Kakamakgtayaw tiku kinkakgaxmatnikgoyan kalakpuwankgolh tuku kawaniyaw
1. ¿Tuku tlakg tlan nakinkakitaxtuniyaw akxni nalichuwinanaw Dios?
1 ¿Tuku tlakg tlan nakitaxtu akxni lichuwinanaw Dios: fuerza nakamasiyaniputunaw tuku kanajlayaw, o nakamakgtayayaw liwana nalakapastakkgo chu nakanajlakgo tuku nakawaniyaw? Apóstol Pablo tlawalh tuku awatiya lichuwinaw, akxni katachuwinalh judíos xalak Tesalónica chu «tij kanajlakgolh makgapitsin» (Hech. 17:2-4). Pero ¿tuku wamputun natlawayaw pi latamanin liwana nalakapastakkgo?
2. ¿La tlan natlawayaw la Pablo akxni nalichuwinanaw xalakwan xalaksasti?
2 Kuenta katlawaw tuku lakpuwankgo tiku katachuwinanaw. Xlakata nakamakgtayayaw tiku katachuwinanaw niku kinkalakgchanan, kuenta katlawaw tuku lakpuwankgo. Akxni Pablo tsukulh katachuwinan griegos tiku ni xkanajlanikgo Jehová kʼAreópago, kalitachuwinalh tuku xlakan xlakgapaskgo chu tuku xkanajlakgo (Hech. 17:22-31). Nachuna akxni lakkaxwiliyaw tuku nawanaw akxni naʼanaw lichuwinanaw Dios kaʼakxilhwi tuku kanajlakgo chu tuku nitlan lakpuwankgo kimpalakatakan tiku nakatachuwinanaw (1 Cor. 9:19-22). Komo tiku tachuwinamaw ni kgaxmatputun kalitachuwinaw tuku xla kanajla.
3. ¿La nakinkamakgtayayan xatlan takgalhskinin xlakata latamanin liwana nalakapastakkgo?
3 Liwana kalakapastakwi tuku takgalhskinin natlawayaw. Komo ni katsiya niku wi tiku tachuwinamaw kteléfono nila nawaniyaw la na nachan niku amputun. Na chuna nila katimakgtayaw tiku kinkakgaxmatniman liwana nakatsi tuku xaxlikana komo ni katsiyaw tuku lakpuwan. Jesús pulana xkatlawani takgalhskinin latamanin xlakata xkatsilh tuku xlakpuwankgo, chu alistalh xtlawa pi liwa xlakapastakkgolh. Akgtum liʼakxilhtit, akxni wi tiku kgalhskilh: “¿Tu naktlaway naklikgalhiy latamat wantu xaliʼankgalhin?”, Jesús pulana putsananilh tuku xlakpuwan chu alistalh kgalhtilh (Luc. 10:25-28). Tanu kilhtamaku akxni Pedro lichuwinalh tuku ni chuna xwanit, Jesús tlawanilh takgalhskinin xlakata xlakgpalilh xtalakapastakni (Mat. 17:24-26). Wa xlakata, akxni tiku kinkakgaxmatniman nakinkawaniyan pi wi tuku ni liwa akgatekgsa, o makgachakgxi, o nakinkawaniyan tuku ni chuna, kalimaklakaskiw takgalhskinin xlakata namakgtayayaw liwana nalakapastaka.
4. ¿Tuku xlakata nakamakgtayayaw tiku kinkakgaxmatnikgoyan liwana nalakapastakkgo?
4 Akxni wi tiku namakgtayayaw liwana nalakapastaka chuna tlawamaw la xtlawa Jesús, xaLanka kiMakgalhtawakgenakan, chu nachuna la makgapitsin tiku liwana xlichuwinankgo Dios xapulana siglo. Nachuna nakamaxkiyaw kakni tiku kinkakgaxmatnikgoyan (1 Ped. 3:15). Komo chuna natlawayaw max nalakaskinkgo pi nalakgapaxialhnamparayaw.