TAKGALHTAWAKGA 06
¿La tsukulh latamat?
«Wix [Dios] malakatsukinita latamat» (Salmo 36:9). ¿Kanajlaya wix uma? Lhuwa latamanin lakpuwankgo pi latamat xʼakstu lakatsukulh, pi ni anan Malakatsukina. Komo xlikana niti kinkamalakatsukin, ¿limakwan kilatamatkan? Pero komo Jehová kinkamaxkin latamat, wi tuku xlakata chuna tlawalh, ¿ni xlikana?a Kaʼakxilhti tuku lichuwinan Biblia xlakata la lakatsukulh latamat chu tuku xlakata xlilat nakanajlayaw.
1. ¿La lakatsukulh putuminika tuku anan?
Biblia wan: «Kxapulana Dios tlawalh akgapun chu katiyatni» (Génesis 1:1). Atsinu ni putum científicos wankgo pi putum tuku anan kgalhilh xkilhtsukut. ¿La malakatsukilh Dios putum tuku anan? Xla maklakaskilh «xlitliwakga», uma kilhchanima xʼespíritu santo, xlakata xtlawalh putum tuku anan: galaxias, planetas chu staku (Génesis 1:2).
2. ¿Tuku xlakata Dios tlawalh Katiyatni?
Jehová ni tlawalh Katiyatni «xlakata nitu nalilakan, wata tlawalh xlakata nalatamakan anta» (Isaías 45:18). Xla tlawalh Katiyatni chu wililh putum tuku tlan chu lilakgatit xlakata latamanin tlan xlatamakgolh anta putum kilhtamaku (kalikgalhtawakga Isaías 40:28 chu 42:5). Científicos wankgo pi ni anan atanu planeta chuna la Katiyatni, kajwatiya kKatiyatni tlan latamakan.
3. ¿Tuku xlakata latamanin ni xtachuna animales?
Akxni Jehová xtlawakgonita Katiyatni, malakatsukilh putum tuku staknankgo. Pulana limatsamalh tuwan chu animales. Chu alistalh «Dios tsukulh tlawa chixku chuna la xla» (kalikgalhtawakga Génesis 1:27). ¿Tuku xlakata akinin ni xtachuna animales? Xlakata Dios kinkatlawan chuna la xla, tlan limasiyayaw lakwan tayat, la tapaxkit chu tuku xaʼakgstitum. Xla kinkamaxkiyan liskgalala xlakata tlan nakatsiniyaw tipalhuwa tachuwin, nalipaxuwayaw tuku lilakgatit chu tatlakgni. Nachuna, animales nila kakninanikgo xMalakatsukinakan, pero akinin tlan kakninaniyaw.
TLAKG KALAKPUTSANANIW
Kaʼakxilhwi makgapitsi tuku limasiya pi wa Dios tiku malakatsukilh putuminika latamat chu tuku xlakata xlilat nakanajlayaw pi tuku lichuwinan Biblia xlakata tamalakatsukin xaxlikana. Na nakatsiyaw tuku kinkamasiyaniyan xlakata Dios xtayatkan latamanin.
4. Putum tuku staknankgo wi tiku kamalakatsukilh
Lhuwa latamanin kalimalankikan xlakata lhkaxtukgo tuku anan kkakilhtamaku, pero ¿tiku tlawalh tuku xlakan lhkaxtukgo chu lakgchan namalankikan? Kaʼakxilhtit VIDEO chu kalichuwinantit uma:
¿Tuku tlawakgonit latamanin chu niku lhkaxtukgonit?
Akgatunu chiki wi tiku malakatsukinit. Pero ¿tiku malakatsukilh putum tuku anan kkakilhtamaku? Kalikgalhtawakgatit Hebreos 3:4 chu kalichuwinantit uma:
Xliputum tuku anan kkakilhtamaku, ¿tuku tlakg kaks malakawaniyan?
¿Xlilat nakanajlayaw pi putum tuku anan wi tiku malakatsukilh? ¿Tuku xlakata chuna lakpuwana?
¿Xkatsiyata?
