La tlan katalalinkan familia

Akxni tamakgaxtokgkan matsukikan xasasti familia. Maski chuntiya nakapaxkiya minatlatni, la uku tiku tlakg xlakaskinka wa tiku tatamakgaxtokgti. Max makgapitsi mifamilia ni naʼakgatekgsputunkgo pi chuna xliwanat. Pero xtastakyaw Biblia namakgtayayan ni nakatakgalhiya taʼakglhuwit chu na namatliwakglha mintamakgaxtokgat.

1 KATALALIPI MIFAMILIA CHUNA LA XLILAT

TUKU WAN BIBLIA: «Kamaxki kakni mintlat chu mintse» (Efesios 6:2, TNM). Maski lipinata kata, chuntiyaku natalakaskin nakamaxkiya kakni minatlatni. Pero kalakapastakti pi tiku tatamakgaxtokgti na nakalimaxtuni kilhtamaku xnatlatni. «Tapaxkit ni lakgsitsinan» wa xlakata ni kalakpuwanti pi nialh napaxkikana kaj xlakata la talalin xfamilia (1 Corintios 13:4; Gálatas 5:26).

TUKU TLAN XTLAWA:

• Ni kamalakatsali akxni wana: «Mifamilia putum kilhtamaku nitlan tuku kiwanikgo» o «Mintse nikxni lakgati tuku ktlawa»

• Kalakpuwanti tuku makgkatsima tiku tamakgaxtokga

2 LAKATANKS KAKAWANI

TUKU WAN BIBLIA: «Chixku namakgxtakga xtlat chu xtse chu akxtum natatawila xpuskat chu kaj akgtum makni nawankgo» (Génesis 2:24). Maski tamakgaxtokgnitata, max minatlatni namakgtayaputunkgoyan chu namakgtanukgo kmintamakgaxtokgat chu max namalakatsalikgo.

Nalakkaxwiliyatit tuku nakamaxkiyatit talakaskin namakgtanukgo chu xatapaxuwan nakawaniyatit. Tlan lakatitum chuwinankan chu ni lakilhnikan (Proverbios 15:1). Ni tlankajwa nawana, ni tunkun nasitsiya chu nakgalhkgalhinana namakgtayayan tlan nakatalalipina mifamilia chu “nchatunu amakgapitsin [...] nalapaxkiyatit” (Efesios 4:2).

TUKU TLAN XTLAWA:

• Komo makgkatsiya pi mifamilia lu makgtanukgo kmilatamat, kalichuwinantit uma akxni ni sitsipatit

• Liwana kalakkaxwilitit la nalakkaxtlawayatit uma taʼakglhuwit