Pulaktujun la tlakg tlan nakinkamakgtayayan akxni likgalhtawakgayaw Biblia

«Biblia wa libro nema tlakg tastanit putum kilhtamaku nema minitancha chu ni kaj watiya ama, na tlakg tasta kata kata.» (REVISTA TIME)

«Min kilhtamaku klikgalhtawakga Biblia pero lu klakgachani.» (KEITH, MÚSICO INGLÉS)

¡LU NI la kanajlakan! Maski Biblia tasta xlikalanka kakilhtamaku, lhuwa latamanin ni litamakgtakyakgo. Pero wilakgolh tiku lu kamakgtaya xlakata likgalhtawakgakgo. Akgtum liʼakxilhtit, chatum puskat tiku wanikan Nancy wan: «Xtitaxtunitta puxamakukitsis kata la xakputsama la nakpaksa xlakata xmin kilhtamaku lu xaklipuwan, wantuku tlakg kimakgtayanit kkilatamat wa klikgalhtawakga Biblia chu liwana klilakapastaka tuku klikgalhtawakga akgatunu tsisa».

Komo wix nikxni alikgalhtawakgaya Biblia, minit kilhtamaku akxni lakpuwati, ¿tuku xlakata uma libro lu kamakgtayanint makgapitsi latamanin? Chu komo wix lismaninita likgalhtawakgaya Biblia, ¿la tlakg nalitamakgtayaya? Wantuku natalichuwinan max xlikana pi lu namakgtayayan.

1 Xatlan talakapastakni kakgalhi akxni nalikgalhtawakgaya

◼ Makgapitsi likgalhtawakgakgo xlakata lu stlan takgalhtawakga akxilhkgo; amakgapitsi xlakata tekgsputunkgo tastakyaw, chu amakgapitsi kaj xlakata lakpuwankgo pi chuna xlitlawatkan. Pero wantuku tlakg tlan xlakata akxni nalikgalhtawakgayaw Biblia wa nakatsiputunaw xlakata Dios chu la kinkamakgtayayan tuku wan kBiblia kkilatamatkan.

Biblia wi tiku tamalakxtumi nema kinkalimasiyaniyan pi lu xlakaskinka xatlan talakapastakni nakgalhiyaw akxni nalikgalhtawakgayaw uma tuku wan: «Xampi lapi wi nti nkgaxmata ntachuwin, na ni tlaway wa ntu wan, wa yuma xtachuna nkilitaxtuy nchatum nchixku nti ntalakanuy kwalhtin [o espejo] lakukxilhkan. Xampi akxni lakukxilhkan wa lantla lakawan, mana watiya mpaxkatsiniy, lakgapuxtu an tunkan, na tunkan patsankgay wa lantla lakawan. Wa mpi wa nti luwa kaks xlakanilh xaktanks limapakgsin wa ntu xakstu nkuenta ntu xlitlawalh, [...], ni kaj xman wa nakgaxmata napatsankgay, wampi natlaway wa ntu wan, wa yuma chapaxawana nalilatamay xtatlaw» (Santiago 1:23-25).

Uma chixku tiku talichuwinalh lakaʼakxilhka kʼespejo, pero ni kaxtlawalh tuku nitlan xtasiya. ¿Tuku xlakata? Max kaj lakapara lakaʼaxilhka, o max akxilhka kʼespejo pero ni xkaxtlawaputun tuku nitlan xakxilhi. Nachuna nituku makgtayanan likgalhtawakgakan Biblia komo ni xatapaxuwan nalikgalhtawakgakan o ni tlawaputunkan tastakyaw nema wi. Pero komo akxni nalikgalhtawakgaya xTachuwin Dios chu namastaya talakaskin pi namakgtayayan akxni wi tuku tlawaya kmilatamat chu tuku lakpuwana, lu nalipaxuwaya.

2 Kalimaklakaskinti maktum nema lu tlan Biblia

◼ Kxatotonaco tlan nalaksakaw makgapitsi Biblias tatsokni xaGriego. Tlan nalikgalhtawakgaya nema nalakaskina pero komo lu xlikana lakaskina namakgtayayan liwana mililakgapasat makatunu Biblia. Makgapitsi lu tuwa kaʼakgatekgsnikan, xlakata limaklakaskinkan laktuwa tachuwin o nema nialh tamaklakaskin (Hechos 4:13). Makgapitsi lilakgpalikgonit tachuwin xalak Biblia kaj xlakata amakgapitsi tamasiy. Kalichuwinaw pulaktu nema tlawakgonit chuna la lichuwinaw kxmakni revista, lilakgpalikgonit xtukuwani Jehová kaj tachuwin «Dios» o «Puchina». Wa xlakata, lu xlakaskinka naputsayaw maktum Biblia nema chuna tatsokgnit la xapulana Biblia chu liwana kataʼakgatekgsli.

