Biblia kalakgpalinilh xlatamatkan

«Akglhuwa kata klilakpuwa tuku xlakata lamaw» (ROSALIND JOHN)

• KATA AKXNI LAKACHILH: 1963

• PAÍS: GRAN BRETAÑA

• ATANU: MAKGXTAKGLI AKGTUM LU XATLAN TASKUJUT

LA XAKLAMA:

Klakachilh Croydon ksur xla Londres. Kinatlatni xlakachinkgonit kʼisla caribeña xla San Vicente. Akit xlikgalhchaxan xaklitaxtu lata kgalhnajatsa kamanan xakkuanitaw. Maski kintse xtapakgsi kʼIglesia Metodista, akit ni xaklakgati takanajla. Lata aktsujku xakwanit putum xakkatsiputun. Akxni xakkgalhi vacaciones ankgalhin xaklikgalhtawakga libros nema xakskin kbiblioteca kxkilhtun chuchut.

Akxni xakmasputunita kintakgalhtawakga, klakpuwa nakkamakgtaya tiku xmaklakaskinkgo tamakgtay. Pulana ktsukulh kamakgtaya tiku ni xkgalhikgo xchikkan, tiku xtatatlakgo chu tiku ni lakapala xkatsinikgo tuku xkamasiyanikan. Chu alistalh kmatsukilh akgtum curso universitario de ciencias de la salud. Kaks klilakawa xlakata lu tlan kinkitaxtunilh akxni kmasputulh. Lu laktlan taskujut kkgalhilh, lhuwa xkixokgonikan chu uma xkimaxki talakaskin xakkgalhilh tuku akit xaklakaskin. Ktsukulh kskuja la investigadora social chu xakpulalin xlakaskinka taskujut. Kajwatiya xakmaklakaskin akgtum computadora chu Internet xlakata xakmakgantaxtilh kintaskujut. Ankgalhin xakan kʼatanu país chu xaktamakgxtakga khoteles nema tlakg xaklakgati, xakan kgimnasio, niku xtlawakan masajes, ksalon de belleza chu xaklipaxuwa tuku xʼanan. Xaklakpuwan pi xakkgalhi putum tuku xakmaklakaskin xlakata xaklipaxuwalh latamat. Maski chuna, ankgalhin xakkalilakgaputsa tiku nitu xkgalhikgo.

BIBLIA LAKGPALILH KILATAMAT:

Akglhuwa kata klilakpuwa tuku xlakata unu wilaw chu tuku xlakata lamaw. Pero nikxni klakputsananilh Biblia. Kkata 1999 kilakgapaxialhnankgolh kintala Margaret chu chatum xʼamiga. Xchatiykan xtatayananin Jehová xlitaxtukgo. Xʼamiga kintala lu tlan kilikatsinilh, wa xlakata kmakgamakglhtinalh akgtum takgalhtawakga xalak Biblia. Pero kintaskujut chu la xaklin kilatamat lhuwa kilhtamaku xkimakglhtikgo, wa xlakata nila lakapala xakmatliwakglha kintakanajla.

Kkata 2002 kalh klatama ksur Inglaterra, xlakata xakmasputuputun akgtum investigación social nema xaktlawama xlakata tlan xakkgalhilh Doctorado. Anta kinkgawasa chu akit tlakg ktsukuw anaw ktamakxtumit xla xtatayananin Jehová. Maski xakkgalhtawakganit kʼuniversidad, nikxni liwana xaklilakpuwanit taʼakglhuwit xla latamat chu la tlan xlakkaxlalh asta akxni ktsukulh klikgalhtawakga Biblia. Tuku wan Mateo 6:24 namalakilh kilakgastapu. Nila skujnanikan chatiy malana: kililaksakat xwanit komo xakskujnaniputun Dios o lhuwa tumin xakkgalhiputun. Tuku xakama laksaka xʼama litasiya tuku xaktlawalh kkilatamat.

