Xliʼakgtiy milagro nema tlawa kcaná

Jesús tamakgxtakga kSamaria akgtiy kilhtamaku chu alistalh taspita kʼGalilea, niku stakli. Maski lhuwa la lichuwinanit Dios kJudea, ni taspita xlakata najaxa. Wata matsuki akgtum lanka taskujut. Max ni kgalhkgalhi pi tlan namakgamakglhtinankan, xlakata xla wan pi «palakachuwina ni maxkikan kakni kxkachikin» (Juan 4:44). Pero kstalaninanin, lakgtaspitkgo xfamiliajkan chu xtaskujutkan chu ni tatamakgaxtakgkgo Jesús.

Jesús tsuku lichuwinan uma tamakatsin kʼGalilea: «Talakatsuwinit xTamapakgsin Dios. Kamakgxtakgtit mintalakgalhinkan chu kakanajlanitit xatlan tamakatsinin» (Marcos 1:15). Pero ¿la makgamakglhtinankgo uma tamakatsin tiku xalak Galilea? Lhuwa tiku tlan makgamakglhtinankgo chu malankikgo, pero ni kaj xlakata tamakatsin nema lichuwinan, wata xlakata makgapitsi akxilhkgolh milagros nema tlawalh kJerusalén akxni tlawaka Pascua nema nina makgas titaxtunit (Juan 2:23).

¿Niku matsuki Jesús lanka taskujut nema tlawa kʼGalilea? Max kCaná, niku tlawalh pi chuchut vino xlitaxtulh ktamakgaxtokgat. Kʼuma kilhtamaku, Jesús katsi pi chatum kgawasa lu tatatla, nimaja. Wa xkgawasa kskujni Herodes Antipas, mapakgsina nema alistalh namamaktininan xʼakgxakga Juan tiku Mununan. Kskujni Herodes kgaxmatnit pi Jesús taxtulh kJudea chu lama kCaná, wa xlakata taxtuyacha kCapernaúm chu an niku lama Jesús. Akxni tekgsa tasaskini: «Malana, lakapala katat xlakata ni naniy aktsu kinkgawasa» (Juan 4:49).

Chu Jesús wani: «Kataspitti, minkgawasa paksnit» (Juan 4:50). Max kaks lilakawan akxni kgaxmata uma tachuwin. Maski chuna, kanajlani Jesús chu taspita kxchik. Akxni nina chan, katatanokglha kskujnin, tiku ankgonit xlakata nawanikgo pi xkgawasa paksnita. Xlakata katsiputun komo wa Jesús tiku mapaksalh xkgawasa, kskujni Herodes kakgalhskin kskujnin tukuya hora tlakg tlan tsukulh makgkatsi.

Xlakan kgalhtikgo: «Kgotana makgxtakgli lhkuyat, max kamakgtum hora kakgotanun» (Juan 4:52).

Wa xlakata, katsi pi watiya uma hora akxni Jesús wanilh: «Minkgawasa paksnit». Uma tlawa, pi uma chixku, tiku kgalhi lhuwa tumin chu skujnin, xla chu putum tiku xalak xchik kstalaninanin Cristo litaxtukgo.

Chuna la akxilhaw Jesús tlawa akgtiy milagros kCaná: pulana tlawalh pi chuchut vino xlitaxtulh chu alistalh mapaksa kgawasa tiku 26 kilómetros xlimakgat wi. Xlikana, ni kajwatiya uma milagros nema tlawanit asta la uku. Maski chuna, uma milagro lu xlakaskinka xlakata limasiya pi ama matsuki akgtum lanka taskujut kʼGalilea chu limasiya pi Jesús chatum xpalakachuwina Dios. Pero ¿la xlilhuwa namaxkikan «kakni kxkachikin»?

Uma natasiya akxni Jesús nachan kNazaret. Kaʼakxilhwi tuku titaxtu Jesús anta.