Tlawa milagros, pero ni kanajlanikan kNazaret

Lhuwa tuku tlawanit Jesús uma kilhtamaku. Akxni kitaspita kDecápolis, mapaksa puskat tiku xlakgstajma chu malakastakwani xtsumat Jairo. Pero xtaskujut ni anta kitaya. Akxni taxtu kxchik Jairo, stalanikgo chatiy lakgaxokgo chu wankgo: «Kakilalakgalhamaw, xKgawasa David» (Mateo 9:27).

Akxni umakgolh lakchixkuwin wanikgo Jesús «xKgawasa David», limasiyakgo pi kanajlakgo pi Jesús wa lakgchan namakglhtinan xpumapakgsin David, chu wa Mesías. Jesús ni lu kuentajkatlawani maski pixlanka chuwinamakgo, max akxilhputun komo chuntiya naskinikgo pi kakamakgtayalh. Xlakan chuntiya tasaskinikgo. Akxni Jesús tanu kʼakgtum chiki, stalanikgo. Chu Jesús kakgalhskin: «¿Kanajlayatit pi akit tlan ktlawa uma?». Xlakan kgalhtikgo: «Chuna, Malana». Wa xlakata, Jesús kaxamani xlakgastapukan chu kawani: «Chuna la kgalhiyatit mintakanajlakan, kakakgantaxtunin» (Mateo 9:28, 29).

¡Ama kilhtamaku lakawanankgo! Jesús kawani pi ni kalichuwinankgolh tuku tlawanit xpalakatakan, chuna la kawaninit amakgapitsin tiku na kamapaksanit. Pero xlakata lu paxuwamakgo, tsukukgo lichuwinankgo tuku tlawanit Jesús xpalakatakan.

Akxni uma chatiy lakchixkuwin ankgo, liminkan kchiki niku wi Jesús, chatum chixku tiku nila chuwinan xlakata laktanuma demonio. Jesús tamakxtu demonio chu kgokgo tsuku chuwinan. Akxni latamanin akxilhkgo uma, kaks lilakawankgo chu wankgo: «Ni makgstum tasiyanit la uma kʼIsrael». Na anta wilakgo makgapitsi fariseos. Xlakata nila wankgo pi nixlikana tuku tlawanit, kawanikgo latamanin tuku nitlan xpalakata Jesús: «Xla katamakxtu demonios xlakata wa makgtaya xmapakgsinakan demonios» (Mateo 9:33, 34).

Akxni nina makgas lanit uma, Jesús chu xtamakgalhtawakgen ankgo kNazaret, niku stakli. Titaxtunita max akgtum kata lata lichuwinanit Dios ksinagoga xla ama kachikin. Ama kilhtamaku, akxni tsukulh kamasiyani tiku anta xwilakgo kaks lakawankgolh, pero alistalh sitsikgolh chu xmakgniputunkgo. La uku Jesús kamakgtayaputumpara tiku xtalakatsu xwankgonit.

Kilhtamaku sábado, ampara ksinagoga xlakata namasiya. Lhuwa tiku kgaxmatmakgo, kaks lilakawankgo chu lakgalhskinkgo: «¿Niku tiyalh lhuwa liskgalala uma chixku chu tiku maxkilh litliwakga xlakata natlawa milagros? ¿Ni wa uma xkgawasa xwakna? ¿Chu xtse wanikan María, chu xnatalan kawanikan Santiago, José, Simón chu Judas? Chu xnatalan laktsuman, ¿ni unu kinkatawilakgon kkachikin? Wa xlakata, ¿niku tiyalh putum uma?» (Mateo 13:54-56).

Latamanin akxilhkgo Jesús la kaj xtachikikan. Lakpuwankgo: «Akxilhnitaw la staknit, ¿xlikana wa Mesías?». Wa xlakata, maski kgalhi lhuwa liskgalala chu tlawa lhuwa milagros, lakgmakgankgo. Nipara xfamilia, tiku lakgapaskgo lata akxni aktsujku xwanit, kanajlanikgo. Wa xlakata Jesús wan: «Chatum palakachuwina kaniwa niku maxkikan kakni, pero kxkachikin chu kxchik ni maxkikan kakni» (Mateo 13:57).

Jesús kaks lilakawan xlakata tiku xalak Nazaret katsankgani takanajla. Wa xlakata ni lhuwa milagros tlawa anta, «kajwatiya kaʼakgspuwililh xmakan makgapitsi tiku xtatatlakgo chu kamapaksalh» (Marcos 6:5, 6).