Lhuwa millones latamanin tiku lekgalhtawakgakgo Biblia kxlikalanka katiyatni akxilhkgo pi Traducción del Nuevo Mundo liwana taʼakgatekgsa chu chuna tatsokgnit la xtatsokgnit xTachuwin Dios.a Chatum chixku xalak Bulgaria, tiku makglhtinalh maktum Biblia Traducción del Nuevo Mundo akxni kilalh ktamakxtumit xlakan xtatayananin Jehová. Xla wa. «Lu lhuwata kata klikgalhtawakgama Biblia, nikxni a klekgalhtawakga maktum Biblia nema lu tlan taʼakgatekgsa chu asta chan knaku» o anima.

3 Katlawani oración Dios

◼ Akxni makgatunu nalikgalhtawakgaya Biblia naskiniya Dios kamakgtayan, tlakg naʼakgatekgsa tuku nalikgalhtawakgaya. Chuna tlawalh chatum tiku tsokgli Salmos, wanilh Jehová: «Akit klakgatsij, pero kamaliki kilakgastapu xlakata naklakawanan, y nakakxila la snun lan milimapakgsin» (Salmo 119:18). Akxni natlawaniyaw oración Dios, na tlan namaxkiyaw ntapaxtikatsin xlakata kinkamaxkin Biblia komo ni xkgalhiw ni xkatsiw xpalakata Dios (Salmo 119:62).

Pero ¿tuku likatsiyaw pi Dios kgaxmata kiʼoraciónkan? Kalichuwinaw chatiy laktsuman linatalan xalak Uruguay xchatiykan nila xakgatekgskgo tuku wan Daniel 2:44, wa xlakata skinikgolh Dios pi wi tiku xkamalakgachanilh chu xkamaʼakgatekgsli. ¿Tuku lalh? Akxni nina xmalakgachuwa xBiblia, chatiy xtatayananin Jehová lakgatlakgolh malakcha natalan kalikgalhtawakganilh ama texto nema ni xakgatekgskgo chu liwana kawanika tuku xwamputun: wa pi xTamapakgsin Dios natawila xlakgxokgo mapakgsinanin xala katiyatni.b Umakgolh laktsuman kanajlakgolh pi Dios kakgalhtilh xʼoraciónkan.

4 Chali chali kalikgalhtawakga

◼ Lhuwa latamanin kaj likgalhtawakgakgo Biblia akxni wi tuku nitlan kaʼakgspula. Chatum tiku pulalin niku tlawakan libros lichuwinalh pi akxni 11 xla septiembre kata 2001 akxni makgapitsi lakchixkuwin makgninankgolh xlakata namakgapekuanankgo uma «tlawalh pi lhuwa katastalh Biblias». Pero Dios kinkawaniyan pi chali chali kalikgalhtawakgaw xTachuwin: «Uma libro xla tamapakgsin chali chali nalikgalhtawakgaya kakuwani chu katsisni xapistsina, xlakata nakuentajtlawaya tuku anta tatsokgnit; xlakata chuna tlan nakitaxtuniyan kmilatamat chu xaskgalala tuku natlawaya» (Josué 1:8).

¿Tuku xlakata xlakaskinka chali chali nalikgalhtawakgayaw Biblia? Kawiliw akgtum liʼakxilhtit chatum chixku lakkaxwililh tuku tlan nawa chu tuku nitlan nawa xlakata xtachokgoputun xnaku. Komo kaj akxni naway tuku xliwat akxni namakgakatsi pi tachokgoputun xnaku ¿namakgtaya? Ni, ni katimakgtayalh, namakgtaya komo liwana nalaksaka tuku nawa chali chali. Nachuna xlakata, “tlan nakinkakitaxtuniyan chu liskgalala tuku natlawaw” xlakaskinka pi nalikgalhtawakgaw Biblia chali chali.

5 Tipalhuwa la kalikgalhtawakga

◼ Komo namatsukiya kGénesis asta Apocalipsis, tlan namakgtayayan pero na naputsaya atipatu la tlakg xatapaxuwan nalikgalhtawakgaya:

Tiku kalichuwinan Biblia. Kaputsa chu kalikgalhtawakga capítulos o libros xalak Biblia nema lichuwinan chatum xlakskujni Dios. Uma tuku tlan natlawaya:

• José: Génesis 37-50.

