Biblia kalakgpalinilh xlatamatkan
¿TUKU tlakg xlakaskinka akxilhli chatum empresario escocés nixawa xtaskujut? ¿La tlawalh chatum chixku xalak Brasil xlakata namakgxtakga talakgxtumit xalimaxana chu cocaína? ¿Tuku makgtayalh chatum kgawasa xalak Eslovenia namakgxtakga kuchu? Kamastaw talakaskin pi xlakan nakinkawanikgoyan.
«Kilatamat lu tlan xtasiya» (JOHN RICKETTS)
KATA AKXNI LAKACHILH: 1958
PAÍS: ESCOCIA (REINO UNIDO)
ATANU: CHATUM EMPRESARIO TIKU TLAN XKITAXTUNIMA
LA XAKLAMA: Akxni aktsujku xakwanit nitu xaklilakgaputsa xlakata xakkgalhiyaw tumin. Kintlat soldado británico xwanit, wa xlakata kifamilia chu akit ankgalhin tanu tanu kachikin xakkanaw latamayaw. Kkilatamaw kʼEscocia, Inglaterra, Alemania, Kenia, Malasia, Irlanda chu kChipre. Akxni xakkgalhi akgtsayan kata tanu tanu kachikinin xla Escocia kgalhtawakgalh, chu alistalh kmasputulh Universidad xla Cambridge.
Akxni kmakgatsilh akgpuxam kata, kmatsukilh taskujut nema makgapalalh akgtsayan kata kʼindustria petrolera. Pulana kskujli kʼAmérica del Sur, alistalh kʼÁfrica, chu awatiya, kʼAustralia Occidental, niku kwililh akgtum empresa chu alistalh kstalh.
Xlakata lhuwa ktlajalh nialh kskujli akxni kmakgatsilh tipuxam kata. ¿Tuku xakama tlawa xlakata xakkgalhi lhuwa kilhtamaku? Ktsukulh kpaxialhnan. Makgtiy lakgatum kpaxialhnalh kʼAustralia kkimotocicleta chu xtasiya pi kilatamat tlan xkitaxtuma.
BIBLIA LAKGPALILH KILATAMAT: Akxni xakskujmaku, xakmakgkatsi pi xakpaxtikatsinilh Dios xlakata latamat nema xaklin. Wa xlakata ktsukulh kkan kʼIglesia Anglicana, niku xkimakgastakkanit, pero ni lu xmasiyakan xlakata Biblia. Alistalh kkatakgalhtawakgalh mormones, pero nitlan klimakgkatsilh xlakata ni xlakaskinka xliʼakxilhkgo Biblia.
Akgtum kilhtamaku, xtatayananin Jehová kilakgapaxialhnankgolh. Tunkun kaʼakxilhli pi tuku xkanajlakgo anta xtakilhtiyanit kxtachuwin Dios. Akgtum texto nema kimasiyanikgolh wa 1 Timoteo 2:3, 4, niku wan pi Dios lakaskin «pi putum latamanin liwana kalakgapaskgolh xaxlikana chu kalakgtaxtukgolh». Kaks klilakawa pi xtatayananin Jehová ni kajwatiya xlakaskinka akxilhkgo nakatsikgo tuku wan Biblia, wata nachuna pi xa’akgstitum nawan.
Akxni kkatalikgalhtawakgalh Biblia, tlan kkatsinilh tuku xaxlikana. Chu atanu, lu klipaxuwalh akxni kkatsilh pi Dios chu Jesús ni lakxtum chu ni makgtapakgsikgo kʼakgtum trinidad (Juan 14:28; 1 Corintios 11:3). Klakapastakli pi lhuwa kilhtamaku kimakglhtilh xlakata nakkatsini ama xatuwa doctrina. ¡Pero tuku xaxlikana ni tuwa xwanit!
