«Wix lu tlan precursor xwanti»
1. ¿Tuku wa chatum tala xlakata xliskujma la precursor?
1 Kathe B. Palm wa: «Ni anan atanu taskujut nema tlakg kimakgapaxuwa o xkimaxkilh tasikulunalin xla takanajla. Xla akglhuwata kata liskujnit la precursor anta xlikalanka Chile, kSudamérica. Max wi tiku lakapastaka tuku tlan kakitaxtuni tiku xliputum kilhtamaku skujnikgo Dios, chu nawaniyan: «¡Wix lu tlan precursor xwanti!».
2. Kawanti tuku xlakata lu paxuwayaw akxni tlawayaw tuku xla Dios.
2 Akgtum latamat nema tlan kinkamamakgkatsiniyan. Akxni Jesús tiku kinkawilinin Liʼakxilhtit, xtlawa xtalakaskin xTlat, xkitaxtu la xliwat nema xmatliwakglha (Juan 4:34). Wa xlakata, liwana xkatsi tuku xkawanima kstalaninanin akxni kamasiyanilh pi xlakata xlikana tlan xmakgkatsikgolh xlakaskinka xtlawakgolh taskujut nema likakninanikan Jehová. Xlikana, akxni kkilatamatkan tlawayaw taskujut nema lakgati Dios, lu lipaxuwayaw. Nachuna, tlakg paxuwayaw akxni tlakg limaklakaskinaw kinkilhtamakujkan, kilitliwakgakan chu tuku kgalhiyaw xlakata nakalimakgtayayaw amakgapitsi (Hech. 20:31, 35).
3. ¿La nalipaxuwayaw akxni tlakg limaxtuyaw kilhtamaku xlakata nalichuwinanaw Dios?
3 Nachuna, akxni tlakg lichuwinanaw Dios tlakg ni tuwa namatsukiyaw chu nalimakgalhtawakgenanaw Biblia chu uma lu nakinkamakgapaxuwayan. Maski niku lichuwinanaw Dios tasiya pi ni kgaxmatkgo latamanin, alistalh lhuwa tiku nakgaxmatkgo akxni tlakg liwana nakatsiniya lichuwinana Dios chu tlakg liwana namasiyaya. Akxni makgatsinita akgtum kata la precursor, lhuwa tuku namasiyanikana Escuela del Servicio de Precursor chu uma lu namakgtayayan akxni nalichuwinana Dios (2 Tim. 2:15). Komo chuntiya naliskuja, tuku nachana la uku alistalh namasta xtawakat (Ecl. 11:6).
4. ¿Tuku xlilakpuwanatkan lakgkgawasan natlawakgo akxni nataxtukgo kʼescuela?
4 Kgawasa kalakpuwanti. Komo wix masputupat secundaria, ¿lakapastakpat tuku natlawaya alistalh? Asta uku, tarea nema maxkikana kʼescuela wa tlakg limaxtuya kilhtamaku. Akxni nataxtuya kʼescuela, ¿la namaklakaskina uma kilhtamaku nema xlitlawaya mintarea? Lu tlan xwa komo ni tantaku kskujti, chu ¿tuku xlakata ni tlawaniya oración xlakata naʼakxilha komo tlan precursor nawana? Tuku wix nakatsiniya akxni nakatachuwinana tiku lismanikgonit tanu tuku tlawakgo, tlan natlawaya tuku pulana nila xtlawaya, nalismaniya tlan natlawaya xtaskujut Dios chu nakatsiniya liwana namasiyaya chu umakgolh namakgtayayan xliputum milatamat.
5. ¿La tlan natlatni chu congregación namakgtayanankgo xlakata wi tiku precursor nawan?
5 Natlatni, ¿kamakgtayapatit minkamankan xlakata tlan xliputum kilhtamaku naskujnikgo Dios? Tuku nakawaniyatit chu xatlan liʼakxilhtit nema nakawiliniyatit lu nakamakgtaya xlakata pulana nawilikgo xTamapakgsin Dios (Mat. 6:33). Ray, tsukulh liskuja precursor akxni masputulh secundaria, xla wa: «Kintse xkatsi pi lu tlan limakgkatsikan akxni skujkan la precursor». Pero nachuna, tuku wankgo chu tuku tlawakgo, congregación na tlan namakgtayanan xlakata wi tiku precursor nawan. José xalak España wan: «Kincongregación xakxilha pi liskujkan la precursor wa tlakg tlan tuku xtlawakgolh lakgkgawasan. Xlakata tuku xkiwanikgo, la xlilakaskinka xʼakxilhkgo precursor wankan chu tamakgtay nema xkimaxkikgo, uma tlawalh pi ni tuwa xakmakgkatsilh precursor xakwa».
6. ¿Tuku tlan natlawaya komo ni precursor wamputuna?