• Rut: Rut 1-3.

• Jesús: Mateo 1-28; Marcos 1-16; Lucas 1-24; Juan 1-21.c

Akgatunu temas. Kaputsa chu kalikgalhtawakga textos xalak Biblia nema watiya lichuwinan tuku katsiputuna. Akgtum liʼakxilhtit, kaputsa tuku masiya Biblia xlakata oración chu kalikgalhtawakga makgapitsi oraciones nema wi Biblia.d

Katakgaxmatli akxni nalikgalhtawakgaya. Biblia masiya pi akxni chuna tlawakan lu tlan kitaxtu (Apocalipsis [Revelación] 1:3). Asta tlan nalakkaxwilikan akgatunu familia nalikgalhtawakgakgo Biblia, chatunu chatunu tiku xalak familia nalikgalhtawakga akgtum o akglhuwa párrafos o natsuku chuwinan la akxni xchuwinan xlakata tiku talikgalhtawakgama. Atanu tuku natlan natlawakan wa akxni kgaxmatkan nema tagrabarlinit xalak Biblia. Chatum puskat wan: «Xlakata lu tuwa xakmakgkatsi naklikgalhtawakga Biblia, klakpuwa nakkagaxmata tuku tagrabarlinit. La uku Biblia tlakg lilakgatit kakxilha nixawa akgtum novela».

6 Kalilakapastakti

◼ Xlakata lhuwa tuku kilitlawatkan kkilatamatkan, lu tuwa makgkatsiyaw nalimaxtuyaw kilhtamaku xlakata liwana nalilakapastakaw tuku likgalhtawakgayaw kBiblia. Pero lilakapastakkan tuku likgalhtawakgaw lu xlakaskinka xlakata lu nakinkamakgtayayan. Tlan nawanaw pi lu xlakaskinka la akxni kinpokgokan liwana lakgswakga tuku wayaw. Chu akxni likgalhtawakgayaw Biblia, ¿la liwana kinkamakgtayan chuna la akxni liwana «lakgswakgayaw» tuku wayaw? Makglhuwa nalilakapastakaw chu natlawayaw takgalhskinin la umakgolh: «¿Tuku kimasiyani uma xlakata Jehová Dios? ¿La nakimakgtaya kkilatamat? ¿La nakkalimakgtaya amakgapitsin?»

Akxni nalilakapastakaw tuku lekgalhtawakgaw lu xlakaskinka xlakata tuku katsiw nachan kkinakujkan. Chuna akxni nalikgalhtawakgayaw Biblia lu nalipaxuwayaw la salmista tiku tiwa: «Akit snun klakgati tlawa tu wan milimapakgsin, wakg kilhtamaku wa klakapastakmaj» (Salmo 119:97). ¿Tuku xlakata lu xkatsiputun xlakata xTachuwin Dios uma salmista? Xlakata xlilakapastaka makgtayalh napaxki tuku xkatsinima kxTachuwin Dios.

7 Kakgalhskinti chatum tiku katsi xlakata Biblia

◼ Dios ni lakaskin kiʼakstukan nakgatekgsaw putum tuku likgalhtawakgayaw Biblia. Asta, Biblia wan pi makgapitsi tuku wi anta «laktuwa liʼakgatakgskan» ” (2 Pedro 3:16). ¿Niku tlan natekgsaw tamakgtay? Anta kHechos lichuwinan chatum xlakskujni mapakgsina xalak Etiopía tiku nila liwana xakgatekgsa tuku xwi kBiblia. Wa xlakata Dios malakgachanilh chatum xlakskujni xlakata liwana xmakgatekgsalh. Xlakata makgtayaka «lipaxuw taspitli kxkachikin» (Hechos 8:26-39, Hua Xasasti Talaccaxlan, 1999).

Komo akgatekgsputuna xTachuwin Dios, tlan namakgtayayan tiku katsi xlakata Biblia. ¿Tuku natlawaya? Nawaniya chatum xtatayana Jehová o nakatsokgnaniya tiku tlawakgo uma revistas xlakata tlan naskina tiku nalimakgalhtawakgayan Biblia chu ni naxokgoya (kpágina 4 natekgsa lista xla direcciones). Klakaskinaw pi uma pulaktujun tuku lichuwinaw namakgtayayan xlakata tlakg nalitamakgtayaya akxni nalikgalhtawakgaya Biblia.

[Notas nema wilakgo kpágina]