Titaxtulh kilhtamaku tsukulh kkan ktamakxtumit xla xtatayananin Jehová. Kaks klilakawa la tlan xlikatsikgo chu xalaktlan tastakyaw. Amakgolh latamanin xtachuna la xasantos kaʼakxilhli. Tapaxkit nema xlamasiyanikgo kimasiyanilh pi xkgalhikgo xaxlikana takanajla (Juan 13:35).
TUKU TLAN KINKITAXTUNINIT: Akxni xaktamununita klakgapasli Diane, chatum stlan puskat tiku xmakgastakkanit la xtatayana Jehová. Tuku klakgatilh wa la laktlan xtayat xkgalhi, wa xlakata titaxtulh kilhtamaku ktamakgaxtokgwi. Chuna la xaktalalin chu xtamakgtay litaxtulh la akgtum xtasikulunalin Jehová.
Lu xakkamputunaw niku tlakg xtamaklakaskin tamakgtay xlakata nalichuwinankan xtachuwin Dios, wa xlakata kata 2010 kaw klatamayaw kBelice, xalak Centro America. Unu kalitachuwinanaw Dios latamanin chu xlakan tlakg katsiputunkgo xlakata xla.
Xlakata la uku kkatsi tuku xaxlikana xlakata Dios chu Biblia, kmakgkatsi pi kkgalhi takaksni. Xlakata putum kilhtamaku klichuwinan Dios, klipaxuwa pi lhuwa kkamakgtayanit nalakgapaskgo xTachuwin Dios. Ni anan atanu tuku tlakg nalipaxuwaya chuna la naʼakxilha pi Biblia kalakgpalini xlatamat latamanin chuna la lakgpalilh kilatamat. Kkatsilh la tlan naklimasiyani tapaxtikatsinit Jehová xlakata kilatamat.
«Lu tlan kilikatsinikgolh» (MAURÍCIO ARAÚJO)
KATA AKXNI LAKACHILH: 1967
PAÍS: BRASIL
ATANU: XTLAWA TALAKGXTUMIT NEMA NI XLITATLAWAT
LA XAKLAMA: Klakachilh kʼAvaré, aktsu kachikin xalak São Paulo niku lhuwa latamanin liskujkgo tlawakgo chiki.
Kintlat nilh akxni nina xaklakachin. Akxni aktsujku xakwanit xakwili xlhakgat kintse akxni xla ni xwi. Tsukulh tatsuwi la chatum puskat, chu latamanin wankgo pi xaklakgati kintachixku. Titaxtulh kilhtamaku ktsukulh katakgalhi talakgxtumit xalimaxana amakgapitsin lakgkgawasan, chu asta lakchixkuwin.
Akxni aku kgawasaku xakwanit ankgalhin xakan clubes nocturnos, niku stakan kuchu, chu asta kpusikulan xlakata nakkaputsa lakchixkuwin chu lakpuskatin tiku nakkatatalakgxtumi. Akxni xtlawakan carnavales, xakwili lhakgat xla lakpuskatin chu xaktantli kdesfiles xla escuela de samba. Lu tlan xkinkitaxtunima.
Tiku xakkatalalin x’anankgo tiku xlakgatikgo xtachixkukan, tiku kstakgo xmaknikan chu tiku xwakgo droga. Makgapitsi xkiwanikgo pi xakxkulilh crack (cocaina en piedra), chu lakapala klismanilh. Lakgachunin tantaskaka xakkataxkuli; chu lakgachunin tantaku xakxkuli. Lu nitlan xaktasiya pi asta makgapitsi xwankgo pi xakkgalhi sida.
BIBLIA LAKGPALILH KILATAMAT: Wa ama kilhtamaku akxni kkalakgapasli xtatayananin Jehová. Xlakan lu tlan kilikatsinikgolh. Kilikgalhtawakganikgolh tuku wan Romanos 10:13, anta wan pi «putum tiku namapakuwi xtukuwani Jehová nalakgtaxtu». Kʼakgatekgsli pi lu xlakaskinka nalimaklakaskinkan xtukuwani Dios. Lakgachunin, akxni xakxkulinit crack tantaskaka, xakmalaki kiventana xlakata xaklakalh kʼakgapun chu xaktasaskini Jehová pi xkimakgatayalh.
