Jesús mapaksa kgawasa tiku laktanuma demonio

Akxni Jesús, Pedro, Santiago chu Juan taktakgo ksipi, katatanokglhkgo lhuwa latamanin. Tasiya pi lama tuku nitlan. Makgapitsi lakgtsokgkinanin kastiliyawakgonit amakgapitsi xtamakgalhtawakgen Jesús chu katataʼakglhuwimakgo. Akxni latamanin akxilhkgo Jesús, kaks lilakawankgo chu lakgankgo. Akxni kaʼakxilha, Jesús kakgalhskin: «¿Tuku litaʼakglhuwipatit?» (Marcos 9:16).

Chatum chixku lakgtatsokgosta chu wani: «Makgalhtawakgena, kliminin kinkgawasa xlakata laktanuma demonio nema tlawa pi nila nachuwinan. Makgatunu akxni laktanu, likatala chu kgalhpupu, lakxka xtatsan chu taxlajwani. Kkaskinilh mintamakgalhtawakgen pi xtamakxtukgolh demonio, pero nila chuna tlawakgolh» (Marcos 9:17, 18).

Lakgtsokgkinanin katuwa kawanikgo xtamakgalhtawakgen Jesús chu asta kamamaxanikgo xlakata nila mapaksakgolh kgawasa. Wa xlakata Jesús, ni kgalhti xtlat kgawasa, wata katachuwinan latamanin chu kawani: «¡Latamanin tiku nitlan likatsikgo chu ni kgalhikgo takanajla! ¿La xlimakgas kilhtamaku chuntiya nakkatatawilayan? ¿La xlimakgasku nakkatapatiyan mintayatkan?». Uma tachuwin wa kawanima lakgtsokgkinanin tiku xkatataʼakglhuwimakgo xtamakgalhtawakgen akxni xla xwilacha ksipi. Alistalh wani xatlat pi kaliminilh xkgawasa (Mateo 17:17).

Akxni kgawasa talakatsuwini Jesús, demonio nema laktanuma likatala. Kgawasa tsuku tapili chu kgalhpupu. Jesús kgalhskin xatlat: «¿Pi makgasata chuna akgspula?». Xla kgalhtinan: «Lata aktsujku xwanit. Makglhuwa uma demonio makan klhkuyat o mujuyacha kchuchut xlakata namakgni». Alistalh uma chixku tasaskini Jesús: «Pero komo wi tuku tlan natlawaya, kakinkalakgalhamanti chu kakinkamakgtaya» (Marcos 9:21, 22).

Xatlat lu lakgaputsama xlakata nipara xtamakgalhtawakgen Jesús tlan makgtayakgonit. Wa xlakata Jesús wani tuku matliwakglha chu tlan mamakgkatsini: «¿Tuku xlakata wix wana “komo wi tuku tlan natlawaya”? Xlakata putum tiku kgalhi takanajla tlan kgantaxtuni». Xatlat lakapala kgalhtinan: «¡Kkgalhi takanajla! ¡Pero kakimakgtaya xlakata tlakg nakkgalhi takanajla!» (Marcos 9:23, 24).

Akxni Jesús akxilha pi latamanin lakgmimakgo, kilhni demonio kxlakatin latamanin chu wani: «Demonio xakgokgo chu xaʼakgatapa, ¡klimapakgsiyan pi kamakgxtakgti chu nikxni nalaktanuparaya!». Pero akxni demonio nina laktaxtu kgawasa, tlawa pi pixlanka kachuwinalh chu makglhuwa likatala, alistalh kgawasa nialh tatsuwi. Asta lhuwa tiku tsukukgo wankgo pi ninit (Marcos 9:25, 26). Pero akxni Jesús makgachipa chu yawa, kgawasa paksnita (Mateo 17:18). Lu kaks lilakawankgo tuku Jesús tlawanit.

Nina makgas, akxni Jesús kamalakgachalh xtamakgalhtawakgen xʼankgolh lichuwinankgo Dios, xlakan tlan tamakxtukgolh demonios. Wa xlakata, akxni xʼakstukan tawilakgo Jesús kʼakgtum chiki, kgalhskinkgo: «¿Tuku xlakata akinin nila ktamakxtuw?». Jesús kawani pi katsankganilh takanajla chu na kawani: «Demonio la uma, kajwatiya oración tlan litamakxtukan» (Marcos 9:28, 29). Xlakata xtamakxtukgolh uma tliwakga demonio, xlikgalhitkan xwanit lhuwa takanajla chu xtlawanikgolh Dios oración xlakata xkamakgtayalh.

Xaʼawatiya Jesús kawani: «Xlikana kkawaniyan, pi komo kgalhiyatit mintakanajlakan xtachuna xlilanka xtalhtsi mostaza, nawaniyatit uma lanka sipi: “Katalakxijti unu chu amacha kapit”, chu natalakxija, chu ni katiʼanalh tuku nila katitlawatit» (Mateo 17:20). ¡Takanajla lu kgalhi litliwakga!

Taʼakglhuwit chu tuku tuwa titaxtuyaw akxni skujnimaw Jehová, max tasiya pi lu laklanka chu nila kamapanukan chuna la sipi. Pero komo tliwakga kintakanajlakan, tlan natayaniyaw.