Xtakgalhkgalhinkan ninin talakastakwanat

¿Kanajlaya tuku lichuwinanit Biblia xlakata talakastakwanat?a Lu tlan takgaxmata nakaʼakxilhparakgoyaw tiku xkapaxkiyaw chu nikgonita pero, ¿xlikana uma? Xlakata nakgalhtiyaw uma takgalhskinin, liwana kaʼakxilhwi xliʼakxilhtit xʼapóstoles Jesús.

Apóstoles liwana xkanajlanikgo talakastakwanat. ¿Tuku xlakata? Pulaktiy tuku xlakata. Pulana, xlakan xkanajlakgo talakastakwanat xlakata xmakgalhtawakganakan xmalakastakwanikanit. Xʼapóstoles chu alistalh «liwaka akgkitsis ciento natalanin» tiku makxtum xwilakgolh akxilhkgolh pi xlakastakwananit (1 Corintios 15:6). Nachuna, xtalakastakwanat Jesús liwana xtsokgwilikanit chu xlikana xkanajlakgo latamanin, chuna la limasiya akgtati Evangelios (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Xlipulaktiy, xʼapóstoles xʼakxilhkgonit xMakgalhtawakgenakan akxni tlawalh akgtutu talakastakwanat: makgtum kNaín, alistalh kCapernaum chu kBetania (Lucas 7:11-17; 8:49-56; Juan 11:1-44). Xaʼawatiya talakastakwanat nema talichuwinan niku litsuku uma revista, wa chatum xalak familia tiku lu tlan xkatalalin Jesús. Liwana kaʼakxilhwi tuku lalh.

«KIT WA NTALAKASTAKWAN»

«Mintala Lázaro nalatamapalay.» Wa uma tuku Jesús wanilh Marta, xtala tsumat Lázaro tiku akgtati kilhtamaku xninita. Xapulana, ni akgatekgsli tuku xwaniputun Jesús. Marta kgalhtinalh: «Kkatsiy mpi nalakastakwanan» pero xlakpuwan pi chuna xʼama la kilhtamaku nema aku mima. Jesús liwana wanilh: «Kit wa ntalakastakwan, chu latamat», chu tunkun malakastakwanilh Lázaro. ¡Kalakpuwanti la kaks lakawa Marta! (Juan 11:23-25.)

¿Niku xwi Lázaro akgtati kilhtamaku akxni xninit? Xla nikxni wa pi xʼanit alakatanu. Lázaro ni xkgalhi akgtum espíritu nema xʼanit kʼakgapun chu anta xtawilacha Dios. Jesús ni xafuerza maxtulh niku xwi xlakata nalimin kKatiyatni. Wa xlakata, ¿niku xwi? Klhtatama niku xmaknukanit (Eclesiastés 9: 5, 10).

Kalakapastakwi pi Jesús tamalakxtumilh linin la akxni lhtatakan chu lakastakwanankan akxni namakikana kkalinin. Chuna la wan Biblia: «“Kiamigojkan Lázaro, lhtatama; wampi klakgan, kan mastakniy”. Cha nchu wankgolh xlimakgalhtawakgat: “Tlati, lapi kaj lhtatama, napaksa”. “Na chi wa xla xliwan Jesús mpi xninitta Lázaro; cha nchu xlakan, xpuwankgoy mpi wa lichuwinan nkaj jaxma, lhtatama. Pus chi lakatanks wanikgolh Jesús xlimakgalhtawakgat: “Ninitta Lázaro”» (Juan 11:11-14). Jesús malakastakwanilh Lázaro chu maxkilh xfamilia. ¡Lu lanka tamaskiwin kamaxkilh!

Talakastakwanat nema tlawalh Jesús akxni xlama kKatiyatni kaj akgtum liʼakxilhtit tuku natlawa akxni Mapakgsina nawan kxTamapakgsin Dios.b Akxni namapakgsinan kKatiyatni, nakamalakastakwani tiku lhtatamakgolh kkalinin. Wa xlakata wa: «Kit wa ntalakastakwan». Kalakpuwanti la napaxuwayaw akxni nakaʼakxilhparakgoyaw tiku kapaxkiyaw chu la napaxuwakgo tiku nalakastakwanankgo (Lucas 8:56).

TAKANAJLA MASTA LATAMAT NEMA NI KGALHI XLISPUTNI

Jesús wanilh Marta: «Wa nti nkit nkinkanajlaniy, maski xnilh, nalatamay; chu xlipaks wa nti lama, na kinkanajlaniy, ni xlipaʼan katinilh» (Juan 11:25, 26). Tiku nakamalakastakwani Jesús akxni namaPakgsinan xaʼakgtum Mil Kata nakamaxki talakaskin nalatamakgo putum kilhtamaku, komo nakanajlanikgo.

Akxni lu tlan lichuwinalh xlakata talakastakwanat, Jesús tlawanilh takgalhskinin Marta nema liʼakxilhli xtakanajla: «¿Pa kanajlaya yuma?», xla kgalhtinalh: «Kkanajlanit, [...], mpi wix nCristo, Xkam Dios» (Juan 11:26, 27). ¿Chu wix? ¿Kgalhiputuna takanajla chuna la xkgalhi Marta xlakata talakastakwanat? Komo chuna, pulana, milikatsit tuku natlawa Dios xlakata latamanin (Juan 17:3; 1 Timoteo 2:4). Tuku nakatsiya namaxkiyan takanajla. ¿Tuku xlakata ni kawaniya xtatayananin Jehová namasiyanikgoyan tuku wan Biblia xlakata uma tema? Xatapaxuwan nalitachuwinankgoyan uma lu tlan takgalhkgalhin xlakata talakastakwanat.