Kakxilhli pi kintse lu xlilakgaputsa chuna la xaklin kilatamat, wa xlakata kmakgxtakgli drogas. Alistalh ktsukulh katakgalhtawakga Biblia xtatayananin Jehová. Xlakan kiwanikgolh pi takgalhtawakga xʼama kimakgtaya xlakata la xaklin kilatamat, chu chuna lalh.
Chuna la xakkatsinitilha tuku masiya Biblia, kʼakgatekgsli pi xtalakaskin xaklakgpalilh kilatamat. Lu tuwa kmakgkatsilh nialh naklakgati kintachixku, xlakata chuna xaklismaninit lata aktsujku xakwanit. Tuku lu xtalakaskin pi xaklakgpalilh wa tiku xakkatalalin chu nialh kalh niku stakan kuchu chu clubes nocturnos.
Maski tuwa kmakgkatsilh nakmakgxtakga putum uma, tlan xaklimakgkatsi xaklilakpuwan pi Jehová xkililakgaputsa chu xlakaskinka xʼakxilha tuku xaktlawama (1 Juan 3:19, 20). Kata 2002 xakmakgxtakgnit putum talakgxtumit xalimaxana chu tlan ktamunulh la xtatayana Jehová.
TUKU TLAN KINKITAXTUNINIT: Kintse kaks lilakawa xlakata talakgpalit nema ktlawalh chu xla na tsukulh likgalhtawakga Biblia. Lu nitlan pero kgalhilh akgtum derrame cerebral. Maski chuna, kintse chuntiya matliwakglhtilhama xtapaxkit nema kgalhini Jehová chu xTachuwin.
Akgtsayan kata lata kkamasiyanima latamanin tuku xlikana masiya Biblia. Maski lakgachunin chuntiya ktalatlawa nixatlan talakapastakni, tlan kimamakgkatsini pi komo ni naktlawa, nakmakgapaxuwa Jehová.
La ktalaksuwininit Dios chu naklin kilatamat chuna la lakgati tlawanit pi tlakg kiʼakstu nakimaxkikan kakni. Uku tlan nakwan pi lu kpaxuwa.
«Ni xaklikgalhkgasa kuchu» (LUKA ŠUC)
KATA AKXNI LAKACHILH: 1975
PAÍS: ESLOVENIA
ATANU: XMALAKATSALI LA XWA KUCHU
LA XAKLAMA: Klakachilh k’Liubliana, capital xla Eslovenia. Lu tlan la xakstakma, asta akxni kintlat xʼakstu makgnika, akxni akit xakkgalhi akgtati kata. Xlakata uma tuku nitlan lalh kintse lhuwa tsukulh kskuja xlakata nakinkamaxkiyan tuku xakmaklakaskinaw kintala chu akit.
Akxni xakkgalhi 15 kata kalh ktawila xchik kinana o kintsiyuna. Lu xaklakgati latama anta xlakata lhuwa ki’amigos anta lakatsu xwilakgolh chu tlan xaktlawa tuku akit xaktlawaputun nixawa akxni xaktawi kintse. Akxni xakkgalhi 16 kata ki’amigos litaxtukgolh tiku lu xlakgatikgo wakgo kuchu xlisputni semana. Nialh kchukulh kinchixit, lixkajni ktsukulh klhakganan chu alistalh ktsukulh kxkuli.
