Jehoiadá ni pekuan

Jezabel kgalhilh chatum tsumat xwanikan Atalía chu na lixkajni xlikatsi. Atalía tatamakgaxtokgli xmapakgsina Judá. Akxni nilh mapakgsina, xkgawasa tsukulh mapakgsinan. Chu akxni nilh xkgawasa, Atalía tawi xlimapakgsina kJudá. Xlakata niti xmakglhtilh tamapakgsin, xkamakgniputun xkamanan mapakgsina chu putum tiku tlan xmapakgsinalh xlakgxokgo. ¡Asta kamakgnilh xnatanatni! Wa xlakata, putum xpekuanikgo.

Xapuxku sacerdote Jehoiadá chu xpuskat, Jehoseba, xkatsikgo pi tuku xtlawama Atalía lu nitlan. Wa xlakata kalipekua wilikgolh xlatamatkan akxni matsekgkgolh chatum xtanat Atalía, chatum skgata tiku xwanikan Jehoás. Makgastakkgolh ktemplo.

Akxni Jehoás xkgalhi akgtujun kata, Jehoiadá kamamakxtumilh putum napuxkun tiku xkuentajtlawanankgo chu levitas. Kawanilh: “Kakuentajtlawatit niku laktanukan ktemplo. Ni kamastatit talakaskin wi tiku natanu”. Alistalh, Jehoiadá wilinilh corona Jehoás xlakata mapakgsina xwa. Chu latamanin xalak Judá pixlanka wankgolh: “¡Lanka kawa kimapakgsinakan!”.

Atalía, kgaxmatli pi xtachilimaka chu lakapala alh ktemplo. Akxni akxilhli xasasti mapakgsina, wa: “¡Lakatakinamaka! ¡Lakatakinamaka!”. Napuxkun tiku xkuentajtlawanankgo chipakgolh Atalía, linkgolh chu makgnikgolh. Xla nitlan liʼakxilhtit xkawilininit kachikin, chu la uku, ¿tuku xʼama la?

Jehoiadá makgtayalh kachikin xtatlawakgolh talakkaxlan Jehová. Kʼuma talakkaxlan, wanikgolh Jehová pi kaj wa xʼamakgo kakninanikgo. Jehoiadá tlawalh pi xmasputukgolh xtemplo Baal chu ídolos. Tlawalh pi sacerdotes chu levitas kskujkgolh kxtemplo Jehová, xlakata latamanin tlan xkakninaniparakgolh anta. Na wililh kuentajtlawananin xlakata ni xtanukgolh ktemplo tiku xtlawakgo tuku nitlan. Alistalh, Jehoiadá chu napuxkun linkgolh Jehoás kxchik mapakgsina chu wilikgolh kxputawilh. Latamanin lu paxuwakgolh. Tlantiya kskujnanikgo Jehová xlakata nialhti xwi Atalía tiku lixkajni xlikatsi chu dios Baal. ¿Lakpuwana pi Jehoiadá ni pekualh? ¿Akxilha pi xlakata ni pekualh kamakgtayalh lhuwa latamanin?