Tlawa Xapulana Xmilagro

Titaxtunita akgtutu kilhtamaku lata Natanael stalanima Jesús. La uku Jesús chu makgapitsi tiku xapulana kstalaninanin amakgo knorte, niku wi Galilea, anta niku Jesús tapakgsi. Kawanikanit pi kaʼankgolh niku tamakgaxtokgmaka kCaná, kxkachikin Natanael. Uma kachikin wi kkasipijni kxnorte Nazaret, niku stakli Jesús.

María, xtse Jesús, na anit niku tamakgaxtokgmaka. Lu tlan katalalin xfamilia tiku tamakgaxtokgmakgo, chu max makgtayanama xlakata nakamakgamakglhtinan tiku mimakgo. María akxilha pi vino sputnita chu litachuwinan Jesús (Juan 2:3).

María lakaskin pi Jesús wi tuku katlawalh. Pero xla kgalhti chuna la xtalismani anta chu wani pi nitlan akxilha tuku xla skinima: «Puskat, uma ni kinkalakgchanan nalilakgaputsayaw» (Juan 2:4). Xlakata Jesús wa Mapakgsina nema Dios laksaknit, kajwatiya xTlat xalak kʼakgapun tlan nawani tuku xlitlawat, chu ni wa tiku xalak xfamilia o xʼamigos. María makgxtakga pi xkgawasa natlawa tuku talakaskin chu kajwatiya kawani tiku makgtayanamakgo: «Katlawatit putum tuku nakawaniyan» (Juan 2:5).

Wilakgo pachaxan niku mujukan chuchut nema litatlawanit chiwix chu tlan taju liwaka 40 litros chuchut. Wa xlakata Jesús limapakgsinan: «Patunu xalu kalimatsamatit chuchut». Alistalh kawani: «Kamakututit tsinu, chu kalipinitit tiku pulalima lanka taway» (Juan 2:7, 8).

Tiku pulalima lanka taway, kaks lilakawan xlakata lu xatlan vino mastamaka, pero ni katsi pi wa Jesús tlawalh akgtum milagro. Wa xlakata tasani litatawilat chu wani: «Putum amakgapitsin pulana wilikgo xatlan vino, chu akxni latamanin kgachikgonita, wilikgo nema ni lu xatlan. Wix mastapat xatlan asta uku» (Juan 2:10).

Uma xapulana xmilagro Jesús lu matliwakglha xtakanajlakan kstalaninanin. Akxni sputnita tamakgaxtokgat, Jesús kataʼan xtse chu xtunatalan anta kCapernaúm, nema wi kxnoroeste kxkilhtun pupunu xalak Galilea.