Lu xlakaskinka ka’akxilhwi xlakata skujniyaw Jehová
1. ¿Tuku wankgo lhuwa latamanin xlakata lichuwinanaw Dios?
1 Uma kakilhtamaku nema akgchipanit Satanás, lhuwa latamanin lakpuwankgo pi taskujut nema tlawamaw nitu litaxtu (1 Cor. 1:18-21). Komo ni kuenta natlawayaw, uma nitlan talakapastakni natlawa pi naxlajwananaw chu nialh katiskujniw Dios (Pro. 24:10; Isa. 5:20). Pero ¿tuku xlakata lu xlakaskinka naʼakxilhaw xlakata akinin xtatayananin Jehová? (Isa. 43:10.)
2. ¿Tuku xlakata akxni lichuwinanaw Dios wa xtaskujut tlawamaw?
2 Xasanto taskujut. Apóstol Pablo wa pi lichuwinankan Dios akgtum taskujut nema tlawaniyaw Dios (Rom. 15:15, 16, Hua Xasasti Talaccaxlan, 1999). Akxni makgtayananaw kʼuma taskujut wa makgtayamaw xasanto kiDioskan chu na makgtayananaw xlakata natamasantujli xtukuwani (1 Cor. 3:9; 1 Ped. 1:15). Jehová akxilha pi “kintachuwinkan limaxkiyaw nkakni xtukuwini”, wa xlakata lu xlakaskinka uma takaknin nema maxkiyaw (Heb. 13:15).
3. ¿Tuku xlakata lichuwinankan Dios akgtum talakgalhaman nema nitu xtachuna?
3 Lichuwinankan xtachuwin Dios lu lanka talakgalhaman chu ni lhuwa tiku kamaxkikan talakaskin chuna natlawakgo. Ángeles lu xlakgatikgolh xkamatlawika uma taskujut (1 Ped. 1:12). Chu xlikana pi lu liwana xtlawakgolh. Pero, Jehová kinkalakgayawanitan akinin xtachuna la «tlamank xla tiyat» uma talakgalhamananin nema nitu xtachuna (2 Cor. 4:7).
4. ¿La nalimasiyayaw pi lu xlakaskinka akxilhaw xlakata lichuwinanaw Dios?
4 Tuku lu xlakaskinka. Komo lu lanka talakgalhaman naʼakxilhaw nalichuwinanaw Dios, “nakatsiyaw nalaksakaw wantu xatlan” kkilatamatkan chu chuna nalakkaxwiliyaw kinkilhtamakujkan akgatunu semana xlakata nalichuwinanaw Dios (Fili. 1:10). Kalakpuwaw pi tlakgnanin akinin chu lu lhuwa kinkalakgapaskanan. Xlakata lu xlakaskinka xʼakxilhwi, lu xmakgatawakgatilhaw chu xlakputsaw xlakata tlakg liwana xtlakgnaw. Nachuna, akxni anaw lichuwinanaw Dios naliskujaw xlakata “namalakatanksayaw tachuwin xla xaxlikana” chu na naliskujaw xlakata “lu lakatsuku namasiyunikgoyaw” (2 Tim. 2:15; 4:2).
5. ¿Tiku lu xlakaskinka akxilhkgo kintaskujutkan?
5 Ni kamastaw talakaskin pi nakinkamaxlajwanikgoyan tuku wankgo latamanin. Wilakgojku latamanin tiku lakgatikgo kinkakgaxmatnikgoyan. Chu ni wa latamanin lakaskinaw pi tlan kakinkaʼakxilhkgon wata wa Jehová. Chu liwana kakatsiw pi xla lu xlakaskinka akxilha uma lanka taskujut nema tlawamaw (Isa. 52:7).