¿Tuku xwan Jesús xlakata política?
EVANGELIOS lichuwinankgo xlatamat Jesús chu kinkamasiyaniyan tuku xlakpuwan xlakata política. Akgtum liʼakxilhtit, akxni xkgalhi 30 kata chu aku xtamununit, Akgskgawini wanilh pi tlan xwa xmapakgsinakan latamanin. Alistalh makgapitsi latamanin mapakgsina tlawaputunkgolh. Chu na xlakaskinkgo pi xmakgtanulh política. ¿Tuku tlawalh Jesús akxni chuna titaxtulh?
Xmapakgsina latamanin. Chuna la wankgo evangelios, Akgskgawini wanilh Jesús pi tlan xmapakgsinalh «xlipaks xtamapakgsin kkatiyatna». ¿Akxilha tuku tlan xtitlawalh Jesús xpalakata latamanin komo xtimatlanilh uma? ¿Ni xtimakglhtinalh uma komo xtilakpuwa pi política tlan xkamakgtayalh latamanin? Pero Jesús ni makgamakglhtinalh uma (Mateo 4:8-11).
Mapakgsina. Kxkilhtamaku Jesús, lhuwa latamanin xputsakgo tiku tlan xlakkaxtlawalh taʼakglhuwit nema xkgalhikgo latamanin chu xkgalhikgolh tumin. Xlakata xʼakxilhkgonit tuku Jesús tlan xtlawa, xlakaskinkgo pi xmakgtanulh política. ¿Tuku tlawalh? Juan tsokgli: «Cha nchu mpi tikatsilh Jesús nalakgminkgoy, nachipakgoy, xreykan xtlawaputunkgoy, titapanupa amakgtum, tialh nkakiwin» (Juan 6:10-15). Amakgtum ni makgtanulh política.
Tiku makgtanu política. Nachuna lalh akxni nialh lhuwa kilhtamaku xtsankga xlakata xnilh Jesús. Makgapitsi tiku kstalanikgo fariseos chu tiku xtapakgsinikgo herodianos tachuwinankgolh Jesús. Xapulana ni xtapakgsiniputunkgo Roma, chu xlipulaktiy kaj nitu xwankgo maski atanu kachikin xkamapakgsi. Fuerza xtlawaputunkgo pi xmakgtanulh akgtum partido chu kgalhskinkgolh komo xlilat judíos naxokgonikgo impuestos Roma.
Marcos wa la kgalhtinalh Cristo: «“¿Tuwan nkinkgalhputsayatit? Kakilitanitit ntumin, lakimpi nakukxilha”. Pus chi tiliminikgolh. Tsukulh wanikgoy: “¿Ti xlakapun yuma, chu yuma xtukuwini ntalhkanit?” Kgalhtinankgolh xlakan: “Wa xla César”. Cha nchu nkgalhtinalh Jesús, wanikgolh: “Pus wa César nkamaxkitit wa ntu xla César; chi nchu wa ntu xla Dios, wa Dios nkamaxkitit”» (Marcos 12:13-17). Xlakata tuku wa Jesús, libro Teología Moral wan: «Xla xlikana Mesías xwanit, pero ni wa tiku [judíos] xlakpuwankgo. [...] Jesús masiya tuku ni tatalakxtumi takanajla chu política».
¿Ni xakxilha Cristo tiku nitu xkgalhikgo, tiku ni xtlawakgo tuku xaʼakgstitum chu tiku xpatinamakgo? Biblia wan pi nitlan xlimakgkatsi akxni xakxilha pi nitlan xwilakgo latamanin (Marcos 6:33, 34). Maski chuna ni masputulh putum tuku nitlan xtatlawama kakilhtamaku, maski makglhuwa skinika pi xmakgtanulh política kxkilhtamaku.
Uma akgtutu liʼakxilhtit masiya pi Jesús nikxni makgtanulh kpolítica. ¿Chu kstalaninanin Cristo xala uku? ¿La xliʼakxilhatkan política?