¿Tuku tlan tlawakan sábado?

La uku sábado chu Jesús an ksinagoga, max anta k’Galilea. Anta wi chatum chixku tiku skaknit xapakgastakat o xapakgkana xmakan (Lucas 6:6). Lakgtsokgkinanin chu fariseos kaks akxilhkgo Jesús. ¿Tuku xlakata? Tasiya tuku lakpuwankgo akxni kgalhskinkgo: «¿Xlilat mapaksanankan Sábado?» (Mateo 12:10).

Judíos tiku pulalinkgo takanajla kanajlakgo pi kajwatiya tlan mapaksakan chatum lataman kilhtamaku sábado komo katuwa wi xlatamat, wa xlakata lakpuwankgo pi ni xlilat namalakgnukan lukut o namapaksakan tiku tamuyokgnit. Tasiya pi umakgolh judíos ni lilakgaputsakgo tuku titaxtuma ama chixku, wata putsamakgo la nalimawakakgo tuku nitlan Jesús.

Pero Jesús lakgapasa nixatlan xtapuwankan. Katsi pi malakatsalikgo tuku wan Tatsokgni xlakata la na’akxilhkan sábado (Éxodo 20:8-10). Ni kajku makgtum lisitsinikgo xlakata tlawa tuku tlan. Alistalh, Jesús wi tuku tlawa nema kamakgasitsi amakgapitsin. Xla wani chixku tiku skaknit xmakan: «Kataya chu katat unu kxitat» (Marcos 3:3).

Alistalh, kalakaʼakxilha lakgtsokgkinanin chu fariseos, chu kawani: «Komo kaj tantum borrego kgalhiyatit chu tamokgosa niku kapulhman kSábado, ¿wi chatum chixku kmilakgstipankan tiku ni katimakgtayalh chu namakutu?» (Mateo 12:11). Tantum borrego tlan litlajakan tumin, wa xlakata niti xmakgxtakgli xborrego kxakapulhman, komo ni xmaxtukgolh, borrego xnilh chu xmakgatsankgakgolh tumin. Nachuna, Tatsokgni masta limapakgsin pi nakakuentajtlawakan animales (Proverbios 12:10).

Chuntiya la kamasiyanima, Jesús wampara: «¡Tlakg lhuwa xtapalh chatum chixku nixawa tantum borrego! Wa xlakata xlilat tlawakan tuku tlan kSábado» (Mateo 12:12). Chuna, Jesús ni x’ama malakatsali limapakgsin xla sábado komo xmakuchilh chixku. Jesús masiyanilh talakgalhaman chixku tiku xtatatla, chu tuku xwan lu xlikana xwanit. Xpulalinanin takanajla, nila masiyakgo pi ni xlikana tuku wan Jesús chu nialh chuwinankgo.

Jesús kalaka’akxilha chu nitlan limakgkatsi xlakata tuku lakpuwankgo, chu wani chixku: «Kastonkgti mimakan» (Mateo 12:13). Akxni stonkga xmakan, tunkun paksa. Chixku lu paxuwa, pero ¿tuku tlawakgo lakgtsokgkinanin chu fariseos?

Ni lipaxuwakgo xlakata chixku paksli, wata taxtukgo chu tunkun tsukukgo «katalakkaxlakgo tiku xtatayakgo Herodes xlakata namakgnikgo» Jesús (Marcos 3:6). Makgapitsi tiku xtatayakgo Herodes wa saduceos. Saduceos chu fariseos tapitsikgonit xlakata ni watiya tuku masiyakgo, pero la uku wi tuku tlawa makxtum nalakgo: tasitsi nema kgalhinikgo Jesús.