Kakatsi tuku masiya xTachuwin Dios
¿Tuku nala kKilhtamaku akxni Nalakputsanankan?
Uma artículo namakgtayayan natekgsa kmiBiblia xatakgalhtin makgapitsi takgalhskinin nema max miʼakstu lakpuwanita. Komo lakaskina xtatayananin Jehová tlan nataputsakgoyan xatakgalhtin umakgolh takgalhskinin.
1. ¿Tuku kilhchanima Kilhtamaku akxni Nalakputsanankan?
Dibujo nema wi kpakgastakat o kpakgkana masiya tuku lakpuwankgo lhuwa latamanin pi nala kKilhtamaku akxni Nalakputsanankan nema lichuwinan Biblia. Lakpuwankgo pi lhuwa latamanin nakamamakxtumikan kxlakatin xputawilh Dios chu xla nakalakputsanani: makgapitsin naʼankgo kʼakgapun chu amakgapitsin nakamakankan kpupatin. Pero Biblia lichuwinan pi kKilhtamaku akxni Nalakputsanankan namakgtayanan xlakata nialh naʼanan tuku ni xaʼakgstitum (Salmo 96:13). Jesús wa Juez nema Dios laksaknit xlakata natlawa tuku xaʼakgstitum xpalakata latamanin (kalikgalhtawakga Isaías 11:1-5 chu Hechos 17:31).
2. ¿Tuku xlakata wanaw pi natlawakan tuku xaʼakgstitum kKilhtamaku akxni Nalakputsanankan?
Xapulana chixku, Adán, talalakatawakalh Jehová Dios. Chu xkuenta pi putum xkamanan lakgalhinankgo, patinankgo chu nikgo (Romanos 5:12). Jesús nalakkaxtlawa uma tuku nitlan akxni nakamalakastakwani lhuwa latamanin nema nikgonita. Libro xla Apocalipsis o Revelación, lichuwinan pi uma chuna nala akxni Jesucristo namapakgsinan akgtum mil kata (kalikgalhtawakga Apocalipsis 20:4, 11, 12).
Tiku nalakastakwanankgo nakalakputsananikan, pero ni katikalilakputsananika tuku tlawakgolh akxni nina xnikgo, wata nakalilakputsananikan tuku tatsokgtawilanit krollos nema lichuwinan Apocalipsis capítulo 20 (Romanos 6:7). Apóstol Pablo lichuwinalh pi nalakastakwanankgo «tiku xaʼakgstitum chu tiku ni xaʼakgstitum» chu nakamaxkikan talakaskin nalakgapaskgo Dios (kalikgalhtawakga Hechos 24:15).
3. ¿Tuku atanu nala kKilhtamaku akxni Nalakputsanankan?
Latamanin tiku nikgolh chu ni lakgapaskgolh Jehová chu nila skujnanikgolh, nakamaxkikan talakaskin natlawakgo tuku Jehová lakaskin. Komo chuna natlawakgo, nalimasiyakgo pi kamalakastakwanika «xlakata nakgalhikgo latamat». Pero tiku ni nakgalhakgaxmatputunkgo Dios nalimasiyakgo pi kamalakastakwanika “xlakata nakalakputsananikan chu nakamalakgaxokgekan” (kalikgalhtawakga Juan 5:28, 29 chu Isaías 26:10; 65:20).
Akxni nasputa Kilhtamaku akxni Nalakputsanankan nema namakgapala akgtum mil kata, Jehová natlawa pi latamanin nialh nakgalhikgo talakgalhin chuna la xapulana xlakpuwanit (1 Corintios 15:24-28). ¡Lu tlan nakakitaxtuni tiku nakgalhakgaxmatnankgo! Ama kilhtamaku, Akgskgawini, nema xlakgachinukanit akgtum mil kata niku kxakapukswa, namakgxtakgkan xlakata xaʼawatiya nakaputsanani latamanin. Satanás natlawa putum tuku namatlani xlakata natlawa pi latamanin namakgxtakgkgo Jehová, pero tiku natayanikgo uma taputsan, tlan nalatamakgo putum kilhtamaku unu kKatiyatni (kalikgalhtawakga Isaías 25:8 chu Apocalipsis 20:1, 7-9).
4. Atanu kilhtamaku akxni nalakputsanankan nema na nalimin tasikulunalin
Biblia lichuwinan atanu kilhtamaku akxni nalakputsanankan. Uma kilhtamaku kilhchanima akxni namalakgsputukan uma kakilhtamaku. Uma kilhtamaku kaj xalan nachin, chuna la lalh kxkilhtamaku Noé, akxni Munkaklat kamasputulh putum latamanin tiku nitlan xlikatsikgo. Nialh makgas, akxni kamasputukanita nawan «tiku lixkajni likatsikgo», kajwatiya nalatamakgo tiku tlan likatsikgo chu «putum kilhtamaku natlawakan tuku xaʼakgstitum» (kalikgalhtawakga 2 Pedro 3:6, 7, 13).