«Lhuwa tiku ni xkiʼakxilhputunkgo»

LA XAKLAMA:

Kstakli kSantiago, xcapital Chile, niku xwi lhuwa tuku nitlan, drogas chu pandillas tiku xtlawakgo tuku nitlan, latamanin xlismanikgonita. Akxni xakkgalhi akgkitsis kata, makgnika kintlat. Alistalh kintse tsukulh talatama chatum chixku tiku luku xwanit chu lhuwa xkinkawiliniyan. Asta la uku akxni klakapastaka lu nitlan klimakgkatsi.

Akxni kajku xakstakma, lu xaluku xakwanit xlakata nitlan xlikatsikgo tiku akxtum xakkatalatama. Ktsukulh kgaxmata heavy metal, lhuwa xakwa kuchu chu lakgachunin xakmaklakaskin drogas. Putum kilhtamaku xakkatalachipakgoyaw tiku kstakgo drogas, tiku makglhuwa xkimakgniputunkgo. Akgtum kilhtamaku, pandilleros xokgonikgolh chatum makgnina xlakata xkimakgnilh, pero ktsalalh chu kaj makgtum kililhtukuka cuchillo. Atanu kilhtamaku kstananin drogas kilhkawilinikgolh pistola kkiakgxakga chu xkinpixchiwakaputunkgo.

Kata 1996, klakgatilh chatum tsumat tiku wanikan Carolina, chu kata 1998, ktatamakgaxtokgli. Akxni lakachilh xapulana kinkgawasa liwana kimalakpuwanilh xlakata lu lakapala xaksitsi. Xakpekwan xlakata nachuna xakwa la kintutlat chu na nitlan xakkalikatsinilh kifamilia. Wa xlakata kputsalh tamakgtay niku katamaknukan tiku wakgo droga chu kuchu. Tamakgtay nema kimaxkikgolh makuchinanin, ni lu lhuwa kimakgtayalh. Lu lakapala xaksitsi; nila xakmachokgo kintasitsi. Xlakata nialh xakkatlawaniputun tuku nitlan kifamilia, akstu xkimakgniputunkan. Lu tlan pi nila kmakgantaxtilh.

Maski akglhuwa kata ni xakkanajla pi xlama Dios la uku xakkanajlaputun. Wa xlakata ktsukulh kan templo evangélico. Pero kimpuskat tsukulh katakgalhtawakga xtatayananin Jehová. Akit ni xakaʼakxilhputun chu lixkajni tachuwin xakawani. Pero xlakan nitu xwankgo, uma nila xakkanajla.

Akgtum kilhtamaku, Carolina kiwanilh pi xakputsalh kkiBiblia Salmo 83:18, versículo niku wan pi xtukuwani Dios wa Jehová. Kkintakanajla xakkatsinima xlakata Dios, pero ni xakkatsi pi xwanikan Jehová. Akxni xtsukuma kata 2000, na ktsukulh katakgalhtawakga xtatayananin Jehová.

BIBLIA LAKGPALILH KILATAMAT:

Tsinu tsinu, kakxilhli pi Jehová chatum Dios tiku xapaxkina chu tapatinan. Akgtum liʼakxilhtit, Éxodo 34:6, 7 wan pi Jehová chatum «Dios tiku xalakgalhamana chu tlan likatsi, ni lakapala sitsi, lhuwa kgalhi tapaxkit nema ni makgxtakgnan chu xaxlikana, tiku lu lhuwa kakgalhini tapaxkit, tapatinan akxni tlawakan tuku nitlan, ni kgaxmatputunkan chu talakgalhin». Uma lu kimatliwakglhli.

Maski chuna lu tuwa xakmakgkatsi naktlawa tuku xakkatsinima. Xaklakpuwan pi nikxni la xakmachokgolh kintasitsi. Akxni ni xakmatlani tuku xatlan, Carolina, xkilimasiyani tapaxkit chu xkimatliwakglha chu xkimalakapastaka pi Jehová xakxilha tuku xaktlawa. Xlakata Carolina kimakgtayalh, uma tlawalh pi chuntiya xakmakgapaxuwalh Jehová, maski lakgachunin xaklakpuwan pi nila xaktayanilh.

Milh kilhtamaku, Alejandro, tiku xkilimakgalhtawakgema Biblia, kiwanilh pi xaklikgalhtawakgalh Gálatas 5:22, 23, niku wan xtawakat xʼespíritu santo Dios: «tapaxkit, tapaxuwan, takaksni, lu kgalhkgalhinan, tlawakan tuku tlan, tlan talikatsit, takanajla, ni lakapala sitsikan, [chu] machokgo tuku nitlan tlawaputun». Alejandro kiwanilh pi komo xaklakaskin uma lakwan tayat xtalakaskin naklipawan espíritu santo chu ni kiʼakstu nakilipawankan. Uma tuku kiwanilh lu kimakgtayalh.

Ni lhuwa kilhtamaku titaxtulh, kkilalh kʼakgtum lanka tamakxtumit xla xtatayananin Jehová. Xlakata niti xwili taʼakglhuwit, nitu xʼanan basura chu xtasiya pi lu xlapaxkikgo, kkatsilh pi xaktakgsnit xaxlikana takanajla (Juan 13:34, 35). Ktamunulh febrero kata 2001.

TUKU TLAN KINKITAXTUNINIT:

Lu xaluku xakwanit. Lhuwa tiku ni xkimpaxkikgo pero kinkuenta xwanit. Jehová kilakgpalilh, chu nialh chuna kkgalhilh kintayat, kimakutulh niku lu pulhman xaktajuma. Lu uku nialh kkgalhi taʼakglhuwit kskujnanimaw Dios kimpuskat chu  chatiy kinkamanan.

Kifamilia chu kiʼamigos nila kanajlakgo pi lu talakgpalinit kintayat. Chu makgapitsi na katsiputunkgo xlakata Biblia. Kkgalhinit talakgalhaman xlakata nakkamakgtaya makgapitsi latamanin nalakgapaskgo Jehová. ¡Lu kpaxuwa akxni kʼakxilha la Biblia kalakgpalininit xlatamatkan!