¿Lakapastaka?

¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:

¿Tuku kinkamasiyaniyan Biblia xlakata la makgkatsi Dios tuku makgkatsiyaw?

Akxni israelitas patinankgolh k’Egipto, Dios xkatsi pi xkachikin xpatinama, chu xmakgkatsi xtakatsanajwatkan (Éx. 3:7; Is. 63:9). Komo akinin chuna kinkatlawakanitan la xla, nachuna makgkatsiyaw talakgalhaman. Xla makgkatsi tuku makgkatsiyaw asta maski akxni lakpuwanaw pi ni kinkalakgchanan xtapaxkit (wp18.3, págs. 8-9).

¿La kamakgtayalh Jesús latamanin ni nalaksakpaxkinankgo?

Akxni xlama Jesús, lhuwa judíos xlaksakpaxkinankgo. Cristo liwana lichuwinalh pi xlakaskinka nataktujuyaw chu ni tlanka nakinkamakgkatsikanan kaj xlakata la tasiyayaw. Lichuwinalh pi kstalaninanin xtalakaskin natalan nalali’akxilhkgo (w18.06, págs. 9-10).

¿Tuku kinkamasiyaniyan tuku xlakata Dios ni maxkilh talakaskin Moisés natanu kTiyat nema xkawanikanit Nakamaxkikan?

Moisés lu tlan xtalalin Jehová (Deut. 34:10). Akxni xa’awatiya xtlawamakgolh israelitas kxakaskakni tiyat liwaka 40 kata, akxni xlimakgtiy tsukukgolh sitsikgo xlakata ni x’anan chuchut. Dios wanilh Moisés pi kxakgatlih chiwix. Pero Moisés nichuna tlawalh, wata kaj kgaxilh. Max Jehová sitsinilh xlakata ni wa tlawalh tuku wanika o xlakata ni wa maxkilh kakni xlakata milagro nema tlawalh (Núm. 20:6-12). Uma kinkamasiyaniyan pi xlakaskinka nakgalhakgaxmataw chu namaxkiyaw kakni Jehová (w18.07, págs. 13-14).

¿Tuku max nitlan nakinkakitaxtuniyan komo natsukuyaw kalaksakpaxkiyaw amakgapitsin kaj xlakata la tasiyakgo?

Wi pulaktutu tuku lakpuwankgo latamanin xlakata kalaksakpaxkikgo amakgapitsin: xcolorkan o kxkachikinkan, tumin o xkatakan. Lu xlakaskinka pi ni nalaksakpaxkinanaw, chuna la Jehová (Hech. 10:34, 35) (w18.08, págs. 8-12).

¿La tlan namakgtayanankgo kcongregación natalan tiku linkgoya kata?

Chatum kstalanina Cristo tiku lakgpalinikan taskujut nema xlakgaya chuntiya lanka xtapalh litaxtu kxlakatin Dios chu tlan lu nakamakgtaya amakgapitsin. Tlakg tlan namakgtayakgo xchixkukan natalan lakpuskatin tiku ni xtatayananin Jehová, nakamakgtayakgo tiku taxlajwanikgonit, namakgalhtawakganankgo chu namakgtayanankgo la pulaklhuwa tlan nalichuwinankan Dios (w18.09, págs. 8-11).

¿Tuku liskujni anan klikgalhtawakga nema kgalhiyaw?

Makgapitsi wa tarjetas de contacto, invitaciones, maktsayan tratados nema liwana kaxtlawakanit chu revistas Makatsinina chu ¡Despertad! Nachuna kgalhiyaw makgapitsi folletos, maktiy libro xla takgalhtawakga chu akgtati videos nema lu tlan namaklakaskinaw, pulaktum wanikan ¿Tuku xlakata nalikgalhtawakgaya Biblia? (w18.10, pág. 16).

¿Tuku tlan natlawa chatum kstalanina Cristo xlakata tlan natamawa xaxlikana, chuna la wan Proverbios 23:23?

Ni talakaskin namastayaw tumin xlakata nakgalhiyaw xaxlikana. Pero talakaskin nalimaxtuyaw kilhtamaku chu litliwakga xlakata tlan nakgalhiyaw (w18.11, pág. 4).

¿Tuku katsiniyaw xlakata la likatsinilh Oseas xpuskat, Gómer?

Gómer makglhuwa tlawalh talakgxtumit xalimaxana. Pero Oseas tapatilh chu chuntiya xtamakgaxtokga. Komo chatum kstalanina Cristo tiku tamakgaxtokgnit natlawa talakgxtumit xalimaxana, tiku tamakgaxtokga tlan natapati. Chuna la wan Biblia, komo tiku tamakgaxtokga natatlawapala talakgxtumit tiku lakgalhinalh, nialh xlilat nalamakgxtakga (w18.12, pág. 13).