Anta jw.org natekgsa likgalhtawakga chu video nema tlakg lichuwinan xlakata uma. Kaputsa niku wan «¿Malakatsukikanit?» chu «Tuku wankgo makgapitsi xlakata la lakatsukulh latamat».
«Xlikana, akgatunu chiki wi tiku tlawanit, pero xMalakatsukina putum tuku anan, wa Dios»
5. Tuku wan Biblia xlakata tamalakatsukin xaxlikana
Kcapítulo 1 xla Génesis, Biblia lichuwinan la kilhtsukulh Katiyatni chu putum tuku lamakgo anta. ¿Xlikana tuku lichuwinan o kaj akgtum cuento? Kaʼakxilhtit VIDEO chu kalichuwinantit uma:
Akxni Biblia wan pi akgchaxan kilhtamaku litlawaka Katiyatni chu putum tuku anan anta, ¿kilhchanima akgchaxan kilhtamaku nema kgalhi 24 horas chuna la akinin lakgapasaw?
¿Lakpuwana pi anan tuku limasiya pi tuku lichuwinan Biblia xlakata tamalakatsukin xaxlikana? ¿Tuku xlakata chuna lakpuwana?
Kalikgalhtawakgatit Génesis 1:1 chu kalichuwinantit uma:
Lhuwa científicos wankgo pi lata xapulana, putum tuku anan kgalhilh xkilhtsukut. ¿Lakpuwana pi tatalaktxumi tuku wankgo chu tuku wix aku likgalhtawakga kBiblia?
Makgapitsi latamanin katsiputunkgo komo Dios wi tuku malakatsukilh nema alistalh talakgpalitilhalh. Kalikgalhtawakgatit Génesis 1:21, 25, 27 chu kalichuwinantit uma:
¿Masiya Biblia pi Dios wi tuku malakatsukilh chu mastalh talakaskin pi xtalakgpalitilhalh chu xlitaxtukgolh skiti, animales xalak katiyatni chu latamanin? ¿O wa kamalakatsukilh pulakatanu tuku staknankgo?
6. Latamanin ni xtachuna amakgapitsi tuku Dios malakatsukinit
Akinin ni xtachuna animales. Kalikgalhtawakgatit Génesis 1:26 chu kalichuwinantit uma:
Akinin kinkatlawakan chuna la Dios, wa xlakata lakgalhamaninanaw chu paxkinanaw. ¿Tuku masiyaniyan uma xlakata la likatsi Jehová?
MAKGAPITSIN WANKGO: «Tuku lichuwinan Biblia xlakata tamalakatsukin, kaj cuento».
¿Tuku lakpuwana wix? ¿Tuku xlakata chuna lakpuwana?
TUKU KATSINIW
Jehová malakatsukilh putum tuku anan chu putum tuku staknankgo.
¿Tuku xkgalhtinanti?
¿Tuku masiya Biblia xlakata la lakatsukulh putum tuku anan?
¿Wi tuku tlawalh Dios nema alistalh talakgpalitilhalh xlakata xʼanalh tipalhuwa tuku staknankgo la uku? ¿O wa kamalakatsukilh pulakatunu tuku staknankgo?
¿Tuku xlakata latamanin ni xtachuna amakgapitsi tuku Dios malakatsukinit?
TLAKG KAKATSINI
Kaʼakxilhti makgapitsi tuku anan kkakilhtamaku nema limasiya pi anan chatum Malakatsukina.
“¿Qué nos enseña la naturaleza?” (¡Despertad!, septiembre kata 2006)
Kaʼakxilhti la chatum tlat litachuwinan aktsu xkgawasa tuku wan Biblia xlakata tamalakatsukin.
Kaʼakxilhti komo evolución tatalakxtumi tuku masiya Biblia.
«¿Maklakaskilh Dios evolución xlakata namalakatsuki putum tuku anan?» (Artículo xalak jw.org)
Kaʼakxilhti komo tuku tekgskgonit científicos chu tuku lakputsananikanit, limasiya pi latamat wi tiku malakatsukilh o kaj xʼakstu lakatsukulh.
El origen de la vida. Cinco cuestiones dignas de análisis (folleto)
a Takgalhtawakga 25 lichuwinan tuku lakpuwanit natlawa Dios xpalakata latamanin.