Niku tamasta xtakgalhtin akgtum takgalhskinin

◼ ¿La nakamakgtayayaw tiku lhuwa kilhtamaku nialh kinkatatamakxtumikgoyan xlakata natamakxtumiparakgo chu nalichuwinamparakgo Dios?

Lu tlan makgkatsiyaw akxni tiku nialh xlichuwinan Dios limasiya pi chuntiya skujnaniputun Jehová (Luc. 15:4-6). Max mastalh talakaskin pi taʼakglhuwit o tuku tuwa titaxtulh kxlatamat tlawalh pi nialh xlikgalhtawakgalh Biblia, nialh xʼalh tamakxtumit chu nialh xʼalh lichuwinan Dios. ¿La tlan liwana nakamakgtayayaw xlakata chuntiya tliwakga natawila xtakanajlakan?

Putum akinin nawaniyaw pi xlikana paxkiyaw. Lakgkgolotsin tunkun naʼakxilhkgo tuku tlan nalimakgtayakan kxtakanajla (Sant. 5:14, 15). Komo ni lhuwa kilhtamaku limakgxtakgnit, max kaj namaklakaskin pi kamakgtayalh chatum tala xlakata nalichuwinampara Dios. Pero komo titaxtunita lhuwa kilhtamaku max tlakg lhuwa maklakaskin tamakgtay. Max talakaskin nalimakgalhtawakgekan maktum libro nema natlawa pi natatliwakglha xtakanajla chu xtapaxkit. Komo chuna, tiku pulalin la tlawakan xtaskujut Dios kcongregación nawani chatum tiku lichuwinan Dios tiku tliwakga wi xtakanajla xlakata namakgalhtawakge (Heb. 5:12-14; kaʼakxilhti «Sección de preguntas» xla Nuestro Ministerio del Reino xla noviembre kata 1998). Komo lakgapasa tiku maklakaskin tamakgtay, katachuwinanti tiku pulalin la tlawakan xtaskujut Dios.

Talakaskin pulana kakatachuwinalh chatiy lakgkgolotsin tiku makgasata nialh lichuwinan Dios, chu alistalh nawaniyaw pi kakinkataʼan lichuwinanaw Dios. Natlawakan la akxni tiku aku nataxtu lichuwinan Dios (kaʼakxilhti revista La Atalaya 15 xla noviembre kata 1988, pág. 17 chu libro ¿Tuku xlikana masiyay Biblia? págs. 177, párrs. 9-11). Nalimasiya pi xlikana nalichuwinamputumpara Dios. Nachuna namakgantaxti tuku wan libro Organizados págs. 79 asta 81 chu naʼan kputum ktamakxtumit.

Komo liwana nalakkaxwili la nakgalhtawakga tiku tsukupa lichuwinan Dios lhuwa namakgtaya xlakata tlakg tlan natalalin Jehová chu ni namakgxtakga chu chuntiya katlawalh ktiji niku linan klatamat nema ni kgalhi xlisputni (Mat. 7:14; Heb. 10:23-25). Komo “naʼakgpuwanti” chu nakgalhi xalaktlan tayat, uma natlawa pi nikxni “chunatiya nalatama chu na nipara katilaktlawamilh kilhtamaku” la kstalanina Cristo (2 Ped. 1:5-8).