Katamasantujlilh xtukuwini Dios
1. ¿Tuku nawanikan tamakxtumit xla kata 2012 chu niku takilhtilh?
1 Kata 1931 akxni kinkalimapakwikan xtatayananin Jehová, lu lanka talakgalhaman kgalhiw xlakata tsukuw linaw xtukuwani xMapakgsina putum kakilhtamaku. Wa Jehová tiku kinkamaxkin uma talakgalhaman (Isa. 43:10). Jesús lu xlakaskinka xakxilha xtukuwani xTlat, wa xlakata akxni masiyalh oración xapulana wililh xtukuwani (Mat. 6:9). Xtema tamakxtumit xaʼakgtiy kilhtamaku xla kata 2012, «Katamasantujlilh xtukuwini Dios», anta takilhtinit kʼuma oración.
2. ¿Tuku natalichuwinan klanka tamakxtumit?
2 Tuku natalichuwinan. Ktaʼakgchuwin nema natamasta sábado wanikan «Kalimaklakaskiw putum kilhtamaku xlakata nalichuwinanaw xtukuwani Dios», natalichuwinan tuku xlakata uma taskujut lu kinkamakgapaxuwayan. Taʼakgchuwin «Ni kamaxkajwaniw xtukuwani Jehová» nakinkamakgtayayan la nitu nakinkatlawaniyan pulaktati tuku kinkaliʼakgskgawiputunkanan. Nachuna, ktaʼakgchuwin «Tuku xlakata natamasantujli xtukuwani Dios» nakatsiyaw la tlan nakinkakitaxtuniyan akxni nalichuwinanaw Dios chu ni nataxlajwaniyaw akxni latamanin ni nakgaxmatputunkgo. Domingo na nakgaxmataw akgtati taʼakgchuwin niku natalichuwinan la tlan nalimalankiyaw xtukuwani Dios kintalakapastaknikan, la chuwinanaw, tuku laksakaw natlawayaw chu la linaw kintayatkan. Chu xlikana pi tiku xalaksasti na nalakgatikgo taʼakgchuwin nema wanikan, «Jehová namasantujli xtukuwani kArmagedón».
3. ¿Tukuya talakgalhaman kgalhiyaw, chu la nakinkamakgtayayan tuku natamatitaxti ktamakxtumit?
3 Nialh makgas, Jehová namasantujli xtukuwani (Eze. 36:23). Xlakata nina chuna tlawa, la uku kgalhiyaw akgtum lanka talakgalhaman: nakgalhmakgtayayaw xtukuwani Dios. Xlikana, tuku natamatitaxti kxtamakxtumit xaʼakgtiy kilhtamaku nakinkamakgtayayan namakgantaxtiyaw tuku lakgayaw xlakata linaw xtukuwani Jehová.