Jesús Tlawa Lhuwa Milagro Kcapernaúm

Jesús kawaninit kgalhtati kstalaninanin, Pedro, Andrés, Santiago chu Juan pi kskitinanin lakchixkuwin nalitaxtukgo. La uku sábado, chu ankgo ksinagoga xalak Capernaúm. Anta Jesús tsuku masiya chu latamanin kaks lilakawamparakgo xlakata masiya la tiku kgalhi limapakgsin chu nichuna la lakgtsokgkinanin.

Uma kilhtamaku wi ksinagoga chatum chixku tiku laktanuma demonio chu pixlanka tsuku wan: «¿Tuku xlakata tanita kilamakglhuwiyaw Jesús xalak Nazaret? ¿Tanita kilamalakgsputuyaw? Liwana kkatsi tiku wix, ¡xaSanto tiku malakgachanit Dios!». Pero Jesús kilhni uma demonio tiku makgapatinama uma chixku chu wani: «¡Kgalhtsekg chu kamakgxtakgti uma chixku!» (Marcos 1:24, 25).

Uma kilhtamaku, xalixkajni espíritu pixlanka chuwinan, tlawa pi chixku nalitakasnokga chu laktaxtu chu “nitu tlawani” (Lucas 4:35). Latamanin tiku wilakgo ksinagoga nila kanajlakgo tuku aku akxilhkgonit chu kgalhskininankgo: «¿Tuku uma? [...] Kgalhi litliwakga xlakata nakamapakgsi demonios chu xlakan kgalhakgaxmatnikgo» (Marcos 1:27). Uma tuku kaks malakawaninan talakgatumi kxlikalanka Galilea.

Akxni taxtukgo ksinagoga, Jesús chu kstalaninanin ankgo kxchik Pedro, tiku na wanikan Simón. Akxni anta wilakgo, tasaskinikgo Jesús pi kamapaksalh xputiatse Pedro, xlakata xla palha lhkuyat kgalhi. Wa xlakata Jesús lakgtalakatsuwi, makgachipa chu maki. Puskat tunkun paksa chu xla max tsuku kakaxtlawani taway Jesús chu kstalaninanin tiku anta tawilakgo.

Akxni kgotanu, lhuwa latamanin chinkgo kchiki chu asta tasiya pi putum kachikin yakgo kmalakcha. Linikgo Jesús tatatlanin xlakata nakamapaksa chu xla kaʼakwili xmakan xlakata nakamapaksa (Lucas 4:40). Chuna la xlichuwinankanit, Jesús putum kamakgtaya, maski kaxatukawa tajatat kgalhikgo (Isaías 53:4). Asta kamakgtaya tiku kalaktanuma demonio. Akxni demonios laktaxtukgo latamanin, pixlanka wankgo: «Wix xKgawasa Dios» (Lucas 4:41). Pero Jesús kakilhni chu ni kamaxki talakaskin wi tuku nawankgo. Xlakan katsikgo pi Jesús wa Cristo, pero xla ni lakaskin pi umakgolh xalixkajni espíritus namalakpuwaninankgo pi skujnanikgo xaxlikana Dios.