TAKGALHSKININ XLAKATA BIBLIA
¿Tuku wamputun Kilhtamaku akxni Nakaputsananikan Latamanin?
Kilhtamaku akxni Nakaputsananikan Latamanin xatapaxuwan nawan. ¿Tuku xlakata?
Makgasa, Dios kawililh jueces xlakata xkalakgmaxtulh xkachikin akxni xkatlawanikan tuku nitlan (Jueces 2:18). Biblia lichuwinan tuku aku mima Kilhtamaku akxni Nakaputsananikan Latamanin la akgtum kilhtamaku nema xatapaxuwan niku Jehová, Juez xlikalanka kKatiyatni, nakalakgmaxtu latamanin xlakata tuku ni xaʼakgstitum. (Kalikgalhtawakga Salmo 96:12, 13 chu Isaías 26:9.)
Namakgantaxti Jesús, tiku liyawakanit juez xlakata nakatlawani tuku xaʼakgstitum latamanin chu tiku nalakastakwanankgo (Hechos 10:42; 17:31). Jesús namalakastakwaninan Kilhtamaku akxni Nakaputsananikan Latamanin, tiku nikgonit chu ni lakgapaskgolh Dios xaxlikana uma natlawa pi tlan nalakgapasa chu napaxkikgo. (Kalikgalhtawakga Hechos 24:15.)
¿La namakgapala Kilhtamaku akxni Nakaputsananikan Latamanin?
Chuna la wan Biblia, uma kilhtamaku namakgapala akgtum mil kata. Uma kilhtamaku tiku nikgonit nalatamaparakgo (Apocalipsis [Revelación] 20:4, 12). Natalakaskin umakgolh kata xlakata nalakgapaskgo Dios chu nakgalhakgaxmatnikgo. Biblia limasiya pi nakaputsananikan xlakata tuku natlawakgo akxni kamalakastakwanika. (Kalikgalhtawakga Romanos 6:7.)
Biblia na lichuwinan akgtum kilhtamaku akxni nakatalakkaxlakan latamanin nema lakapala namin akxni nina tsuku akgtum mil kata. Uma kilhtamaku nawanikan lisputni, la akxilhnitaw atanu artículos la lichuwinan xmakni uma revista. Uma kilhtamaku, Dios nakamalakgsputu latamanin tiku nitlan likatsikgo (2 Pedro 3:7). Wa xlakata, talakaskin nalimasiyayaw pi xlikana paxkiyaw Dios. (Kalikgalhtawakga 2 Pedro 3:9, 13.)