TAKGALHSKININ XLAKATA BIBLIA
¿Nalatamaparakgo tiku nikgonita?
Xlikana, tiku malakatsukilh latamat tlan maspitpara
Jehová Dios “xmakilhtsukina latamat” (Salmo 36:9). Wa xlakata tlan nawanaw pi xla tlan nakamaspitni xlatamatkan tiku nikgonit. Biblia wan pi nialh makgas chuna nala. (Kalikgalhtawakga Hechos 24:15.) ¿Tuku xlakata Dios kamalakastakwaniputun tiku nikgonita?
KiMalakatsukinakan xlakaskin pi latamanin xlatamaw putum kilhtamaku (Génesis 1:31; 2:15-17). Uma tuku lakaskin ni talakgpalinit. Lu nitlan limakgkatsi akxni akxilha pi ni lhuwa kilhtamaku latamayaw chu kgalhiyaw lhuwa taʼakglhuwit. (Kalikgalhtawakga Job 14:1, 14, 15.)
¿Niku nalatamakgo tiku nalakastakwanankgo?
¿Katlawalh Dios latamanin xlakata nalatamakgo kʼakgapun? Ni. Xla katlawalh ángeles xlakata xlatamakgolh kʼakgapun, chu akinin xlakata nalatamayaw kKatiyatni (Génesis 1:28; Job 38:4, 7). Xlakata katsiyaw uma, kalilakapastakwi tiku Jesús kamalakastakwanilh. ¿Niku kamalakastakwanilh? Unu kKatiyatni. Chu nachuna nawan xlakata latamanin tiku nalakastakwanankgo: nalatamakgo kKatiyatni. (Kalikgalhtawakga Juan 5:28, 29; 11:44.)
Pero Dios kalaksaknit makgapitsi latamanin xlakata nalakastakwanankgo chu naʼankgo kʼakgapun, niku espíritus nawankgo (Lucas 12:32; 1 Corintios 15:49, 50). Uma makgapitsi latamanin natamapakgsinankgo Jesucristo kKatiyatni. (Kalikgalhtawakga Apocalipsis [Revelación] 5:9, 10.)