TAKGALHTAWAKGA 25
¿Tuku lakpuwanit natlawa Dios kimpalakatakan?
Biblia wan pi latamanin “ni lhuwa kilhtamaku latamakgo chu lhuwa taʼakglhuwit kgalhikgo” (Job 14:1). Pero ¿chuna xlakaskin Dios pi xlatamaw? Komo ni chuna, ¿tuku lakpuwanit natlawa kimpalakatakan? ¿Nakgantaxtu tuku lakpuwanit? Kaʼakxilhti tuku kinkawaniyan Biblia.
1. ¿La lakaskin Dios pi kalatamaw?
Jehová lakaskin pi xatapaxuwan kalatamaw. Akxni kamalakatsukilh xapulana latamanin, Adán chu Eva, kawililh kʼakgtum lu xastlan paraíso: kjardín xaʼEdén. Anta «Dios kasikulunatlawalh chu kawanilh: “Kakgalhitit lhuwa kamanan, kalhuwantit, kamalakgatsamatit katiyatni chu kakuentajtlawatit”» (Génesis 1:28). Jehová xlakaskin pi xkgalhikgolh xkamanankan, pi akgtum paraíso xtlawakgolh Katiyatni chu xkuentajtlawakgolh animales. Xla xlakaskin pi niti xtatatlalh chu putum kilhtamaku xlatamaka.
Maski nichuna kitaxtulh la xla xlakaskin,a Dios nitu lakgpalima tuku xlakpuwanit natlawa (Isaías 46:10, 11). Xla chuntiya lakaskin pi latamanin tiku kgalhakgaxmatkgo kalatamakgolh putum kilhtamaku chu nialh kakgalhikgolh talakgalhin (kalikgalhtawakga Apocalipsis 21:3, 4).
2. ¿La tlan nakgalhiyaw xaxlikana tapaxuwan uku?
Akxni Jehová kinkamalakatsukin tlawalh pi namaklakaskinaw pi “xla kakinkapulalin”, uma wamputun pi nalakgapasputunaw chu nakakninaniputunaw (kalikgalhtawakga Mateo 5:3-6). Dios lakaskin pi tlan katalaliw, pi “katlawaw kxtiji”, pi kapaxkiw chu kaskujniw xliputum kinakujkan (Deuteronomio 10:12; Salmo 25:14). Komo chuna natlawayaw, tlan napaxuwayaw maski anan taʼakglhuwit. Akxni kakninaniyaw Jehová paxuwayaw, tlan makgkatsiyaw.
TLAKG KALAKPUTSANANIW
Kaʼakxilhwi la limasiyalh Jehová pi kinkapaxkiyan akxni tlawalh Katiyatni chu na kaʼakxilhwi tuku wan xTachuwin pi kilitlawatkan xlakata napaxuwayaw.
3. Jehová lakaskin pi xatapaxuwan kalatamaw
Kaʼakxilhtit VIDEO chu kalichuwinantit uma:
¿Tuku xlakata Dios malakatsukilh Katiyatni?
Kalikgalhtawakgatit Eclesiastés 3:11 chu kalichuwinantit uma:
¿Tuku kinkamasiyaniyan uma xlakata la likatsi Jehová?
4. Tuku Jehová xlakpuwanit natlawa nitu talakgpalima
Kalikgalhtawakgatit Salmo 37:11, 29 chu Isaías 55:11 chu kalichuwinantit uma:
¿La likatsiyaw pi tuku Jehová xlakpuwanit kimpalakatakan nitu talakgpalima?
Akgtum chiki nema lakxlama, tlan lakkaxtlawaparakan. Nachuna xpalakata Katiyatni: latamanin lakxtlawakgonit, pero Dios nalakkaxtlawapara xlakata tlan nalatamakgo anta tiku paxkikgo
5.Akxni kakninaniyaw Jehová paxuwayaw
Akxni katsiyaw tuku xlakata kinkamalakatsukikan kinkamakgapaxuwayan. Kaʼakxilhtit VIDEO chu kalichuwinantit uma:
¿La makgtayalh Terumi akxni akgatekgsli tuku xlakata kinkamalakatsukikan?
Kalikgalhtawakgatit Eclesiastés 12:13 chu kalichuwinantit uma:
¿Tuku kilitlawatkan xlakata nalimasiyaniyaw Jehová pi paxtikatsiniyaw putum tuku xla tlawanit kimpalakatakan?
MAKGAPITSIN WANKGO: «¿Tuku xlakata kimalamanima Dios, komo kaj kminit patinan?».
Komo wi tiku chuna xwanin, ¿la xkgalhtinanti?
TUKU KATSINIW
Jehová lakaskin pi xatapaxuwan kalatamaw putum kilhtamaku unu kKatiyatni chu nialh kakgalhiw talakgalhin. Chu la uku, na tlan napaxuwayaw akxni kakninaniyaw Jehová xliputum kinakujkan.
¿Tuku xkgalhtinanti?
¿La xlakaskin Jehová pi xlatamakgolh Adán chu Eva?
¿La likatsiyaw pi tuku Dios xlakpuwanit natlawa xpalakata latamanin nitu talakgpalima?
¿Tuku namakgtayayan nakgalhiya xaxlikana tapaxuwan?
TLAKG KAKATSINI
Kaʼakxilhti tuku limasiya pi jardín xaʼEdén xlikana xwi.
«Jardín xaʼEdén ¿kaj akgtum cuento?» (Makatsinina, 1 xla febrero kata 2011)
Kaʼakxilhti tuku xlakata akinin kkanajlayaw pi Katiyatni nikxni katilakgsputli.
Kaʼakxilhti tuku wan Biblia pi xlikana nakinkamakgapaxuwayan.
«¿Tuku xlakata kinkamalakatsukikan?» (Artículo xalak jw.org)
Kaʼakxilhti pi maski chatum chixku xlakpuwan pi nitu xtsankgani, akxilhli pi ni xkgalhi xaxlikana tapaxuwan.
a Ktakgalhtawakga nema stala nakatsiyaw tuku lalh.