¿Tiku tsokgkgolh xlakata Jesús?

Kakaʼakxilhti lakchixkuwin nema wilakgolh kdibujo. Kawanikan Mateo, Marcos, Lucas, Juan, Pedro, Santiago, Judas chu Pablo. Umakgolh lakchixkuwin latamakgolh akxni latamalh Jesús, chu tsokgkgolh xlakata xlatamat. Tuku tsokgkgolh wi kBiblia. ¿Tlakg katsiputuna xlakata umakgolh lakchixkuwin?...

Kgalhtutu xʼamigos Jesús xwankgonit chu xtaʼankgo lichuwinankgo Dios. Xʼapóstoles xwankgonit, Mateo, Juan chu Pedro. ¿Akxilha niku wilakgolh?... Mateo tsokgli maktum libro xlakata xlatamat Jesús chu Juan nachuna. Apóstol Juan na tsokgli maktum libro nema wanikan Apocalipsis (o Revelación) chu maktutu cartas nema kawanikan xliʼAkgtum Juan, xliʼAkgtiy Juan chu xliʼAkgtutu Juan. Apóstol Pedro tsokgli maktiy cartas: xliʼAkgtum Pedro chu xliʼAkgtiy Pedro. Xliʼakgtiy carta xla Pedro lichuwinan tuku lu xlakaskinka lalh. Pedro kgaxmatli akxni Jehová chuwinalh kʼakgapun chu wa xlakata Jesús: «Uma kinkgawasa. Tiku lu kpaxki, chu lu kimakgapaxuwa».

Atanu lakchixkuwin nema wilakgolh kdibujo na tsokgkgolh xlakata xlatamat Jesús. Chatum wa Marcos. Max anta xwi akxni chipaka Jesús chu akxilhli putum tuku lalh. Atanu wa Lucas. Xla makuchina xwanit chu max kstalanina Cristo wa akxni xninita Jesús.

Chatiy xnatalan Jesús na tsokgkgolh xlakata xlatamat. ¿Katsiya la xkawanikan?... Wilakgolh kdibujo chu xkawanikan Santiago chu Judas. Pulana ni xkanajlakgo tuku Jesús xmasiya. ¡Xlakpuwankgo pi ni liwana xlakapastaknan! Alistalh kanajlanikgolh Jesús chu kstalaninanin wankgolh.

Chu kalichuwinaw Pablo. ¿Akxilha kdibujo? Akxni nina kstalanina Cristo xwanit xwanikan Saulo. Ni xkaʼakxilhputun kstalaninanin Cristo chu lu lixkajni kalikatsinilh. ¿Katsiputuna la kstalanina Jesús litaxtulh?... Akgtum kilhtamaku, akxni Pablo xʼama kDamasco, kaj xalan kgaxmatli pi kʼakgapun wi tiku xtachuwinama. ¿Tiku xchuwinama? ¡Wa Jesús xtachuwinama! Chu kgalhskilh Pablo: «¿Tuku xlakata lixkajni kalikatsiniya tiku kinkanajlanikgo?». Alistalh Pablo lakgpalilh xtayat chu kstalanina Cristo wa. Pablo tsokgli 14 libros xalak Biblia, Romanos asta Hebreos.

Lu lakgatiyaw likgalhtawakgayaw Biblia chali chali, ¿ni xlikana?... Anta lhuwa talichuwinan xlakata Jesús. ¿Tlakg katsiputuna xlakata Jesús?...