¿Kilitlawatkan fiestas nema tlawakgokan?

BIBLIA ni malakatsukilh uma fiestas xla takanajla chu amakgapitsi fiestas nema tlawakgo mapakgsinanin. Wa xlakata wi uma takgalhskinin, ¿niku lakatsukukgolh? Komo tlan napina kʼakgtum biblioteca, natekgsa libros niku lhuwa tuku lichuwinan xlakata umakgolh fiestas nema lhuwa tiku tlawakgo anta niku wix wila. Kaʼakxilhwi makgapitsi.

Semana Santa. Maski wankan pi talakapastaka akxni nilh chu akxni malakastakwanika Jesús, lhuwa tuku anta tlawakgo kilhtsukinitancha knixaxlikana takanajla, kalichuwinaw xlakata tamaʼakgchokgot. Maktum libro nema wanikan Las Grandes Religiones Ilustradas, wan pi akglhuwa kata akxni nina xlakachin Cristo, babilonios «lu lhuwa xkuentajtlawakgo xʼimageneskan [...]. Lu stlan xkamalhakganikan, xkawilinikan lakswan tapixnu, tamakganu chu anillos chu xkawilikan niku lu tlan, chu xkamaʼakgchokgokan». Nachuna kmakgapitsi kachikinin, lu lakgapaskan chu tlawakan «conejo de Pascua». Enciclopedia Católica wan pi uma «akgtum limasiy xlakata limalhuwinankan chu tlan makgalanankan, nema minitancha knixaxlikana takanajla».

Xasasti Kata. Kilhtamaku xla Xasasti Kata ni watiya kilhtamaku lakgchan alakatanu kachikinin, chu tanu tanu tlawakgo fiesta. Chuna lichuwinankan xlakata la lakatsukulh: «Mapakgsina xalak Roma Julio César lakkaxwililh pi 1 xla enero xtsukulh Xasasti Kata, chu uma tlawalh kata 46 akxni nina xmin Jesús. Romanos limaxtukgolh ama kilhtamaku xlakata xla nawan dios Jano, dios xla malakcha chu xla kilhtsukut. Papaʼ enero [ktachuwin latín tawan, Januarius] chuna wilinika xlakata dios Jano, uma xkgalhi akgtiy xlakan: akgtum xakxilhnan klakatin chu akgtum xakxilhnan kxchakgen» chuna wan libro (The World Book Encyclopedia). Wa xlakata, fiestas nema tlawakan xlakata Xasasti Kata minitancha knixaxlikana takanajla.

Noche de Brujas (Halloween). Xlakata uma fiesta, nema xtachuna akxni tlawanikan fiesta tiku nikgonita, maktum libro wan: «Makgapitsi talismanin xla Noche de Brujas lakatsulh anta tuku xtlawakgo druidas [xalakgmakgan sacerdotes celtas] kilhtamaku akxni nina xmin Jesús. Celtas xtlawanikgo fiestas chatiy dioses: dios Chichini chu xdioskan tiku nikgonita [...]. Xfiesta nema xtlawanikan xdios tiku nikgonita xtlawakan 1 xla noviembre, kilhtamaku akxni xtsuku Xasasti Kata xla celtas. Fiesta nema katlawanikan tiku nikgonita tsinu tsinu na tsukukgolh tlawakgo tiku xkanajlanikgo Cristo» (The Encyclopedia Americana).

Amakgapitsi fiestas. Nila nalichuwinanaw putum fiestas nema tatlawa xlikalanka katiyatni. Pero Jehová ni makgamakglhtinan akgtum fiesta nema malanki chatum lataman o kamalanki latamanin nema makxtum wilakgolh (Jeremías 17:5-7; Hechos 10:25, 26). Nachuna, tuku namakgtayayan nakatsiya komo akgtum fiesta makgapaxuwa Dios o ni makgapaxuwa wa nalakputsananiya niku lakatsukucha (Isaías 52:11; Apocalipsis 18:4). Tamasiy nema katsiw kcapítulo 16 xla uma libro nakinkamakgtayakgoyan nakatsiyaw la akxilha Dios komo namakgtlawayaw makgapitsi fiestas nema ni xla takanajla.