¿Tuku xlakata Jesús xlakaskinka akxilha xTamapakgsin Dios?

Artículo nema akxilhwi, katsiw pi Jesús limaklakaskilh xlatamat xlakata nalichuwinan «xasasti xtapakgsit» Dios (Lucas 8:1). Lhuwa liskujli chu tlawalh akglhuwa kilómetros kʼIsrael xlakata nakalitachuwinan latamanin tamapakgsin. Nachuna, akgtati Evangelios, niku wan taskujut nema tlawalh Jesús, lichuwinankan liwaka akgtum ciento xla xTamapakgsin Dios, lhuwa tuku tatsokgtawilanit wa Jesús lichuwinalh. Tuku wa, kaj tsinu limasiyalh tuku natlawa xTamapakgsin Dios (Juan 21:25).

¿Tuku xlakata lu xlakaskinka xakxilha Jesús Tamapakgsin? Xlakata wa Dios laksakli namapakgsinan (Isaías 9:6; Lucas 22:28-30). Uma ni wamputun pi Jesús lu xlakaskin nakgalhi litliwakga chu xmaxkika kakni (Mateo 11:29; Marcos 10:17, 18). Wi tuku tlakg xlakaskinka xakxilha xlakata nalichuwinan Tamapakgsin. Xla xkatsi, chu katsi, pi ama tamapakgsin natlawa tuku tlan xpalakata latamanin tiku tlakg kapaxki: xTlat chu kstalaninanin.a

TUKU NATLAWA TAMAPAKGSIN XPALAKATA XATLAT

Jesús paxki xTlat xliputum xnaku (Proverbios 8:30; Juan 14:31). Lu lakgati tayat nema kgalhi xTlat, la tapaxkit, lakgalhamanan, chu xlakata xaʼakgstitum (Deuteronomio 32:4; Isaías 49:15; 1 Juan 4:8). Wa xlakata ni lakgati taʼakgsanin tuku wankanit xlakata xTlat. Akgtum liʼakxilhtit, wankanit pi Dios ni lilakgaputsa xtapatinkan latamanin, asta wankan pi wa kamapatini. Wa xlakata Jesús lhuwa liskujli nalichuwinan «xatlan tamakatsinin xla xtapakgsin Dios»: xlakata Tamapakgsin natlawa pi tlan nalichuwinankan xTlat (Mateo 4:23; 6:9, 10). ¿La natlawa?

Lhuwa tuku nalakgpali xlakata tlan natawilakgo latamanin. Jehová nalimaklakaskin Tamapakgsin xlakata «naxakanikgo Dios xlakgpixtajatkan» latamanin. Namasputu tuku tlawa pi natasayaw chu «na nialh katiʼanalh linin; chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat» (Apocalipsis [Revelación] 21:3, 4). KxTamapakgsin Dios, nialh katipatinankgolh latamanin.b

Wa xlakata Jesús lu xlichuwinan Tamapakgsin, ama Tamapakgsin nalimasiya pi xTlat xalakgalhamana chu lhuwa litliwakga kgalhi (Santiago 5:11). Pero Tamapakgsin na natlawa tuku tlan xpalakata latamanin tiku Jesús kapaxki: kstalaninanin.

TUKU NATLAWA TAMAPAKGSIN XPALAKATA KSTALANINANIN JESÚS

Akxni nina xmin kKatiyatni, Jesús lhuwa kilhtamaku talatamalh xTlat kʼakgapun. Makgtayalh xlakata natlawa putum tuku anan: lhuwa staku nema anan| chu galaxias, Katiyatni chu putum tuku anan (Colosenses 1:15, 16). Maski lhuwa tuku tlawakgolh, tiku tlakg kapaxkilh Jesús, wa latamanin (Proverbios 8:31).

Tapaxkit nema xkakgalhini latamanin xtlawa pi Jesús xlichuwinalh xtachuwin xTlat. Akxni tsukulh lichuwinan xTlat wa pi xminit kKatiyani lichuwinan «xatlan tamakatsinin» tiku xlakaskinkgo tamakgtay (Lucas 4:18). Jesús ni kajwatiya xlichuwinan, na xtlawa. Akgtum liʼakxilhtit, akxni makgapitsin latamanin lakgtalakatsuwikgolh xlakata nakgaxmatnikgo, «tilakgalhamankgolh, chu na timapaksakgolh wa nti xwilakgo anta xkgalhiy ntajatat» (Mateo 14:14). Atanu kilhtamaku, chatum chixku tiku xkgalhi nitlan tajatat wanilh: «Lapi xlakaskinti, tlan nakimapaksaya». Xlakata Jesús lakgalhamalh, kgalhtilh: «Klakaskin; kapaksti», chu mapaksalh (Lucas 5:12, 13). Chu akxni akxilhli María chatum xʼamiga tiku xtasama, xlakata xninit xtala kgawasa xwanikan Lázaro, Jesús «lipikua makgkatsilh kxnaku» chu alistalh «tsukulh tasay» (Juan 11:32-36). Ama kilhtamaku tlawalh tuku nila kanajlakan: maski Lázaro xlina akgtati kilhtamaku lata xninit, malakastakwanilh (Juan 11:38-44).