6 La tlan namakgantaxtiya tuku tuwa makgkatsiya. Max wi tiku nawan: «Pero akit ni precursor kwamputun». Komo chuna nalakpuwana, katlawani oración Jehová xlakata nawaniya la makgkatsiya chu kawani: «Nikkatsi komo tlan nakliskuja la precursor, pero akit ktlawaputun tuku lakgatiya» (Sal. 62:8; Pro. 23:26). Alistalh, kaputsa xtamakgtay Dios anta kxTachuwin chu kxkachikin. Lhuwa precursores regulares pulana «limatsukikgolh» precursor auxiliar, chu tapaxuwan nema kgalhikgolh, tlawalh pi tlan precursor regular xwankgolh (Sal. 34:8).
7. ¿Tuku tlan natlawaya komo makgkatsiya pi nila katimakgatsi 70 horas nema talakaskin akgatunu papaʼ?
7 Atanu tuku lakpuwankgo wa pi nila katimakgatsikgolh 70 horas nema talakaskin. Tlan xtachuwinanti chatum precursor tiku nachuna tatakgsa la wix (Pro. 15:22). Alistalh, katsokgti makgapitsi horas nema tlan xmaklakaskinti. Max naʼakxilha pi ni lu tuwa komo nalakmaxtuniya kilhtamaku tuku ni lu xlakaskinka nema tlawaya xlakata tlan nalichuwinana Dios (Efe. 5:15, 16).
8. ¿Tuku xlakata tlan naʼakxilhtilhayaw la tatakgsaw?
8 Kaʼakxilhti komo tlan precursor nawana. Kilatamatkan talakgpalitilha, chu wa xlakata tlan naʼakxilhtilhayaw chuna la tatakgsaw kinchatunukan. Akgtum liʼakxilhtit, ¿lakgchama kilhtamaku xlakata nialh naskuja xlakata lipinata kata? Randy nema nialh skujli xlakata xlina kata wa: «Uma tlawalh pi akit chu kimpuskat tlan xakliskujwi la precursores regulares, chu chuna tlan kaw makgtayananaw niku tlakg talakaskin tamakgtay. Akit kmakglhtinanit lu lhuwa tasikulunalin xlakata tuku laksakli pero tuku tlakg tlan kmakglhtinanit wa pi kkgalhi akgtum xatlan talakapastakni».
9. ¿Tuku tlan naʼakxilhkgo natlawakgo tiku tamakgaxtokgkgonit?
9 Makgapitsi tamakgaxtokgat akxilhkgonit pi ni lu talakaskin pi xchatiykan naskujkgo putum kilhtamaku. Xlikana, talakaskin pi akgtum familia ni lhuwa tuku nakgalhiputun, pero uma tuku natlawakgo tlan nakakitaxtuni. Nina makgas xpuskat John nialh skujli putum kilhtamaku xlakata tlakg naskujni Dios, chu John wan: «Akit lu klipaxuwa xlakata kimpuskat putum kilhtamaku tlawama tuku xla Dios».
10. ¿Tuku tlawa pi kstalaninanin Cristo precursor nawanputunkgo?
10 Kalimasiyaw tapaxkit chu takanajla. Jehová laksaknit pi kimputumkan natlawayaw uma lu xlakaskinka taskujut: nalichuwinanaw xlimapakgsin. Nialh makgas kilhtamaku, namasputukan uma kakilhtamaku chu kajwatiya tiku namalankikgo Jehová nalakgtaxtukgo (Rom. 10:13). Komo kinakujkan kgalhini lhuwa tapaxkit chu tapaxtikatsinit Jehová xlakata tuku tlawanit kimpalakatakan, natlawa pi lu nakgalhakgaxmatputunaw limapakgsin nema kinkamaxkinitan xKgawasa, pi nalichuwinanaw xlimapakgsin (Mat. 28:19, 20; 1 Juan 5:3). Nachuna, xlakata kanajlayaw pi xaʼawatiya kilhtamaku lamaw, tlawa pi lhuwa nalichuwinanaw Dios xlakata kgalhiyawku kilhtamaku, chu ni tlawayaw putum tuku tlawakan kkakilhtamaku (1 Cor. 7:29-31).
11. ¿La naʼakxilha komo wi tiku nawaniyan pi lu tlan precursor nawana?
11 Precursor regular wankan ni kaj wamputun natlawayaw tuku wan xkachikin Dios, wata chuna limasiyayaw takaknin nema maxkiyaw Dios. Wa xlakata, komo wi tiku nawaniyan: «Wix lu tlan precursor nawana», tlan kalimakgkatsi. Katlawani oración Jehová chu kaʼakxilhti komo tlan naskuja la precursor, chuna la amakgapitsi precursores nema lipaxuw tlawamakgo uma taskujut.
[Blurb on page 4]
Natlatni, ¿kamakgtayapatit minkamankan xlakata tlan xliputum kilhtamaku naskujnikgo Dios?
[Blurb on page 5]
Jehová laksaknit pi kimputumkan natlawayaw uma lu xlakaskinka taskujut: nalichuwinanaw xlimapakgsin.