¿Tuku natlawa Dios?

Chatum tlan amigo wa tiku kinkamakgtayayan akxni kgalhiyaw taʼakglhuwit. Wa xlakata lhuwa tiku wankgo pi Dios ni kiʼamigojkan xlakata lakpuwankgo pi nitu tlawa kimpalakatakan. Pero xla lhuwata tuku tlawanit kimpalakatakan chu nachuna nialh makgas nalakkaxtlawa putum kintaʼakglhuwitkan chu namasputu tapatin. ¿Tuku natlawa Dios?

NAMASPUTU TUKU NITLAN

Dios namasputu tuku nitlan akxni namasputu tiku makilhtsuki. ¿Tiku matsuki tuku nitlan? Biblia wan: «Kxlitliwakga akgskgawini wilakgo, xlipaks ntachixkuwitat» (1 Juan 5:19). Jesús na limapakuwilh «xapuxku yunu nkatuxawat» (Juan 12:31). Xlakata Akgskgawini akgchipananit, wa tuku tlawa pi naʼanan taʼakglhuwit nema kamakgapatinan latamanin. ¿Tuku natlawa Dios xlakata uma?

Nialh makgas Jehová namaklakaskin xKgawasa xlakata namasputu tiku kgalhi «limapakgsin xla linin, wa cha akgskgawini» (Hebreos 2:14; 1 Juan 3:8). Asta Biblia masiya pi Akgskgawini katsi pi «kaj tsinu kilhtamaku nkgalhiy» chu namasputukan (Apocalipsis [Revelación] 12:12). Dios na nakamasputu latamanin tiku nitlan likatsikgo (Salmo 37:9; Proverbios 2:22).

AKGTUM PARAÍSO NATLAWA KATIYATNI

Akxni masputunita nawan tuku nitlan, kiMalakatsukinakan natlawa pi kakgantaxtulh tuku ankgalhin lakpuwanit xlakata latamanin chu Katiyatni. ¿La nawan latamat uma kilhtamaku?

Naʼanan takaksni chu nitu katilipekuanka. «Ti laktlan takatsij, ixlakan nawan ama lilakgatit pulataman, xlakan ana snun lipaxaw natalatamaj» (Salmo 37:11, SXP).

Lhuwa naʼanan taway chu xatlan. «Kan aktsu lichanat nachankan y likuanit nalhuwan nak katiyatni, nachuna nak kalaksipijni» (Salmo 72:16, SXP).

Naʼanan xastlan chiki chu xatlan taskujut. «Natlawakgo chiki chu anta natawilakgo; chu nachankgo uvas chu nawakgo xtawakat. [...] Putum kilhtamaku namaklakaskinkgo xtaskujutkan nema litlawakgonit xmakankan» (Isaías 65:21, 22).

¿Latapaputuna anta? Nialh makgas, putum uma nakgantaxtu.

NAMASPUTU TAJATAT CHU LININ

La uku putum tatatlayaw chu niyaw, pero nichuna katiwa putum kilhtamaku. Nialh makgas Jehová namaklakaskin xtamakamastan Jesús xlakata natlawa pi «xlipaks wa nti nkanajlaniy, ni katitsankgalh, wampi wata nakgalhiy xlatamat wa ntu xaliankgaIhin» (Juan 3:16). ¿La nawan latamat?

Nialh katiʼanalh tajatat. «Ni chatum lataman nawan: “Ktatatlay”. Latamanin tiku nalatamakgo kkatiyatni wa tiku nakatapatikan xtalakgalhinkan» (Isaías 33:24).

Nialh katiʼanalh linin. «Xliputum kilhtamaku namalakgsputu linin, chu Jehová, Malana tiku lakgchan namapakgsinan, xlikana naxaka putum lakgpixtajat» (Isaías 25:8).

Latamanin putum kilhtamaku nalatamakgo. «Xtatakin Dios, wa latamat wantu xaliankgalhin, xpalakata nCristo Jesús» (Romanos 6:23).

Tiku nikgonita nalatamaparakgo. «Nalakastakwanankgoy ninin wa nti xalakwan, chu nti ni xalakwan» (Hechos 24:15). Tiku nikgonita na nalitamakgtayakgo talakgmaxtut, akgtum xtamaskiwin Dios.

¿Tuku natlawa Dios xlakata namakgantaxti putum uma?

NAWILI AKGTUM XATLAN TAMAPAKGSIN

Dios namaklakaskin Tamapakgsin xalak akgapun nema maxkinit Jesucristo, xlakata namakgantaxti tuku lakpuwanit xpalakata latamanin chu Katiyatni (Salmo 110:1, 2). Wa uma Tamapakgsin nema Jesucristo masiyalh naskinkgo kstalaninanin akxni xwankgolh: «KinTlatikan tiku wilapi kʼakgapun [...]. Kamilh minTamapakgsin» (Mateo 6:9, 10, TNM).

Wa xTamapakgsin Dios namapakgsinan kKatiyatni chu namasputu putum takatsanajwat chu tapatin nema anan anta. Uma wa tlakg xatlan tamapakgsin nema xkgalhikgolh latamanin. Wa xlakata, Jesús lu liskujli nalichuwinan «xatlan tamakatsinin xla xtapakgsin Dios» akxni xlama kKatiyatni, chu kalimapakgsilh xtamakgalhtawakgen pi nachuna xtlawakgolh (Mateo 4:23; 24:14).

Jehová kinkatlawaninitan uma lu lakstlan tamalaknun xlakata lu kinkapaxkiyan. ¿Ni maʼakgpuwantiniyan uma tlakg nalakgapasputuna chu xʼamigo nalitaxtuya? ¿Tuku namakgamakglhtinana komo chuna natlawaya? Kaʼakxilhwi kʼartículo nema stala.