¿Pi wa tuku kalimalakgaxokge Dios?
«Lu nitlan klimakgkatsi tuku nitlan kaʼakgspulalh latamanin, pero klakpuwan pi wa tembatsu [xtamalakgaxokgen Dios].» Chuna wa chatum político xalak Japón akxni xtachikinita tiyat chu alistalh takutcha chuchut kpupunu chu masputunalh kxkachikin marzo kata 2011.
Akxni tachikilh tiyat chu nikgolh 220,000 latamanin kHaití enero kata 2010, chatum tiku lichuwinan Dios ktelevisión wa pi chuna kaʼakgspulalh xlakata «xtaskujmakgolh Akgskgawini» chu xtalakaskin «xtalakatsuwiniparakgolh Dios».
«Dios lakaskin tlan kalakapastaknamparaw», chuna wa chatum cura akxni nikgolh 79 latamanin tiku xtsalamakgolh, kManila (Filipinas). Chu akgtum periódico wa pi «21 por ciento tiku laklankata, kanajlakgo pi Dios limasiyama xtasitsi akxni tachiki tiyat, min lanka un, chu atanu tuku masputunan» xlakata makglhuwa chuna lay kxpaískan.
XLAKATA wankan pi Dios limin tuku nitlan chu kalimalakgaxokge tiku nitlan xtayat, ni aku tawi uma talakapastakni. Kata 1755 akxni aku xtachikinit tiyat, klhkunananit chu xkamakgninita 60,000 latamanin chuchut nema mincha kpupunu, anta kLisboa (Portugal), filósofo Voltaire kgalhskininalh: «¿Lisboa nema nialhtu wi, pi lu xlismanikgonit tuku nitlan nixawa Londres chu París niku tlakg lixkajni likatsikan?». Wa xlakata millones tiku kakgalhskinkan komo Dios kamalakgaxokgema akxni makamin tuku masputunan. Klakalhuwa países wankgo pi uma tuku nitlan «wa Dios tiku chuna tlawa».
Wa xlakata akstu kakinkakgalhskinkan: «¿Limaklakaskima Dios tuku masputunan xlakata limalakgaxokgenama? Wantuku nina makgas masputunalh, ¿wa kalimalakgaxokgema Dios?».
Wi tiku lakapala lakpuwankgo pi wa Dios xkuenta. Xlakata wankgo pi kBiblia wan pi Dios limaklakaskilh chuchut o atanu xlakata limasputunalh (Génesis 7:17-22; 18:20; 19:24, 25; Números 16:31-35). Pero akxni liwana likgalhtawakgayaw akxilhaw pulaktutu tuku xlakata chuna tlawalh Dios. Pulana, Dios kamakatsinilh pulana tuku xʼama tlawa. Xlipulaktiy, ni xtachuna akxni min tuku masputunan kamakgni tiku tlan likatsikgo chu tiku nitlan likatsikgo, pero Dios ni chuna tlawa. Kajwa nikgolh tiku ni makgxtakgkgolh nitlan xtayatkan chu ni kgalhakgaxmatkgolh Dios. Xlipulaktutu, akxni Dios xmasputunan xtlawa pi tiku tlan xlikatsikgo xlakgtaxtukgolh (Génesis 7:1, 23; 19:15-17; Números 16:23-27).
Ni tuku kinkalimasiyaniyan pi wa Dios tiku makaminit lhuwa tuku kalimasputu millones latamanin la uku. Pero ¿tuku xlakata lhuwa anama tuku masputunama? ¿Tuku natlawayaw akxni chuna lay? ¿Namin kilhtamaku akxni nialh katianalh? Natekgsa xtakgalhtin kʼartículos nema aku mima.