Tastakyaw xlakata takanajla, la linkan latamat chu tapaxkit

SANTIAGO chu Judas xtunatalan Jesús xwankgonit, Pedro chu Juan xʼapóstoles xwankgonit. Xlakan tsokgkgolh maktujun cartas xla Tatsokgni xaGriego chu Dios kamalakpuwanilh, makatunu carta linkgo xtukuwanikan. Xlakan tsokgkgolh cartas xlakata xkamakgtayalh kstalaninanin Cristo ni xmakgatsankgananikgolh Dios chu chuntiya pulana xwilikgolh xTamapakgsin Dios.

Nalimasiyayaw takanajla. Ni kajwatiya nawanaw pi kgalhiyaw takanajla; nalimasiyayaw xlakata tuku tlawayaw. Chuna la wan Santiago, «ntakanajla, lapi ni kgalhiy lakwan tatlaw, nitu xlakgasi [o nitu limakwan]» (Santiago 2:26). Tiku titaxtu taʼakglhuwit xlakata nataliʼakxilha xtakanajla tlakg tatliwakglha. Nachuna, tlan naskini liskgalala Dios chu nalipawan pi namaxki. Komo ni namakgatsankganani Jehová, xla tlan naʼakxilha (Santiago 1:2-6, 12). Dios putum kilhtamaku makgtaya tiku ni makgatsankganani chu akgstitum lin xlatamat. Wa xlakata Santiago wan: «Wa Dios nti nkatalakatsuwinitit, na nakatalakatsuwiniyan» (Santiago 4:8).

Kstalaninanin Cristo xlakaskinka namatliwakglhkgo xtakanajlakan xlakata nalakgmakgankgo tuku nakalitsakgsakan chu niti nakamatlawi tuku nitlan. Judas nema xlama niku lhuwa xtlawakan talakgxtumit xalimaxana wa: «kaliskujtit xlakata ni namakgatsankgayatit mintakanajlakan» (Judas 3, NM).

Xaskulunku nalinaw kilatamatkan. Jehová lakaskin pi xlakskujnin xaskulunku xliwanatkan chu nitu nalixkajwankgo. Pedro tsokgnalh: «Xlisantujlani kawantit wixin kmilatamatkan. Xampi chuna ntatsokgnit: “Xasantujlanin nawanatit, xampi xasantujlani nkit [Jehová]”» (1 Pedro 1:15, 16). Xlakata tlan chuna nawanaw talakaskin nastalaniyaw Cristo, chuna la wan apóstol kinkawilinin liʼakxilhtit “lakimpi nastalaniyaw lantla ntlawanit” (1 Pedro 2:21). Maski namin kilhtamaku tuwa nakgalhakgaxmataw tuku wan Dios, tlakg xlakaskinka “akgstitum nakgalhiyaw kintalakapastaknikan” (1 Pedro 3:16, 17, TXS [1999]). Xlakata kgalhkgalhimaw Kilhtamaku akxni Nakamalakgaxokgekan latamanin chu xasasti kakilhtamaku niku «akgstitum nalatamakan», Pedro wan pi lu xlakaskinka xaskulunku nalinaw kilatamatkan chu nalimasiyayaw xlakata tuku tlawayaw pi kakninaniyaw Dios (2 Pedro 3:11-13, TXS [1999]).

Nalimasiyayaw tapaxkit. Juan wa pi «Dios, tapaxkit». Jehová limasiyalh pi lhuwa kinkapaxkiyan akxni malakgachalh xKgawasa xlakata namasta xlatamat chu chuna “kinkapulakgaxokgon xpalakata kintalakgalhinkan”. ¿Tuku nakinkamatlawiyan uma tapaxkit? Juan wa: «Tapaxkinin, lapi chuna Dios nkinkapaxkinitan, pus nachuna nkilalipaxkitkan nchatunu amakgapitsin» (1 Juan 4:8-11). Pulaktum la nalimasiyayaw pi kapaxkiyaw kinatalankan, tlan nakamakgamakglhtinanaw (3 Juan 5-8).

¿La limasiyakgo kstalaninanin Cristo pi paxkikgo Jehová? Juan kgalhtinan: «Xampi wa yuma liwi lantla napaxkiyaw Dios, mpi natlawayaw ntu wan xlimapakgsin, na wa xlimapakgsin, ni tuwa» (1 Juan 5:3; 2 Juan 6). Tiku kgalhakgaxmatkgo Dios katsikgo pi chuntiya nakapaxki chu nakgalhkgalhikgo «latamat wantu xlipan» (Judas 21).

(Takilhtinit kSantiago, 1 Pedro, 2 Pedro, 1 Juan, 2 Juan, 3 Juan chu Judas.)