TUKU WI KXMAKNI | ¿TIKU XTATAYANANIN JEHOVÁ?
¿Tuku kanajlakgo xtatayananin Jehová?
Xtatayananin Jehová kkanajlayaw pi «putum Tatsokgni wa matsokgninalh Dios chu makgtayanan» (2 Timoteo 3:16). Klimaklakaskinaw Biblia xlakata naklakgapasaw Malakatsukina chu nachuna kinkamasiyaniyan la xatapaxuwan naklinaw kilatamatkan.
Biblia wan: «Xlakata latamanin nakatsikgo pi wix, tiku wanikan Jehová, kajwatiya wix tiku tlakg Lanka xlikalanka katiyatni» (Salmo 83:18, TNM). Wa xlakata kajwatiya Jehová Dios tiku maxkiyaw kakni. Nachuna, kliskujaw xlakata naklichuwinanaw xtukuwani xlakata xtatayananin akinin (Isaías 43:10-12).
Akinin kstalaninanin Cristo chu kkanajlayaw pi Jesús wa «xKam Dios»,a tiku milh kKatiyatni chu litaxtulh Mesías (Juan 1:34, 41; 4:25, 26). Akxni nilh, Jesús lakastakwanalh chu taspitli kʼakgapun (1 Corintios 15:3, 4). Ni makgas kilhtamaku limapakuwika Mapakgsina kxTamapakgsin Dios (Apocalipsis [Revelación] 11:15). Ama xTamapakgsin Dios akgtum tamapakgsin nema lakkaxwilikanita chu akgtum paraíso natlawapara Katiyatni (Daniel 2:44). Biblia malaknu: «Pero tiku tlan likatsikgo wa nakamaxkikan katiyatni, chu xlikana lu lipaxuw natawilakgo» (Salmo 37:11, 29, TNM).
«Akxni likgalhtawakgakgo Biblia, xtachuna la Dios katachuwinama. Putum kilhtamaku akxni kgalhikgo taʼakglhuwit, putsakgo kxTachuwin Dios la nalakkaxtlawakgo. [...] Xlakan, akxilhkgo xTachuwin Dios la nema tlan makgtayanan.» (Sacerdote católico Benjamin Cherayath, kperiódico Münsterländische Volkszeitung, Alemania)
Akinin xTatayananin Jehová kkanajlayaw pi tuku wan Biblia tlan nakamakgtaya latamanin la uku (Isaías 48:17, 18). Wa xlakata kliskujaw nakkgalhakgaxmataw xlimapakgsin. Akgtum liʼakxilhtit, Biblia kinkawaniyan pi ni namaxkajwaliyaw kimaknikan nipara kintalakapastaknikan, wa xlakata ni kxkuliyaw chu ni klimaklakaskinaw drogas (2 Corintios 7:1). Nachuna ni ktlawayaw tuku Biblia lakgmakgan, chuna la takgachin, talakgxtumit xalimaxana chu takgalhan (1 Corintios 6:9-11).
a Anta kBiblia na limapakuwikan Jesús «nchastum xKam Dios» xlakata xliputum tuku malakatsukika, kaj manwa xakstu tlawalh Jehová. Nachuna, wa tiku pulana malakatsukika (Juan 3:18; Colosenses 1:13-15).