LECCIÓN 2

Kachuwinanti chuna la kgalhchuwinana

2 Corintios 2:17

TUKU NATALICHUWINAN: Kachuwinanti chuna la kgalhchuwinana chu kminaku kataxtucha, chu katasiyalh tuku makgkatsiya xpalakata tuku lichuwinampat chu xpalakata tiku kgaxmatnimakgon.

LA NATLAWAYA

Liwana kalakkaxtlawa chu katlawa oración. Katlawa oración xlakata tlakg nalilakpuwana tamakatsin nema nalichuwinana chu ni wix nalilakpuwankana. Kalakapastakti tuku tlakg xlakaskinka natalakaskin nalichuwinana. Kamaklakaskinti mintachuwin chu ni kaj kalikgalhtawakga akgatunu tachuwin nema min kbosquejo.

Komo lakpuwanita nalikgalhtawakgaya Biblia o atanu likgalhtawakga, kamakgatawakga la nalikgalhtawakgaya xlakata ni nakgalhchakgxtayaya. Komo nalikgalhtawakgaya tuku wa chatum lataman, kalikgalhtawakga chuna la xmakgkatsima uma lataman, pero ni namalakatsaliya.
Kminaku kataxtucha tuku nawana. Kalilakpuwanti tuku xlakata xlakaskinka nakgaxmatkgo uma tamakatsin tiku kgaxmatnimakgon. Wa kakalilakpuwanti. Komo chuna natlawaya, chuna la tayaya, la matsuwiya mimakan chu milakapun nalimasiya pi xlikana tuku lichuwinampat chu na natasiya pi tlan likatsiya.

Nachuwinana chuna la lismaninita kgalhchuwinana ni wamputun pi ni namastaya kakni. Katasiyalh pi xlakaskinka tuku lichuwinampat chu kamaklakaskinti tachuwin nema ni tuwa taʼakgatekgsa, chu kalakgachixkuwili la chuwinankan mintachuwin.
Kakaʼakxilhti tiku kgaxmatnimakgon. Komo tlan chuna tlawakan, kakalakaʼakxilhti. Akxni namastaya akgtum taʼakgchuwin, kaʼakxilhti chatum tiku anta wi chu alistalh atanu tiku kaʼakxilhpara, chu ni kajwatiya makgatunu nakalakapiniya putum tiku wilakgo anta.