Ksinagoga xalak Nazaret

Lu tachilimaka kNazaret. Liwakaya akgtum kata lata Jesús xwakna xlitaxtu kʼuma kachikin, pero alh xlakata Juan namunu chu la uku putum latamanin lichuwinamakgo laklanka taskujut nema tlawama. Wa xlakata latamanin akxilhputunkgo makgapitsi milagros nema tlawa.

Tlakg katsiputunkgo tuku nala akxni Jesús an ksinagoga, chuna la xla lismaninit. Akgatunu sábado ksinagogas tlawakan oración chu pixlanka likgalhtawakgakan xtatsokgni Moisés (Hechos 15:21). Na likgalhtawakgakan xtatsokgnikan palakachuwinanin. Akxni Jesús taya xlakata nakgalhtawakga, max lhuwa tiku anta wilakgo kalakgapasa, xlakata akglhuwa kata anta xʼan ksinagoga. Alistalh maxkikan xrollo palakachuwina Isaías chu putsa niku lichuwinan tiku Jehová lilaksaknit xʼespíritu. La uku uma tatsokgni wi kʼIsaías capítulo 61 versículos 1 chu 2.

Jesús likgalhtawakga niku wan pi tiku laksakkanit nema xʼama min xʼama makatsininan pi tiku kachilinkanit xʼamaka kalakgmaxtukan, tiku nila akxilhkgo xʼamakgo akxilhkgo chu xʼama chin kata xla xatlan xtalakaskin Jehová. Akxni likgalhtawakgakgo, Jesús maxki rollo tiku makgtayanan ksinagoga chu tawila. Putum tiku anta wilakgo kaks akxilhkgo. Alistalh, akxni max xchuwinankgonita, masta uma xlakaskinka tamakatsin: «Uku kgantaxtulh uma tatsokgni nema aku kgaxpattit» (Lucas 4:21).

Putum kaks lilakawankgo «lakglilakgatit tachuwin» nema wan chu lawanikgo: «¿Ni xlikana pi uma xkgawasa José?». Pero Jesús liwana katsi pi xlakan akxilhputunkgo pi Jesús katlawalh milagros chuna la tlawanit alakatanu. Wa xlakata wan: «Xlikana pi wixin nakiwaniyatit uma tachuwin: “Makuchina, miʼakstu kamapaksaka”, chu nawanatit: “Kkgaxmatwi tuku lalh kCapernaúm, wa xlakata, na katlawa umakgolh unu kminkachikin”» (Lucas 4:22, 23). Max tiku xalak Nazaret lakpuwankgo pi pulana anta xlitlawat xwanit uma milagros, xlakata xkamakgtayalh xala anta, chu xlakata ni chuna tlawanit, lakpuwankgo pi kalakgmakgankanit.

Xlakata katsi la lakpuwankgo, Jesús lichuwinan tuku lanit kʼIsrael. Pulana kawani pi maski kʼIsrael xʼanankgo lhuwa lakpuskatin tiku xnikgonita xchixkukan kxkilhtamaku Elías, xla ni anta malakgachaka. Wata alh kSarepta, akgtum kachikin lakatsu kSidón, kxchik chatum puskat tiku xninita xchixku chu ni israelita xwanit. Anta tlawalh akgtum milagro nema lakgmaxtulh xlatamat puskat chu xkgawasa (1 Reyes 17:8-16). Jesús na kawani pi kxkilhtamaku Eliseo kʼIsrael xʼanan lhuwa tiku xkgalhikgo lepra, pero palakachuwina kaj chatum chixku xalak Siria mapaksalh nema xwanikan Naamán (2 Reyes 5:1, 8-14).

¿Tuku tlawakgo tiku wilakgo ksinagoga akxni kgaxmatkgo uma? Lu sitsikgo, max lakpuwankgo pi Jesús kawaninit uma xlakata nakamasiyani pi xʼakstu kapaxkikan chu pi ni kanajlakgo. Wa xlakata tayakgo chu lakapala maxtukgo Jesús kkachikin chu linkgo niku tlakg talhman ksipi niku wi Nazaret xlakata namamokgosikgo. Pero Jesús katsalani chu an kCapernaúm, kxnoroeste xkilhtun pupunu xalak Galilea.