Kata nema titaxtulh makglhuwa kkilalh ktamakxtumit kchik xtatayananin Jehová, niku xlikgalhtawakgamaka libro ¿Existe un Creador que se interese por nosotros?a Uma tlawalh pi xaklakapastakli pi kajwatiya kiMalakatsukinakan Jehová tlan nalakkaxtlawa xtakglhuwitkan putum latamanin. Pero k’universidad xmasiyakan pi ni xtalakaskin xkanajlaw pi anan chatum Malakatsukina xlakata nalipaxuwayaw latamat. Uma lu klisitsilh. Maski kajku akgtiy papa’ xakkgalhtawakganit k’universidad, kmakgxtakgli chu ktsukulh klimaklakaskin kinkilhtamaku xlakata tlakg xaklakgapasli Dios.

Tuku kimakgtayalh naklakgpali kilatamat wa tuku wan Proverbios 3:5, 6: «Kalipawanti Jehová xliputum minaku, chu ni wa mintalakapastakni kalipawanti. Xliputum mintiji kuentajkatlawani, chu xla namatsaja mintiji». Ni anan taskujut, tumin o nalakgapaskana nema natatalakxtumi tlakg nalakgapasa xapaxkina kiDioskan. Akxni tlakg xakkatsini tuku lakpuwanit Dios natlawa xpalakata Katiyatni chu la Jesús mastalh xlatamat kimpalakatakan, tlakg xakmakamaxkiputun kilatamat Dios. Ktamunulh la xtatayana Jehová abril kata 2003. Lata ama kilhtamaku ni lhuwa tuku kgalhiputun kkilatamat.

TUKU TLAN KINKITAXTUNINIT:

La ktalalin Dios nitu anan tuku xtachuna. Xlakata uku klakgapasa, kkgalhi xaxlikana takaksni chu tapaxuwan. Nachuna lu klipaxuwa akxni makxtum katatawila tiku na skujnanikgo.

Chuna la klikgalhtawakga Biblia chu tamakxtumit chuntiya kimakgtayama lhuwa tuku nakkatsini. Nachuna lu klakgati kalitachuwinan tuku kkanajla amakgapitsin. Wa xlakata lata junio kata 2008 klichuwinan Dios putum kilhtamaku. Chuna kkamakgtaya latamanin xlakata nakgalhikgo tlakg xatlan latamat chu tlan nalatamakgo putum kilhtamaku kxasasti pulataman. Nikxni xakkgalhinit lhuwa tapaxuwan chu ni xakmakgkatsinit pi xaktlawama tuku tlan. Lu kpaxtikatsini Dios, xlakata la uku liwana kkatsi tuku xlakata klama.

«Xlinin ki’amigo lu nitlan kimamakgkatsinilh» (ROMAN IRNESBERGER)

• KATA AKXNI LAKACHILH: 1973

• PAÍS: AUSTRIA

• ATANU:LU XLAKAGATI TAKGAMAN XLAKATA TUMIN

LA XAKLAMA:

Klakachilh akgtum familia tiku católicos xwankgonit kʼakgtum aktsu kachikin nema xtapakgsi Braunau (Austria). Uma kachikin xʼanan tumin chu ni lu xʼanan tiku xtlawalh tuku nitlan.

Akgtum kilhtamaku xla kata 1984, akxni xakkgalhi 11 kata lalh tuku lakgpalilh kilatamat. Chatum tlakg xatlan kiʼamigo tiku nina makgas xaktakgamanama fútbol, nilh xlakata titiyalh putlaw. Xlinin kiʼamigo lu nitlan kimamakgkatsinilh lhuwa kata. Ankgalhin xkinkgalhskinkan tuku kinkaʼakgspulayan akxni niyaw.

