1:26).
13. ¿Tuku natlawa Cristo akxni nasputa xTamapakgsin xaʼAkgtum Mil Kata, chu la nakitaxtuy?
13 Akxni Cristo ay kamapanuninit nawan talakgalhin putum latamanin, namakamaxki xTlat limapakgsin nema xmaxkinit xlakata ay makgantaxtinit nawan tuku xwanikanit: «namakamastay nCristo ntapakgsin kxmakan Dios wa cha xaTlat, akxni laktlawanit nawan xlipaks ntamalan, chu limapakgsin, chu litliwakga. Xampi luwa xlakaskinka mpi xlimakwa wa namapakgsinan, asta ni liwayaj wilinit nawan xlipaks xtalatlawananin kxtampin xtuwan [o xtantun]» (1 Corintios 15:24, 25). Wa xTamapakgsin Cristo xaʼAkgtum Mil Kata, namakgantaxtiy putum tuku xlakapastaknit natlawa Dios, wa xlakata nialh katitamaklakaskilh xtamapakgsin xlakata nakapalakachuwinan latamanin xlakata tlan natalakatsuwinikgoy Jehová. Chu xlakata nialh katiʼanalh talakgalhin chu linin, ay kalakgmaxtukanit nawan latamanin, chuna nialh katitamaklakaskilh nakinkalakgmaxtuyan Jesús. Biblia wan: «Wa xaKam, nalitamakgaxtakga xmalana nawan wa nti makamaxkilh xlipaks nkatuwaj namapakgsiy, lakimpi man wa Dios nti nalikgantaxtuy xlipaks nkatuwaj» (1 Corintios 15:28).
14. ¿Tuku natlawa Jehová xlakata nakaliʼakxilha putum latamanin tiku nialh katikgalhikgolh talakgalhin chu tuku xlakata?
14 Akxni nasputa xTamapakgsin Cristo xaʼAkgtum Mil Kata, latamanin nakamaxkikan talakaskin nalimasiyakgoy pi kajwatiya xaxlikana Dios naskujnanikgoy xliputum kilhtamaku. Chuna xla, akxni Jehová nina kamakgamakglhtinan latamanin la xkamanan, xaʼwatiya nakaliʼakxilha komo ni namakgxtakgkgoy. Satanás chu xdemonios nakamaxtukan kxakapulhman. Wantiku xlikana nalimasiyakgoy pi paxkikgoy Jehová ni katikatlawanika tuku nialhla katikaxtlawaka. Pero wantiku namakgatsankgananikgo chu namastakgo talakaskin pi nakamatlawikan ni nakgalhakgaxmatkgoy Dios, xliputum kilhtamaku nakatamasputukan tiku pulana ni kgalhakgaxmatnilh Dios, Satanás chu xdemonios (Apocalipsis 20:7-10).
15. ¿La natawilaparakgo putum xtamalakatsukin Jehová ángeles chu latamanin?
15 Xkamanan nakatlawa Jehová putum latamanin tiku nialh katikgalhikgolh talakgalhin tiku natatayakgoy pi wa lakgchan namapakgsinan akxni xaʼawatiya nakaliʼakxilha. Tama kilhtamaku xkamanan Dios lu xaxlikana nalipaxuwakgoy xatlan lakgtaxtut chu namakgtapakgsikgo kxfamilia Dios tiku wilakgolh xlikalanka kakilhtamaku. Putum xtamalakatsukin, ángeles chu latamanin makxtum nakakninaniparakgoy kajwatiya xaxlikana Dios, chu liwana nakgantaxtu tuku xlakapastaknit natlawa Jehová. ¿Makgtapakgsiputuna ktama xalipaxaw familia tiku natawilakgoy xlikalanka kakilhtamaku chu xliputum kilhtamaku? Komo makgtapakgsiputuna anta ktama familia, kkawaniyan pi lu xlakaskinka kaʼakxilhti tuku wan 1 Juan 2:17: «Na nalakgsputa wa nkatuxawat [o kakilhtamaku], chu xtaxkgonalakan, wampi wa nti ntlaway xtalakaskin Dios, xaliankgalhin nalatamay».
Wantuku talichuwinalh
• Akxni nina a xlakatsalakgo xlimapakgsin Dios kʼEdén, ¿la xtalalinkgo Jehová putum tiku xkakninanikgoy?
• ¿Tuku xlitlawatkan xlakskujni Dios?
• ¿Tiku xkamanan Dios nawankgoy kilhtamaku nema aku mima, chu la limasiyay uma pi Jehová xlakapastaknit pi putum xtamalakatsukin makxtum kakakninanikgolh?
[Dibujo xla página 190]
Latamanin tiku nakgalhakgaxmatninankgo nalipaxuwakgoy latamat kʼakgtum paraíso xlikalanka kakilhtamaku