Moisés chixku tiku xkanajla

¿TUKU TAKANAJLA?

Biblia wan pi ni kaj akglakgwa akxni kanajlayaw. Tiku kanajlani Dios liwana katsi pi namakgantaxti tuku lichuwinanit.

¿LA LIMASIYALH MOISÉS TAKANAJLA?

Tuku tlawalh putum kxlatamat limasiyalh pi xlikana xkanajla tuku Dios xmalaknunit (Génesis 22:15-18). Maski xkgalhilh tlan latamat kʼEgipto chu lhuwa tuku xkgalhilh, «ntilaksakli xalikgaman natatlawa[kan] xlakgskgatan Dios, ni xawa wa nalimakgapaxuwakan ntalakgalhin» (Hebreos 11:25). ¿Kaj akglakgwa chuna tlawalh? ¿Lakpuwa alistalh pi nitlan tuku tlawalh? Ni chuna, Biblia wan pi Moisés «xampi tilitatliwakglhli, xtachuna mpala [...] xʼukxilhma Dios ntu ni tasiyuj» (Hebreos 11:27). Moisés nikxni lakpuwa pi nitlan tuku xlaksaknit xlakata xtakanajla.

Nachuna, Moisés kamakgtayalh amakgapitsin xlakata na xtatliwakglhli xtakanajlakan. Akgtum liʼakxilhtit, akxni lakpuwankgolh pi xʼamaka kamakgnikan xlakata xkastalanimakgolh ksoldados faraón chu kxlakatinkan xwi xaSpinini pupunu. Xlakata lu kalipekua xwilakgolh, lu pekuankgolh chu tasaskinikgolh xtamakgtay Jehová chu Moisés. ¿Tuku tlawalh Moisés?

Moisés nipara xlakpuwan pi Jehová xʼama mapapitsi xaSpinini pupunu xlakata kxakaskakni xpatakutkgolh israelitas. Pero liwana xkatsi pi Dios wi tuku xʼama tlawa xlakata xkamakgtayalh xkachikin chu nachuna xkamamakgkatsiniputun amakgapitsin. Anta kÉxodo 14:13 wan: «Moisés kawanilh kachikin: “Ni kapekuantit. Kaks katayatit chu kaʼakxilhtit la kalakgmaxtuyan Jehová la uku”». ¿Kamatliwakglhnilh Moisés xtakanajlakan israelitas? Chuna, xlakata Biblia wan pi Moisés chu putum israelitas «xpalakata xtakanajlakan ntilipatakutkgolh [...] wa ntu wanikan tsutsokgo takgayawana, xtachuna kxaskakni tiyat» (Hebreos 11:29). Xtakanajla Moisés makgtayalh chu nachuna tiku stalanikgolh.

¿TUKU KINKAMASIYANIYAN XLIʼAKXILHTIT?

Kilikanajlanitkan xtamalaknun Dios chu kilimasiyatkan xlakata tuku tlawayaw. Pulaktum tuku Dios kinkawaniyan pi nakinkamaxkiyan tuku maklakaskinaw komo pulana wa nawiliyaw kkilatamatkan (Mateo 6:33). Xlikana pi la uku lutuwa natayaniyaw kʼuma kakilhtamaku niku lhuwa tuku kgalhiputunkan; pero tlan nalipawanaw pi komo ni lhuwa tuku nakgalhiputunaw chu pulana nawiliyaw xtaskujut, Jehová nakinkamaxkiyan tuku maklakaskinaw. Xla kinkamalaknuniyan: «Ni lhtuj kaktimakgaxtakgni» (Hebreos 13:5).

Nachuna, naliskujaw xlakata nakamatliwakglhniyaw xtakanajlakan amakgapitsin. Akgtum liʼakxilhtit, natlatni lu xlakaskinka xliʼakxilhatkan nakamakgtayakgo xkamanankan nakanajlanikgo Dios. Akxni laktsinajku, xlikatsitkan pi Dios lama chu kinkawaniyan tuku tlan chu tuku nitlan. Nachuna, liwana xlikatsitkan pi tlan nakakitaxtuni komo nakgalhakgaxmatkgo Dios (Isaías 48:17, 18). ¡Natlatni lu tlan tuku kamaxkikgo xkamanankan akxni kamakgtayakgo «nakanajlay [...] mpi wi nchatum Dios, chu mpi na wa nti mputsakgoy lakgalhamankgoy»! (Hebreos 11:6.)