Akxni kmakgxtakgli escuela ktsukulh kskuja la electricista. Ni makgas kilhtamaku titaxtulh ktsukulh klakgati takgaman xlakata tumin. Maski lhuwa tumin xakmakgamani, nitu xkintsankgani. Na lhuwa kilhtamaku xaklimaxtu xlakata nakkgamanan chu nakkgaxmata música xla heavy metal chu punk. Xaklin kilatamat xalimaxana chu ankgalhin xakan kdiscoteca chu niku xtlawakan paskua. Xaktlawa putum tuku xaklakgati pero, ni xakpaxuwa.

BIBLIA LAKGPALILH KILATAMAT:

Kkata 1995, chatum xtatayana Jehová tiku xlina kata lakgatlakgkgolh kimalakcha chu kimaxkilh maktum libro nema xtakilhtiyanit kBiblia chu uma xkgalhti kintakgalhskinin «¿Tuku la akxni nikan?». Kmakglhtinalh xlakata xaklilakpuwanku la nilh kiʼamigo. Ni kajwatiya klikgalhtawakgalh capítulo nema xkgalhti kintakgalhskinin, wata na klikgalhtawakgalh putum libro.

Lhuwa tuku kkatsinilh chu ni kajwatiya xlakata linin. Xlakata kimakgastakka la católico akit lu xakkanajlani Jesucristo. Pero akxni ktsukulh klikgalhtawakga Biblia, na tlan ktsukulh ktalalin xTlat Jesús, Jehová Dios. Lu klipaxuwalh akxni kkatsilh pi Dios ni katamakgatlini xlakskujnin. Wata putum katalakatsuwini tiku putsakgo (Mateo 7: 7-11). Nakkatsinilh pi Dios na makgkatsi la akinin chu pi ankgalhin makgantaxti tuku wan. Uma kimakgpuwantinilh nakkatsiputun la kgantaxtunit tuku lichuwinan Biblia. Tuku kkatsinilh matliwakglhi kintakanajla.

Lakapala kkatsilh pi xtatayananin Jehová wa tiku liskujkgo xlakata nakamakgtayakgo latamanin naʼakgatekgskgo tuku masiya Biblia. Xaktsokgwili putum textos nema xlimin likgalhtawakga chu alistalh xakputsa kiBiblia católica. Akxni tlakg xaklakputsanan tlakg xakkatsi pi xaktekgsnit xaxlikana takanajla.

Anta kBiblia na kkatsilh pi Jehová lakaskin pi kakgalhakgaxmatli xtastakyaw. Akxni klikgalhtawakgalh tuku wan Efesios 4: 22-24, kʼakgatekgsli pi kilimakgxtakgat xwanit “chuna la xaklikatsi”, uma wamputun “tuku xaktlawa makgasa”, chu xaklilhakganalh «xasati tayat nema litlawaka xtalakaskin Dios». Lakapala kmakgxtakgli xalixkajni kilatamat chu putum tuku xtlawa tlakg xakkgalhiputulh tumin, chuna la takgaman xlakata tumin (1Corintios 6: 9, 10). Xlikana, xlakata tlan xaktalakgpalilh xtalakaskin xakkamakgxtakgli tiku kiʼamigos xwankgonit chu xakkaputsalh xalaksasti amigos tiku na kgalhakgaxmatkgo xtastakyaw Dios.

Uma tuwa kitaxtulh. Pero ktekgsli xaxlikana amigos akxni ktsukulh kan ktamakxtumit xla xtatayananin Jehová. Chuntiya xakkgalhtawakga Biblia chu xaklilakpuwan tuku xakkatsinima. Tsinu tsinu klakgpalilh tatlakgni nema xaklakgati, tuku xaktlawaputun kkilatamat chu la xaktasiya. Kkata 1995 ktamunulh la xtatayana Jehová.

TUKU TLAN KINKITAXTUNINIT:

La uku nialh kakxilha tumin la xapulana chu nialh lhuwa tuku kkgalhiputun. Kkatsininit nialh lakapala naksitsi chuna la xapulana. Chu nachuna nialh klilakgaputsa kilhtamaku nema aku namin.