Kkgalhwanalh tipalhuwa drogas, pero tuku tlakg xaklakgati wa kuchu. Ni lhuwa kilhtamaku titaxtulh nialh kaj tsinu xakwa vino wata xakkwakgo patum botella. Xakkatsininit naktasiya pi ni xakkgachi. Lakgachunin kaj xkatsikan pi xakwanit kuchu xlakata xaklikinkala, chu maski chuna max ni xkatsikan pi xakwanit lhuwa litro xla vino o cerveza nema xtalakgtlawakan vodka.
Makglhuwa akit xakkamakgtaya ki’amigos xlakata tlan xtlawankgolh akxni xakkitaspitaw kdiscoteca kkatsisni, maski akit tlakg lhuwa xakwanit kuchu. Makgtum kkgaxmatnilh chatum ki’amigo pi xwanima achatum pi akit ni xaklikgalhkgasa kuchu. Uma tuku wankgolh lu nitlan kimamakgkatsinilh xlakata k’Eslovenia chuna kawanikan tiku lu malakatsalikgo la wakgo kuchu.
Uma tlawalh pi xaklilakpuwa la xaklima kilatamat. Ktsukulh klakpuwan pi nitu xaklitaxtu. Ni xkimakgapaxuwa tuku xaktlawa.
BIBLIA LAKGPALILH KILATAMAT: Uma kilhtamaku kakxilhli pi chatum tiku xakta’an k’escuela xlakgpalinit xtayat, chu tlakg tlan xlikatsi. Xakkatsiputun tuku xtlawa, wa xlakata kwanilh pi xakkaw wayaw kape xlakata xakkgalhchuwinaw. Kiwanilh pi xtsukunit katakgalhtawakga Biblia xtatayananin Jehová. Na kiwanilh makgapitsi tuku xkatsinima. Xlakata akit ni lu xakkatsi xlakata takanajla tuku kiwanilh xasasti xwanit. Ktsukulh kkan kxtamakxtumitkan xtatayananin Jehová chu ktsukulh katakgalhtawakga Biblia.
Chuna kkatsilh tuku xaxlikana nema lu makgpuwantininan. Akgtum li’akxilhtit, kkatsinilh pi lamaw kilhtamaku nema Biblia wani “xaʼawatiya kilhtamaku” chu pi nialh makgas Dios namalakgsputu latamanin tiku lixkajni likatsikgo, pero tiku tlan likatsikgo nakamaxki talakaskin nalatamakgo kKatiyatni akxni akgtum paraíso nawan (2 Timoteo 3:1-5; Salmo 37:29). Wa xlakata klakgpaliputulh kilatamat xlakata nakkatatawila umakgolh latamanin tiku tlan likatsikgo.
Akxni kkawanilh ki’amigos tuku xakkatsinima, lhuwa kilikgalhkgamanankgolh. Uma kimakgtayalh nakkatsi pi nitlan amigos xwankgonit. Nachuna k’akgatekgsli pi xaktsukunit wa kuchu xlakata kkatalalilh nixatlan amigos. Kajwatiya xkgalhkgalhikgo xlisputni semana xlakata xwaparakgolh kuchu.
Klakkaxwililh pi nialh xakkama katalalin chu kputsalh amigos tiku xtatayananin Jehová. Xlakan ni kaj xkimakgpuwantinikgo, wata lu xpaxkikgo Jehová chu xliskujkgo nalilatamakgo xtastakyaw. Lu kimakgtayalh xlakata la xakkatalalin chu wa xlakata tlan kmakgxtakgli kuchu.
TUKU TLAN KINKITAXTUNINIT: Kpaxtikatsini Jehová xlakata nialh kmaklakaskin kuchu xlakata nakpaxuwa. Ni katsi tuku xkinti’akgspulalh komo ni xaktilakgpalilh kilatamat. Tuku liwana kkatsi wa pi la uku tlakg tlan kmakgkatsi.
Lanka talakgalhaman kli’akxilha pi akgtujun kata lata kskujma ksucursal xla xtatayananin Jehová k’Eslovenia. Chuna la klakgapasli Jehová chu kskujnanima makgapaxuwanit kilatamat.