Juan lakkaxwilini xtiji Jesús

Juan xkgawasa xwanit Zacarías chu Elisabet. Jehová palakachuwina limaxtulh chu limaklakaskilh xlakata nakawani latamanin pi Mesías nialh makgas xʼama min. Pero Juan ni xlichuwinan kkachikinin o ksinagogas, xla xlichuwinan kdesierto. Lhuwa latamanin xalak Jerusalén chu xalak Judea xʼankgo kgaxmatnikgo Juan. Xla xkawani pi nialh xtlawakgolh tuku nitlan xlakata xmakgapaxuwakgolh Dios. Wa xlakata, lhuwa tiku nitlan limakgkatsikgolh xtalakgalhinkan chu Juan kamunulh kkgalhtuchokgo Jordán.

Juan ni lhuwa tuku xkgalhi kxlatamat. Xlhakgat xlitatlawanit xchixit camello chu xwa xtuki chu ksakgsi taxkat xalak kakiwin. Latamanin tlakg xlakgapasputunkgo. Asta fariseos chu saduceos tiku lu tlankajwa xkamakgkatsikan ankgolh akxilhkgo. Wa xlakata Juan kawanilh: “Talakaskin nitlan nalimakgkatsiyatit tuku nitlan tlawapatit chu natalakgpaliyatit. Lu xlakaskinka kamakgkatsikanatit xlakata wanatit pi wixin xkamanan Abrahán, pero uma ni wamputun pi wixin xkamanan Dios”.

Lhuwa latamanin xkgalhskinkgo Juan: “¿Tuku kilitlawatkan xlakata nakmakgapaxuwayaw Dios?”. Chu xla xkakgalhti: “Komo maktiy kgalhiyatit milhakgatkan, kamaxkitit maktum tiku maklakaskin”. ¿Katsiya tuku xlakata chuna xkawani? Xlakata Juan xlakaskin pi kstalaninanin xkatsikgolh pi xlakata tlan xmakgapaxuwakgolh Dios, xlipaxkitkan xwanit amakgapitsi latamanin.

Na kawanilh tiku xkalakgaxokgonanikan: “Ni kaʼakgskgawinantit chu ni kakgalhanantit”. Chu soldados kawanilh: “Ni kawantit taʼakgsanin chu na ni kakakgalhxokgokantit”.

Sacerdotes chu levitas na ankgolh akxilhkgo Juan chu wanikgolh: “Putum latamanin katsiputunkgo tiku wix”. Juan kawanilh: “Akit tachuwin nema takgaxmata kdesierto chu kapulalin latamanin natalakatsuwinikgo Jehová, chuna la lichuwinalh palakachuwina Isaías”.

Latamanin lu xlakgatikgo tuku Juan xmasiya chu lhuwa tiku xkatsiputunkgo komo Mesías xwanit. Wa xlakata Juan kawanilh: “Chatum tiku tlakg tliwakga nixawa akit nialh makgas namin. Ni kilakgchan nakmatuxtu xtatunut. Akit chuchut kkalimunuyan, pero xla espíritu santo nakalimunuyan”.