¿Lakapastaka akxni precursor regular xwanita?
1. ¿Tukuya tasikulunalin lu lipaxuwakgonit lhuwa natalan? ¿Tuku tlawakgolh amakgapitsin?
1 Akglhuwata kata, lhuwa miles kstalaninanin Cristo liskujmakgo la precursores, “masiyamakgo, liʼakgchuwinamakgo Jesucristo” (Hech. 5:42). Pero makgapitsi, wi tuku kamamakgxtakgnilh uma taskujut nema lu xlipaxuwakgo. Komo precursor xwanita, ¿akxilhpat la wi milatamat xlakata na tlan precursor xwampara?
2. ¿Tuku xlakata tiku precursor xwanit xliʼakxilhat komo tlan namatsukipara?
2 Talakgpali latamat. Max tuku tlawalh pi nialh precursor xwanti nialh anan. Akgtum liʼakxilhtit, komo wix nialh precursor wanti xlakata nila xmakgatsiya 90 horas, ¿tlan precursor nawamparaya xlakata la uku kaj 70 horas tamasta akgatunu papaʼ? O nialh lu lhuwa tumin limaklakaskina chuna la pulana o nialh lhuwa tuku lakgayat kmifamilia. Chatum tala tiku xmakgxtakgnit li precursor xlakata xtatatla, matsukipa akxni xkgalhi 89 kata: xlakata liwaka akgtum kata la xtaxtunit khospital, lakpuwa pi tlan precursora xwampa.
3. ¿La natlawakgo familia xlakata wi tiku tlan precursor nawan?
3 Komo wix nikxni liskujnita la precursor pero, ¿wi chatum xalak mifamilia tiku precursor xwanit chu makgxtakgli? Max xlakata kuentajtlawalh chatum xalak familia, la natlatni tiku linkgoya kata (1 Tim. 5:4, 8). ¿Tlan xmakgtaya o xmakgtayalh atanu xalak familia xlakata precursor xwampa? ¿Tlan xlichuwinantit kfamilia? (Pro. 15:22.) Akxni lamakgtayakgo familia xlakata wi tiku naliskuja la precursor, putum tlan nawankgo pi makgtayanamakgo kʼuma taskujut.
4. ¿Tuku tlan natlawaya komo uku nila liskuja la precursor?
4 Ni kataxlajwani komo la uku nila precursor nawamparaya. Xlakata precursor wamputuna makgapaxuwa Jehová (2 Cor. 8:12). Tuku katsini akxni precursor xwanita chuntiya kalimaklakaskinti la uku. Chuntiya kaskinti kmioración pi precursor wamputuna chu skgalalh katawila xlakata precursor nawana akxni tlan naliskuja (1 Juan 5:14). Max alistalh, Jehová natlawa pi “lakalhuwa ntani naskuja”, chuna nalipaxuwaparaya xlakata tlan precursor nawamparaya (1 Cor. 16:9).