KILATAMATKAN LA KSTALANINANIN CRISTO

Kamakgpuwantini kstalanina Cristo tiku nialh lichuwinan Dios

Chatum mapuchwanina makgtayaputun tantum borrego nema tsankganit

Akgatunu kata, lhuwa tiku nialh lichuwinankgo Dios ankgo akxni talakapastaka akxni tinilh Cristo. Maski xkgosnamakgo ktiji nema linan klatamat, pulaklhuwa tuku litaxlajwanikgonit, makgapitsi talichuwinan kfolleto Kalakgtaspitti Jehová (Heb 12:1). Pero kxlakatin Jehová chuntiya lanka xtapalh umakgolh tiku nialh lichuwinankgo Dios, xla kalitamawalh xkgalhi xKgawasa (Hch 20:28; 1Pe 1:18, 19). ¿La tlan nakamakgtayayaw nataspitkgo kcongregación?

Lakgkgolotsin xalak congregación kaputsakgo chu kamakgtayaputunkgo kstalaninanin Cristo tiku nialh lichuwinankgo Dios, chuna la chatum mapuchwanina kaputsa xborregos nema tamakgatlikgonit (Lu 15:4-7). Uma limasiya la kinkapaxkiyan Jehová (Jer 23:3, 4). Putum akinin tlan nakamakgpuwantiniyaw, ni kajwatiya lakgkgolotsin. Akxni naliskujaw xlakata nakalimasiyaniyaw talakgalhaman chu tlan nakalikatsiniyaw, namakgapaxuwa Jehová chu tlan nakitaxtu (Pr 19:17; Hch 20:35). Wa xlakata, kalakpuwanti tiku tlan namakgpuwantiniya, chu lakapala chuna katlawa.

Laura lakaxtuya kventana, Abbey tlawama oración, Abbey chu Laura la’akgpixtinit, Abbey chu Laura akxtum taxtukgo k’akgtum foto

KA’AKXILHTI VIDEO KAKAMAKGPUWANTINIW TIKU NIALH LICHUWINANKGO DIOS, CHU ALISTALH KALAKPUTSANANI UMAKGOLH TAKGALHSKININ:

¿Tuku tlawalh Abbey akxni lakgapasli chatum xtatayana Jehová tiku nialh xlichuwinan Dios?
¿Tuku xlakata talakaskin nakawaniyaw lakgkgolotsin komo makgtayaputunaw chatum tiku nialh lichuwinan Dios?
¿La lakkaxwililh Abbey xlakata tlan xlakgampa Laura?
¿La limasiyalh Abbey pi ni xtaxlajwani, xmakgakgalhinan chu xpaxkinan akxni xmakgtayama Laura?
¿Tuku kinkamasiyaniyan xli’akxilhtit Jesús nema tekgsaw kLucas 15:8-10?
¿Tuku tasikulunalin makglhtinankgolh xlakata liskujkgolh namakgtayakgo Laura?