Jehová laksakli Josué

Moisés akglhuwa kata xpulalinit kachikin Israel, pero xʼamaja niy. Jehová wanilh: “Ni wix nakapulalipina israelitas ktiyat nema kkawaninit pi nakkamaxki. Pero nakmaxkiyan talakaskin naʼakxilha”. Wa xlakata Moisés skinilh Jehová xlaksakli achatum tiku xpulalilh kachikin chu xkuentajtlawalh. Jehová kgalhtilh: “Katachuwinanti Josué chu kawani pi wa tiku klaksaknit”.

Moisés wanilh kachikin pi xla xʼamaja niy chu Jehová xlaksaknit Josué xlakata xkalilh kTiyat nema xKawanikanit pi Nakamaxkikan. Wa xlakata Moisés wanilh Josué: “Ni kapekuanti. Jehová namakgtayayan”. Ni makgas titaxtulh, Moisés takxtulh ksipi Nebo. Anta Jehová masiyanilh tiyat nema xkamalaknuninit Abrahán, Isaac, chu Jacob. Moisés xkgalhi 120 kata akxni nilh.

Jehová wanilh Josué: “Kapatakut kgalhtuchokgo Jordán, chu kapit kCanaán. Akit nakmakgtayayan chuna la kmakgtayalh Moisés. Kalakapastakti nalikgalhtawakgaya kilimapakgsin chali chali. Ni kapekuanti, tliwakga miliwanat. Chu kapit chu katlawa tuku kmapakgsinitan”.

Josué kamalakgachalh chatiy skgalananin kJericó. Kʼatanu capítulo nakatsiyaw tuku lalh anta. Akxni skgalananin kitaspitkgolh kJericó wankgolh pi tlan xtanukgolh kCanaán. Lichali Josué kawanilh kachikin pi xtaxtukgolh. Pulana kamalakgachalh sacerdotes tiku xlinkgo arca xla talakkaxlan kkgalhtuchokgo Jordán. Kgalhtuchokgo lhuwa chuchut xlin, pero akxni sacerdotes tajukgolh, chuchut tachokgolh chu skakli. Chu sacerdotes tlawankgolh kxakaskakni kgalhtuchokgo. Akxni chankgolh kxitat, anta tayakgolh asta akxni putum kachikin Israel xpatakutkgolh. Akxni akxilhkgolh uma tuku nila tamakanajla, ¿lakpuwana pi lakapastakkgolh tuku Jehová tlawalh kxaSpinini pupunu?

Lhuwa kata titaxtulh chu israelitas chankgolh ktiyat nema xkamalaknunikanit. La uku tlan xtlawakgolh xchikkan chu xkachikinkan. Tlan kskujkgolh xpukuxtukan, xchankgolh uvas chu atanu. Akgtum katiyatni niku xʼanan leche chu miel.