Jesús xkatsi pi tuku xtlawanit ni xʼama makgapala. Chuna la xtitaxtulh kilhtamaku, latamanin tiku xkamakuchinit chu xkamalakastakwaninit xtatatlaparakgolh chu xniparakgolh. Pero, xkatsi pi tuku xʼama tlawa Tamapakgsin ni xkgalhilh xlisputni. Wa xlakata, ni kajwatiya tlawalh tuku tuwa xkanajlakan, wata liskujli xlakata «xliakgchuwinan xatlan tamakatsinin xla tapakgsin» (Mateo 9:35). Milagros nema tlawalh kaj tsinu limasiyalh tuku natlawa Tamapakgsin nialh makgas kilhtamaku xlikalanka Katiyatni. ¿Tuku nala? Biblia kinkakgalhtiyan.

• 

  Nasputa tajatat.

  «Ama kilhtamaku xlakgastapukan lakgaxokgo nalakawanamparakgo, chu xtakgen tiku akgatapa nakgaxmatpara. Ama kilhtamaku tiku nila tlawan natlawan chuna la juki, chu ksimakgat kgokgo lipaxuw nachuwinan.» Nachuna, «ni chatum lataman nawan: “Ktatatlay”» (Isaías 33:24; 35:5, 6).

• 

  Nasputa linin.

  «Xalaktankswa, ixlakan nawan ama lipaxaw pulataman [...] kanikxniwa natalatama ana.» (Salmo 37:29.)

  «Xlikana xla xliputum kilhtamaku namalakgsputu linin, chu Jehová, Malana tiku lakgchan namapakgsinan, xlikana naxaka putum lakgpixtajat.» (Isaías 25:8.)

• Tiku nikgonit nalakastakwanankgo.

  «Xlipaks nti aknukgoy [o kaʼakgtapukanit], nakgaxmatkgoy xtachuwin, natakxtupalakgoy.» (Juan 5:28, 29.)

  «Nalakastakwanankgoy ninin.» (Hechos 24:15.)

• 

  Putum nakgalhikgo xchikkan chu nakgalhikgokan taskujut.

  «Natlawakgo chiki chu anta natawilakgo; chu nachankgo uvas chu nawakgo xtawakat. Ni atanu tiku natawila kchiki nema natlawakgo; ni katichananankgolh chu atanu tiku nawakgo. [...] Xtaskujutkan nema litlawakgonit xmakankan.» (Isaías 65:21, 22.)

• 

  Nialh naʼanan guerras.

  «[Dios na]masputu guerra kxlitilanka katiyatni.» (Salmo 46:9.)

  «Ni katilatalatlawakgolh kachikinin chu na nialh katitlawakgolh guerra.» (Isaías 2:4.)

• 

  Lhuwa liwat naʼanan.

  «Jae katiyatni lhuwa tu namakgalaj; kiDioskan snun nakinkasikulanatlawayan.» (Salmo 67:6.)

  «Kan aktsu lichanat nachankan y likwanit nalhuwan nak katiyatni, nachuna nak kalaksipijni.» (Salmo 72:16.)

• Latamanin nakgalhikgo putum tuku maklakaskinkgo.

  «Pero ti limaxkgan, ti nila ti lekgawaj, Dios ni ama akgxtakgmakgan.» (Salmo 9:18.)

  «Xla nalakgmaxtu pobre nak ixmakankan ti tamakgxtakgajnij, akxni nakilhanij; xawa, namakgtaya ama ti patima porque nila ti lekgawaj. Nalakgalhaman ti nitu makgaʼanan y ti lakaskin kamakgtayakaj; nakalakgmaxtu pobres xlakata ni nakamakgxtakgajnikan y nakamakgnikan.» (Salmo 72:12, 13.)

Xlakata liwana akxilhwi tuku wan Biblia pi nala, ¿akgatekgsti tuku xlakata lu xlakaskinka xʼakxilha Jesús natalichwinan xTamapakgsin Dios? Xla putum kalitachuwinalh latamanin Tamapakgsin tiku xkgaxmatniputunkgo, xlakata xkatsi pi wa nalakkaxtlawa kintaʼakglhuwitkan.

¿Lakgatiya uma tuku Dios wan pi natlawa? Komo lakgatiya, ¿la natlawaya xlakata tlakg nakatsiya xlakata xTamapakgsin? ¿Tuku natlawaya xlakata nalipaxuwaya xtasikulunalin? Artículos nema naʼakxilhaw nakinkamaxkiyan xatakgalhtin.