Lu klipaxuwa xlakata kmakgtapakgsi akgtum grupo nema maski tanu tanu xkachikinkan xputumkan skujnanimakgo Jehová. Maski katuwa tuku titaxtumakgo, kakxilha pi ni makgxtakgkgo Dios. Tlan nakwan pi nialh wa ktlawa tuku akit klakaskin, wata tuku tlakg xlakaskinka kakxilha wa nakskujnani Jehová chu naktlawa tuku tlan xpalakatakan amakgapitsin.

«LA UKU KILATAMAT KLIPAXUWA CHU TLAN KLIMAKGKATSI» (IAN KING)

• KATA AKXNI LAKACHILH: 1963

• PAÍS: GRAN BRETAÑA

• ATANU: NI XAKLIPAXUWA KILATAMAT

LA XAKLAMA:

Klakachilh kʼInglaterra, pero akxni xakkgalhi akgtujun kata kifamilia chu akit kaw latamayaw kʼAustralia, niku lhuwa latamanin xlakgapaxilhnankgo kQueensland nema xlikgapaskan Gold Coast. Maski ni lhuwa tumin xakkgalhiyaw nikxni kinkatsankganin tuku xakmaklakaskinaw.

Maski ankgalhin xakkgalhi tuku xakmaklakaskin, ni xakpaxuwa. Nialh xaklatamaputun. Kintlat lhuwa kuchu xwa chu akit ni lu xakpaxki. Ni xaklakgati pi lhuwa xwalh kuchu chu la xlikatsini kintse. Titaxtulh lhuwa kata, kkatsilh tuku nitlan xtitaxtunit akxni soldado xwanit kMalasia, uma kimakgtayalh nakʼakgatekgsa tuku xlakata chuna xlikatsi.

Akxni kgawasaku xakwanit, ktsukulh wa kuchu. Akxni xakkgalhi 16 kata kmakgxtakgli escuela chu soldado xla Marina klitaxtulh. Ama kilhtamaku, kkgalhwanalh tipalhuwa drogas, klismanilh nakxkuli chu lhuwa kuchu kstukulh kwa. Xapulana xakwa kuchu akxni ksputa semana pero alistalh ktsukulh kwa chali chali.

Max xakkgalhi 20 kata akxni ktsukulh klilakpuwan komo xlama Dios o ni. «Xaklakpuwan, komo lama, ¿tuku xlakata masta talakaskin pi kaʼanalh tapatin chu kanikgolh latamanin?». Asta tsokgwililh poemas niku xaklimawakay Dios pi wa xlin kuenta, xlakata lhuwa tuku nitlan xakaʼakxilha kkakilhtamaku.

Akxni xakkgalhi 23 kata, kmakgxtakgli kintaskujut. Tipalhuwa taskujut kkgalhilh chu maski lakalhuwa países kkilalh chuntiya nitu xaklipaxuwa. Nitu xaktlawaputun xlakata kilatamat. Nitu xkimakgpuwantini. Ni xaklakpuwan naktlawa kinchik, nakputsa akgtum tlan taskujut o niku tlakg tlan xkixokgonika. Kajwatiya xakwaputun kuchu chu xakkgaxmatputun tatlakgni.

Klakapastakaku kilhtamaku akxni xakkatsiputun tuku xlakata lamaw. Xaklama kPolonia, chu kkilalh niku xwi campo de concentración xla Auschwitz. Xaklikgalhtawakganit xlakata tuku nitlan xkatlawanikanit latamanin anta, pero akxni kakxilhli la xlilanka xwanit uma campo, lu klilipuwa. Nila xakʼakgatekgsa tuku xlakata latamanin lu lixkajni xlikatsikgo. Akxni xaktlawama anta kcampo de concentración, xkilakataktama kilakgpixtajat chu xaklilakpuwama:«¿Tuku xlakata, tuku xlakata?».

