¿Tuku natlawayaw akxni wi tuku masputunan?
Xlakata lu lhuwa anama tuku masputunan, kaʼakxilhwi tuku tlan natlawayaw akxni chuna nala.
Alakatanu naʼankan. Biblia wan: «Xaskgalala wantiku tatsekga akxni akxilha pi naʼakgspula tuku nitlan, pero tiku kaj xatonto chuntiya ni tachokgokgo chu alistalh lipatinankgo» (Proverbios 22:3). Uma lu tlan tastakyaw nema tlan nakgalhakgaxmatkan akxni wi tuku masputunan. Komo namakatsininankan pi napankga volcán, namin xalipekua un chu sen, o talakgatumi chuchut, wantiku wilakgolh niku lakatsu niku chan tuku masputunan tlakg tlan komo naʼankgo niku nitu nalanikgo. Latamat tlakg kxtapalh nixawa tuku kgalhikan.
Makgapitsi latamanin max wata tlakg tlan natawilakgo niku ni chan tuku masputunan. Tiku akxilhkgo xlakata uma, wankgo: «Xliputum kKatiyatni kaj ni kalanka chu ni lakalhuwa niku min tuku masputunan. Anta niku tlakg lakapala min tuku masputunan ni lakalhuwa chu anta naminkgo tuku tlakg xalipekua tuku namasputunan». Uma tuku lichuwinaw chuna la niku kaxtum chu titaxtu chuchut o niku ni lu tlan wi tiyat. Komo wix tlan napina tatawilaya mi familia niku ni kalipekua, max nitu katikaʼakgspulan komo wi tuku namasputunan.
Lakkaxwilikan tuku natlawakan. Maski lhuwa tuku nalakkaxwiliyaw, max chuntiya wi tuku nakinkaʼakgspulayan. Pero tlakg nakatsiya tuku natlawaya komo pulana nalakkaxwiliya tuku natlawaya akxni tuku masputunan. Tuku wan Proverbios 22:3, nawa kilhchanima nema pulanaja akxilhwi. ¿Lakkaxwilinitata tuku natlawaya? Manual 1-2-3 of Disaster Education (Lakkaxwilikan tuku tlawakan akxni min tuku masputunan) wan pi kamakan nakgalhiyaw akgtum botiquín xla primeros auxilios, chuchut, chu tuku nawakan nema ni talakgalhi chu kapsnat nema tlakg xlakaskinka. Na tlan nawanikan familia tuku masputunan nema max nakalakgchin chu tuku natlawakgo.
Lu tlan natalalinkan Dios. Tlan talalinkan Dios lu tlan tamakgtay maski tuwa tuku natitaxtuyaw. Biblia wan pi Dios «xmakilhtsukina talakgalhaman, chu xmastana xlipaks ntakgtsiyajni, wanti nkinkamakgtsiyajan lantla xlipaks kkintalakgaputsitkan». Chu atanu versículo wan pi «[...]makgtsiyajkgoy nti ntatlajikgoy» (2 Corintios 1:3, 4; 7:6).
Chuna, lu skgalalh wi xlakata nakamakgtaya tiku lipawankgo. Xlakata Dios paxkinan, pulaklhuwa la kinkamakgtayayan (1 Juan 4:8). Akgtum lu tlan tamakgtay wa oración. Ni katiskiniw Jehová katlawalh milagros, pero naskiniyaw xʼespíritu santo, xla tlan nakinkamalakapastakayan textos xalak Biblia nema tlan nakinkamamakgkatsiniyan akxni titaxtumaw tuku nitlan. Xlakskujnin Dios max namakgkatsiyaw la David, mapakgsina xalak Israel tiku tiwa: «Maski naktitaxtu lakatsu nak linin, [...] ni kama jikuan [o pekuan], porque wix kintalapulaya, milixtokgo nima chipatilhaya [tlan kimamakgkatsini]» (Salmo 23:4).
Xtamakgtay kinatalankan. Kxapulana siglo, palakachuwina Ágabo wa, «naʼanan lhuwa tlanka tatsinkstat lantla xlikatlanka nkatuxawat». Uma tatsinkstat «ntiʼanalh akxni xmapaksinan nClaudio», lu lhuwa kamapatinilh kstalaninanin Cristo xalak Judea. ¿Tuku tlawakgolh natalan xalak alakatanu akxni katsikgolh tuku xtitaxtumakgolh? Biblia wan: «Litachuwinilikgolh mpi wa lantla namakalay nchatunu, nalimakgtayakgoy namalakgachananikgokan natalanin nti xwilakgo kJudea» (Hechos 11:28, 29). Chuna la akxilhaw xlakata xkapaxkikgo, malakgachanikgolh tamakgtay.
Nachuna la uku, xlakskujnin Dios lamakgtayakgo akxni min tuku masputunan. Xtatayananin Jehová kalilakgapaskan xlakata lamakgtayakgo, akxni lu lhuwa tachikilh tiyat anta kChile 27 xla febrero kata 2010, tunkun kamakgtayaka tiku wi tuku xkaʼakgspulanit. Karla tiku mamuxtika xchik akxni takutcha chuchut kpupunu uma tuku wa: «Lu tlan klimakgkatsilh akxni lichaliku kaniwa xalanin minkgolh xtatayananin Jehová xlakata nakinkamakgtayakgoyan. Jehová limaklakaskilh ama natalan xlakata tlan nakinkamamakgkatsiniyan. Lu kmakgkatsilh pi xkimpaxki chu xkinkuentajtlawama Jehová». Xtata Karla tiku ni xtatayana Jehová uma tuku wa akxni chuna akxilhli. «Kakxilhnit pi ni chuna tlawakgo kkintakanajla». Wa tuku akxilhli malakpuwanilh nawanikgo xTatayananin Jehová pi xlimasiyanikgolh Biblia xlakata Dios.
Akxni titaxtumaka tuku lu tuwa lu makgtayanan akxni kinkatatawilayan tiku paxkikgo Dios.
[Dibujo xla página 6]
¿Lakkaxwilinitata tuku natlawaya akxni min tuku masputunan?
[Dibujo xla página 7]
Oración makgtayanan putum kilhtamaku. Ni katiskiniw Jehová katlawalh milagros, pero naskiniyaw xʼespíritu santo
[Dibujo xla página 7]
Kstalaninanin Cristo lamakgtayakgo akxni min tuku masputunan
[Dibujo xla página 7]
«Lu kmakgkatsilh pi xkimpaxki chu xkinkuentajtlawama Jehová»