TAKGALHSKININ XLAKATA BIBLIA
¿Tlan kinkamakgtayakgoyan ángeles?
Chuna la makgasa ángeles makgtayakgolh Daniel, kskujni Dios, la uku nachuna makgtayanankgo latamanin nakatsikgo tuku wan Biblia
Akxni nina xkatlawakan latamanin, Dios katlawalh millones ángeles (Job 38:4, 7). Uma lakgtliwakga espíritus skujnanikgo Dios. Min kilhtamaku, kamalakgacha xlakata nakapulalin chu nakakuentajtlawa latamanin tiku kgalhakgaxmatkgo (Salmo 91:10, 11). La uku, ángeles tlawakgo pi latamanin nalitamakgtayakgo tamakatsinin nema lichuwinankgo kstalaninanin Jesús. (Kalikgalhtawakga Apocalipsis [Revelación] 14:6, 7.)
Wa xlakata, ¿talakaskin natlawaniyaw oración ángeles xlakata nakinkamakgtayakgoyan? Ni, oración limaklakaskinkan xlakata namastakan kakni, chu kaj Dios lakgchan namaxkiyaw kakni (Revelación 19:10). Xlakata ángeles skujnanikgo Dios, wa tlawakgo tuku wan Dios, ni wa tuku lakaskinkgo latamanin. Wa xlakata, putum kilhtamaku natlawaniyaw Dios oración kxtukuwani Jesús. (Kalikgalhtawakga Salmo 103:20, 21 chu Mateo 26:53.)
¿Wilakgolh ángeles tiku nitlan likatsikgo?
Chuna la katlawaka latamanin, ángeles na kamaxkika talakaskin nakatsikgo laksakkgo tuku tlan chu tuku nitlan. Pero, lu nitlan xlakata lhuwa ni kgalhakgaxmatkgolh Dios (2 Pedro 2:4). Tiku xapulana ni kgalhakgaxmatnalh wa Satanás; chu makgapitsin nachuna tlawakgolh chu litaxtukgolh demonios. Nina makgas, putum katamakxtukancha kʼakgapun chu kamakaminka kKatiyatni. (Kalikgalhtawakga Apocalipsis 12:7-9.)
Lata tsukulh kata 1914 lu talhuwinit tuku ni xaʼakgstitum chu latlawanikan tuku nitlan. Uma litasiya pi nialh makgas Dios namasputu Satanás chu xdemonios chu akgtum paraíso natlawa Katiyatni. (Kalikgalhtawakga Apocalipsis 12:12 chu 21:3, 4.)