BIBLIA LAKGPALILH KILATAMAT:

Kata 1993, akxni ktaspitli kʼatanu kachikin, ktsukulh kputsa takgalhtin kBiblia xlakata uma takgalhskinin. Ni makgas kilhtamaku titaxtulh, chatiy xtatayananin Jehová lakgatlakgkgolh kimalakcha chu kiwanikgolh pi xakkataʼalh kaʼakgtum asamblea nema xʼamaka tlawakan kʼestadio. Klaksakli nakataʼan.

Nina makgas kilhtamaku xakkilanita kʼuma estadio xlakata kkiʼakxilhnit akgtum partido xla takgaman, pero akxni kkilalh kʼasamblea tanu la xtasiya. Xtatayananin Jehová tlan xlikatsikgo, lu tlan klhakganankgonit chu xkamanankan xkgalhakgaxmatnankgo. Akxni chalh tastunut lalh tuku kaks kimalakawanilh: akglhuwa ciento xtatayananin Jehová wayankgolh anta niku xkgamanankan, pero, akxni taspitparakgolh niku xwilakgolh ni para aktsu palhma tamakgxtakgli kpiso. Pero, tuku tlakg kaks kimalakawanilh wa pi xputumkan lu xpaxuwakgo chu xkgalhikgo takaksni, wa uma tuku akit lu xaklakaskin. Ni klakapastaka taʼakgchuwin nema mastaka, pero xtayatkan xtatayananin Jehová wa tuku tamakgxtakgli kkintalakapastakni

Watiya ama katsisni klakapastakli pi kintapuxnimat, tiku xlakgapasa Biblia chu xkatakgalhtawakganit lhuwa takanajla, xkiwaninit pi Jesús wa pi tlan nakalakgapasaw tiku xaxlikana kstalaninanin kaj xlakata tuku tlawakgo (Mateo 7: 15-20). Klakpuwa pi tlan xaklakputsananilh tuku xlakata xtatayananin Jehová tanu la xlikatsikgo. Wa uma kilhtamaku akxni kmakgkatsilh pi xakkgalhi tsinu takgalhkgalhin chu tapaxuwan.

Atanu semana, xtatayananin Jehová tiku kintaʼankgolh kʼasamblea kilakgapaxialhnamparakgolh. Kiwanikgolh pi xakkatakgalhtawakgalh Biblia, chu akit kmakgamakglhtinalh. Nachuna ktsukulh kkan ktamakxtumit.

Chuna la xakkgalhtawakgatilhama Biblia, tuku xaklakpuwan xlakata Dios talakgpalilh. Kkatsilh pi xla ni lin kuenta xlakata anan tapatin chu tuku nitlan, na kkatsilh pi nitlan limakgkatsi akxni akxilha pi latamanin tlawakgo tuku nitlan (Génesis 6:6; Salmo 78: 40, 41). Klakkaxwililh pi xakama kliskuja xlakata ni xakmakgalipuwa. Wata xakmakgapaxuwaputun xnaku (Proverbios 27:11). Kmakgxtakglhi cigarro, kuchu chu xalimaxana kilatamat. Wa xlakata marzo kata 1994, ktamunulh chu xtatayana Jehová klitaxtulh.

TUKU TLAN KINKITAXTUNINIT:

Kpaxuwa chu tlan kmakgkatsi. Nialh kwa kuchu xlakata nakpatsankga kintalipuwan. Akxni wi tuku klilakgaputsa kmakgxtakga kxmakan Jehová (Salmo 55:22).

Akgkaw kata lata ktatamakgaxtokgnit chatum xtatayana Jehová tiku wanikan Karen, chu kkgalhi chatum kintutsumat tiku lu tlan likatsi nema wanikan Nella. Kinkgalhtutukan lhuwa kilhtamaku klimaxtuyaw xlakata naklichuwinanaw Dios chu kkamakgtayayaw amakgapitsin nakatsikgo tuku xaxlikana xlakata Dios. La uku kilatamat klipaxuwa chu tlan kmakgkatsi.