Puxkgo xtawakat trigo sábado

Titaxtuma primavera, Jesús chu xtamakgalhtawakgen amakgo k’Galilea. Akgtum kilhtamaku, akxni xtitaxtumakgo niku xchankanit trigo, tsukukgo tsinkskgo, wa xlakata puxkgo xtawakat trigo chu tsukukgo wakgo. Pero sábado xwanit, chu fariseos akxilhkgo tuku tlawamakgo.

Kalakapastakti pi nina makgas, makgapitsi judíos xalak Jerusalén xmakgniputunkgo Jesús, xlakata xlakpuwankgo pi xlakgmakgama limapakgsin xla sábado. La uku, fariseos lakpuwankgo pi nitlan tuku tlawakgolh xtamakgalhtawakgen Jesús, chu wanikgo: «¡Kaʼakxilhti! Mintamakgalhtawakgen tlawamakgolh tuku ni xlitatlawat sábado» (Mateo 12:2).

Fariseos wankgo pi puxkan chu lakgxapakan trigo xtachuna taskujut nema tlawakan akxni makgalanankan chu maxtukan xtawakat trigo (Éxodo 34:21). Wilikgo laktuwa limapakgsin xlakata taskujut, chu tlawakgo pi tuwa natamakgkatsi namakgantaxtikan limapakgsin, pero Dios xlakaskin pi ama kilhtamaku xalipaxuw xwa chu xkamakgtayalh xtalakatsuwinikgolh Dios. Jesús kastakyawa, chu maklakaskin akgtiy li’akxilhtit xlakata nakamasiyani pi Jehová ni xlakaskin pi chuna x’akxilhkgolh limapakgsin xla sábado.

Pulana kalitachuwinan xlakata David chu ksoldados, akxni xlakan tsinkskgolh, wakgolh kaxtalanchu xla tamakamastan nema xwi ktabernáculo. Kaj sacerdotes tlan xwakgo uma kaxtalanchu akxni xmaxtukan ktabernáculo chu xlilakgpalikan nema aku xtlawakanit. Pero, xlakata tuku xtitaxtuma, Jehová ni makgnilh David nipara ksoldados (Levítico 24:5-9; 1 Samuel 21:1-6).

Alistalh, kalitachuwinan xlipulaktiy li’akxilhtit: «¿Ni likgalhtawakganitantit kLimapakgsin pi sábados anta ktemplo sacerdotes lakatsalakgo sábado chu ni litawilakgo talakgalhin?». Chuna, asta sacerdotes tlawakgo tamakamastan chu amakgapitsi taskujut sábado. Chu Jesús kawanipara: «Akit kkawaniyan pi unu wi tiku tlakg xlakaskinka nixawa templo» (Mateo 12:5, 6; Números 28:9).

Jesús maklakaskimpara Tatsokgni xlakata nakamasiyani pi akgtsankgakgonit: «Komo xtiʼakgatekgstit tuku wamputun umakgolh tachuwin: “Klakaskin talakgalhaman chu ni tamakamastan”, ni xtikaliwilitit talakgalhin tiku ni linkgo kuenta». Chu wampara: «Xlakata xKgawasa chixku wa xMalana Sábado». Akxni Jesús chuna wan, lichuwinama xTamapakgsin xaʼakgtum Mil Kata, nema nalimin takaksni (Mateo 12:7, 8; Oseas 6:6).

Satanás kaʼakgchipanit latamanin lhuwa kata chu kamakgapatinanit, limatsamanit kakilhtamaku tatalachipat chu guerras. ¡Lu tanu nawan latamat akxni Cristo nalimin xTamapakgsin! Uma nakitaxtu la akgtum lanka sábado xlakata nakgalhiyaw takaksni chu tajaxni nema maklakaskinaw.