LA NAMACHOKGOYAW TASITSI

4 | Kaputsa Xtamakgtay Dios

Biblia wan:

«Tayat nema espíritu tlawa pi latamanin nakgalhikgo wa umakgolh: paxkinankan, paxuwakan, kgalhikan takaksni, kgalhkgalhinankan, tlawakan tuku tlan, tlan likatsikan, kgalhikan takanajla, kgalhikan tsatata naku, machokgokan tuku tlawaputunkan» (GÁLATAS 5:22, 23).

¿Tuku wamputun?

Xlakata xtamakgtay Dios tlan namachokgoyaw tasitsi. Espíritu santo tlan nakinkamakgtayayan nakgalhiyaw tayat nema kiʼakstukan nikxni la xkgalhiw. Wa xlakata, tlakg tlan naputsayaw xtamakgtay Dios chu ni kiʼakstukan namakgatlajaputunaw tasitsi. Komo chuna natlawayaw, nachuna nakinkakitaxtuniyan la apóstol Pablo. Xla tsokgli: «Putum tlan ktlawa xlakata Dios kimaxki litliwakga» (Filipenses 4:13). Chu chuna tlan nawanaw: «Jehová wa tiku kimakgtaya» (Salmo 121:2).

Kalitsakgsa uma:

«Lu xaluku xakwanit […]. Jehová kilakgpalilh» (WALDO).

Xliputum minaku kaskini Jehová xʼespíritu santo chu kamakgtayan nakgalhiya laktlan tayat (Lucas 11:13). Chuna la, tapaxkit, kgalhikan takaksni, kgalhkgalhinankan chu machokgokan tuku tlawaputunkan, umakgolh tayat lu xlakaskinka xlakata tlan namakgatlajakan tasitsi. Kalakputsanani tuku wan Biblia xlakata umakgolh tayat chu kaputsa la tlan nalilatapaya. Na lu xlakaskinka akxtum nakatalaya latamanin tiku liskujkgo nalilatamakgo umakgolh tayat, xlakata tlan namakgpuwantinikgoyan nalimasiyaya «tapaxkit chu xalaktlan tatlaw» (Hebreos 10:24).

Liʼakxilhtit xalak kinkilhtamakujkan (WALDO)

Makgatlajalh tasitsi chu talatalatlaw

Waldo lu tuwa tuku titaxtulh akxni aktsujku xwanit chu uma tlawalh pi lu ksitsilh. Xla kinkawaniyan: «Putum kilhtamaku xakkatalachipakgoyaw tiku kstakgo drogas […]. «Akgtum kilhtamaku, pandilleros xokgonikgolh chatum makgnina xlakata xkimakgnilh, pero ktsalalh chu kaj makgtum kililhtukuka cuchillo».

Waldo ni lakgatilh akxni xtatayananin Jehová tsukukgolh limakgalhtawakgekgo Biblia xpuskat. Xla wan: «Akit ni xakaʼakxilhputun chu lixkajni tachuwin xakkawani. Pero xlakan nitu xwankgo, uma nila xakkanajla».

Titaxtulh kilhtamaku, Waldo na tsukuka limakgalhtawakgekan Biblia. Xla lakapastaka: «Lu tuwa xakmakgkatsi naktlawa tuku xakkatsinima. Xaklakpuwan pi nikxni la xakmachokgolh kintasitsi». Pero tuku katsinilh kBiblia lakgpalilh xtapuwan.

Xla wan: «Milh kilhtamaku, Alejandro, tiku xkilimakgalhtawakgema Biblia, kiwanilh pi xaklikgalhtawakgalh Gálatas 5:22, 23 […]. Alejandro kiwanilh pi komo xaklakaskin uma lakwan tayat xtalakaskin naklipawan espíritu santo chu ni kiʼakstu nakilipawankan. Uma tuku kiwanilh lu kimakgtayalh».

Waldo tlan makgatlajalh tasitsi xlakata mastalh talakaskin pi Dios xmakgtayalh. Xla wan: «Kifamilia chu kiʼamigos nila kanajlakgo pi lu talakgpalinit kintayat». Chu wampara: «Lu xaluku xakwanit […]. Jehová kilakgpalilh».